جەڭىستىڭ 75 جىلدىعىنا وراي ەلىمىزدىڭ بارلىق وڭىرلەرىندە ءتۇرلى ەستافەتالار جالعاسۋدا. وسى ايتۋلى داتا اياسىندا ءۇشىنشى مەگاپوليستەگى داڭق اللەياسىندا شىمكەنت گارنيزونى الماتى قالاسىنان داڭقتى پانفيلوۆشىلار ديۆيزياسىنىڭ جاۋىنگەرلىك تۋىنىڭ كوشىرمەسىن سالتاناتتى تۇردە قابىلداپ الدى. تۋ كوشىرمەسىن قازاقستان اسكەري-تاريحي مۋزەيىنىڭ الماتى قالاسىنداعى فيليالى ۇسىنىپ وتىر.
بۇل تاعزىم ەستافەتاسى 5 اقپان مەن 5 مامىر ارالىعىندا ەلىمىزدىڭ بارلىق وڭىرىندە جالعاسادى. ول 2018 جىلعى 28 قىركۇيەكتە دۋشانبە قالاسىندا وتكەن تمد مەملەكەت باسشىلارى كەڭەسىنىڭ شەشىمىمەن بەكىتىلگەن جەڭىستىڭ 75 جىلدىعىن مەرەكەلەۋگە باعىتتالعان نەگىزگى ءىس-شارالار جوسپارى اياسىندا وتكىزىلمەك.
تاعزىم ەستافەتاسى سوعىستا وتانىن جانقيارلىقپەن قورعاعان قازاقستاندىق جاۋىنگەرلەردىڭ ەرلىگىنە قۇرمەت كورسەتۋ, ەسىمدەرىن ەل ەسىندە ساقتاۋ ماقساتىندا ۇيىمداستىرىلعان.
ەسكە الۋعا جينالعاندار ماڭگىلىك الاۋ كەشەنىنە گۇل شوقتارىن قويىپ, ءبىر مينۋت ۇنسىزدىك جاريالادى. جيىن بارىسىندا قازاقستان ۇلتتىق ۇلانى وڭتۇستىك وڭىرلىك قولباسشىسىنىڭ ورىنباسارى, پولكوۆنيك نيازتاي الپەشوۆ پەن شىمكەنت قالاسى اكىمىنىڭ ورىنباسارى نۇرسادىق ەرگەشبەك, سوعىس جانە ەڭبەك ارداگەرلەرى ءسوز سويلەدى.
ەستافەتاعا پوليتسيا, توتەنشە جاعدايلار, قىلمىستىق-اتقارۋ جۇيەسى دەپارتامەنتى, ۇلتتىق ۇلاننىڭ وڭىرلىك قولباسشىلىقتارى, اسكەري بولىمدەرى مەن بولىنىستەرى, ءىىو مەن ۇۇ ارداگەرلەر ۇيىمى, سونداي-اق ورتا مەكتەپ وقۋشىلارى مەن اسكەري-پاتريوتتىق كلۋبتاردىڭ تاربيەلەنۋشىلەرى, ستۋدەنت جاستار, قۇقىقتىق ءتارتىپ اسكەرىنىڭ اسكەري بولىمدەرى ورنالاسقان قالالارداعى جەرگىلىكتى قوعامدىق ۇيىمداردىڭ وكىلدەرى قاتىستى.
جاۋىنگەرلىك تۋدى تابىستاۋ سالتاناتىنان سوڭ «تۇركىستان» سارايىندا «قازاقستاندىقتاردىڭ ۇلى وتان سوعىسىنداعى جەڭىسكە قوسقان ۇلەسى تۋرالى» اتتى فيلم كورسەتىلدى. باتىر بابالاردىڭ ەرلىك ىستەرى بەينەلەنگەن تۋىندى كورەرمەننىڭ كوڭىلىنەن شىعىپ, جاقسى باعاسىنا يە بولدى.
شىمكەنت