الماتى وبلىسىندا جۇرگىزىلگەن ساراپتاما ناتيجەسىندە وڭىردەگى سىبايلاس جەمقورلىققا قاتىستى ءاربىر التىنشى دەرەك مەملەكەتتىك ساتىپ الۋ سالاسىنا قاتىستى ەكەندىگى انىقتالعان.
ارنايى مونيتورينگ كورسەتكەندەي, مەملەكەتتىك ساتىپ الۋ سالاسىنداعى جەڭ ۇشىنان جالعاسۋ جىل وتكەن سايىن تامىر جايىپ, تاپسىرىس بەرۋشى مەن ورىنداۋشى اراسىنداعى ىمىرالاسۋ داستۇرگە اينالىپ وتىر ەكەن. جەمقورلىققا قارسى كۇرەس قىزمەتىنىڭ ماماندارى وڭىردەگى مەملەكەتتىك ساتىپ الۋ بويىنشا جۇمىس ىستەپ وتىرعان 18 000 تاپسىرىس بەرۋشى مەن 80 000 قىزمەت كورسەتۋشىنىڭ قىزمەتىنە تالداۋ جاساعان. ناتيجەسىندە, بۇل سالاداعى ءاربىر التىنشى جۇمىس كۇدىك تۋعىزىپ وتىر. ال وبلىستاعى مەملەكەتتىك تاپسىرىس جۇيەسى بويىنشا جۇمسالعان مەملەكەت قارجىسى سوڭعى 4 جىل كولەمىندە 1,4 ترلن تەڭگەدەن 6 ترلن تەڭگەگە دەيىن كوبەيگەن.
– مەملەكەتتىك تاپسىرىس بويىنشا ورىندالعان ءاربىر التىنشى جۇمىس كۇمان تۋعىزادى. بۇل جەردە تاراپتاردىڭ ىمىرالاسىپ ءسوز بايلاسۋىنان باستاپ, تەحنيكالىق مىنەزدەمە جاساۋداعى ورەسكەل قاتەلىك, جۇمىس اتقارىلعانى جونىندەگى جالعان اكتىلەر جانە ۇسىنىلاتىن باعانى قاساقانا تومەندەتۋ, جوعارىلاتۋ سياقتى فاكتورلاردى ەسكەرۋ كەرەك. ناتيجەسىندە, وبلىستاعى مەملەكەتتىك ساتىپ الۋعا جۇمسالعان قارجىنىڭ ءبىراز بولىگى, اتاپ ايتقاندا 5 ملرد تەڭگە ماقساتسىز جۇمسالعان دەگەن قورىتىندى جاساپ وتىرمىز, – دەيدى سىبايلاس جەمقورلىققا قارسى ءىس-قيمىل اگەنتتىگى الماتى وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى جاندوس جۇماباەۆ.
ايتپاقشى, ايماقتاعى مەملەكەتتىك تاپسىرىس بويىنشا جاسالعان زەردەلەۋ بويىنشا زاڭ تالابىن ورەسكەل بۇزعان مەكەمەلەردىڭ قاتارىندا «قازاۆتوجول» ۇلتتىق كومپانياسىنىڭ وبلىستاعى فيليالى دا بار ەكەن. جالپى, بۇل مەكەمە جەمقورلىققا قارسى كۇرەس قىزمەتىنىڭ قىراعى كوزىنە بۇعان دەيىن دە ىلىككەن بولاتىن. مىسالى, وتكەن جىلدىڭ قاراشا ايىنىڭ سوڭعى شيرەگى مەن جەلتوقسان ايىنداعى تابيعات سىنىنا الماتى وبلىسىنىڭ جول جوندەۋشىلەرى توتەپ بەرە الماي قالعان ەدى. ايماقتاعى ىشكى قاتىناس جولدارىن بىلاي قويعاندا, رەسپۋبليكالىق ماڭىزى بار تراسسالاردىڭ قارى كۇرەلمەي, كوكتايعاق بولىپ جاتتى. سونىڭ كەسىرىنەن جولداردا كولىك اپاتى كوبەيىپ, ادام ءومىرىن جالماعان ونداعان وقيعا بولدى. بۇل وبلىستاعى جول جوندەۋشى ۇيىمداردىڭ قار تازارتۋ جۇمىستارىنا دايىن ەمەستىگىن كورسەتتى. ال تراسسالاردىڭ دەر كەزىندە كۇرەلمەۋىنە جاۋاپتى مەكەمەلەردەگى ارنايى تەحنيكانىڭ جەتىسپەۋشىلىگى باستى سەبەپ بولعان ەكەن.
– بۇعان دەيىن تەحنيكالاردىڭ قىسقى كەزەڭگە دايىندىعىن تەكسەرۋ ناتيجەلەرى بويىنشا جول دايىندىعىمەن اينالىساتىن «قازاۆتوجول» اق, «كازاحاۆتودور» جشس ۇيىمدارىندا ارنايى تەحنيكانىڭ جەتكىلىكسىزدىگى انىقتالعان. وسىعان سايكەس ارنايى تەحنيكالاردى الىپ, ولاردى ستاندارتقا سايكەستەندىرۋ قاجەتتىلىگى تۋرالى ۇسىنىس بەرىلگەن بولاتىن. ولارعا وبلىستىق پوليتسيا دەپارتامەنتىنىڭ قىزمەتكەرلەرى 25 جەلتوقسانعا دەيىن جول قاۋىپسىزدىگىن قامتاماسىز ەتۋ تۋرالى ەسكەرتۋ دە بەرگەن. وكىنىشكە قاراي, رەسپۋبليكالىق ماڭىزى بار اۆتوموبيل جولىنا تەحنيكالىق قىزمەت كورسەتۋمەن جانە جوندەۋمەن اينالىساتىن «كازاحاۆتودور» مەكەمەسىنىڭ بۇرىن بەرىلگەن ەسكەرتۋلەردى ورىنداماعانى جانە جولدى قىستا كۇتىپ ۇستاۋعا قويىلاتىن تالاپتاردى ساقتاماعانى انىقتالدى, – دەيدى سىبايلاس جەمقورلىققا قارسى ءىس-قيمىل اگەنتتىگى وبلىستىق دەپارتامەنتى باسشىسىنىڭ ءبىرىنشى ورىنباسارى جاندوس جۇماباەۆ.
ناتيجەسىندە, «كازاحاۆتودور» سەرىكتەستىگى اكىمشىلىك كودەكستىڭ 462-بابىنىڭ 3-تارماعىنا سايكەس ايىپتالىپ, ءىس پروتسەسسۋالدىق شەشىم قابىلداۋ ءۇشىن سوتقا جولدانعان. ياعني, وبلىس جولدارىنداعى كۇتىپ- باپتاۋعا نەمقۇرايلى قاراعانى ءۇشىن مەكەمە ەندى 500 ايلىق ەسەپ كورسەتكىشى مولشەرىندە ايىپپۇل تولەيدى.
الماتى وبلىسى