رەجيسسەر رۇستەم ءابدىراشوۆتىڭ «قازاق حاندىعى. التىن تاق» تاريحي ءفيلمى 2020 جىلعى اقپاننىڭ 26 مەن 4 ناۋرىز ارالىعىندا بانگالوردە (كارناتاكا شتاتى, ءۇندىستان) وتەتىن ءحىى-Bengaluru international film festival كينوفەستيۆالىنىڭ Asian Cinema Competition باعدارلاماسىنا قاتىسادى.
كارناتاكا شتاتى ۇكىمەتىنىڭ تاپسىرىسى بويىنشا Chalanachitra اكادەمياسى ۇيىمداستىرعان ءۇندى كينوفەستيۆالى ازيا جانە ءۇندى كينوسىنىڭ كونكۋرستىق باعدارلامالارىن قامتيدى, سونداي-اق, فەستيۆالدىڭ «الەمدىك پانوراما» سىندى كونكۋرستان تىس باعدارلاماسى شەڭبەرىندە FIPRESCI جانە NETPAC جۇلدەلەرىنىڭ جەڭىمپاز فيلمدەرىنىڭ كورسەتىلىمى ۇيىمداستىرىلادى. جىل سايىن فەستيۆالگە 50 ەلدەن 200-دەن استام فيلم قاتىسادى.
ەستەرىڭىزگە سالا كەتەيىك, «قازاق حاندىعى. التىن تاق» تاريحي كارتيناسى - «قازاق حاندىعى» تەلەحيكاياسىنىڭ ەكىنشى ماۋسىمىنىڭ كينو نۇسقاسى. بۇل اۋقىمدى تاريحي جوبا ۇلى دالا ءۇشىن كۇرەس جانە قازاق مەملەكەتىنىڭ قۇرىلۋى تۋرالى باياندايدى. تاريحي كينو ديلوگياسى ءىلياس ەسەنبەرليننىڭ «كوشپەندىلەر» تريلوگياسىنداعى العاشقى «الماس قىلىش» رومانىنا نەگىزدەلگەن.
ءفيلمدى قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسىمەن ش.ايمانوۆ اتىنداعى «قازاقفيلم» كينوستۋدياسى Centaurus Rustem Abdrashev production كومپانياسىمەن بىرىگىپ ءتۇسىردى.