اقش-تىڭ بوستون قالاسىندا ءساۋىر ايىندا ورىن العان تەراكتىگە بايلانىستى قاماۋعا الىنعان قازاقستاندىق ستۋدەنتتەر ازامات تاجاياقوۆ پەن دياس قادىرباەۆ اقتالىپ قالۋى ىقتيمال. بۇل تۋرالى RT اگەنتتىگىنىڭ ورىس بولىمشەسى حابارلادى.
«ازامات تاجاياقوۆ پەن دياس قادىرباەۆ بوستونداعى لاڭكەستىككە بايلانىستى وتكىزىلەتىن سوت ماجىلىستەرىندە وزدەرىنىڭ كىنالارى بار ەكەنىن مويىنداعىلارى كەلىپ وتىرعان جوق. ولاردىڭ ادۆوكاتتارى ايىپتاۋدىڭ نەگىزى تياناقسىز ەكەنىن, ال ايىپتالۋشىلار وزدەرىنىڭ كىنالارى جوقتىعىن مالىمدەۋدەن قايتپايتىنىن جەتكىزدى», - دەلىنگەن وندا.
«الايدا, ايىپتالۋشىلار ءوز كىنالارىن مويىنداي قالعان جاعدايدا, ولاردى وتاندارىنا قايتارۋ مۇمكىندىگى تەك جازالارىن وتەگەننەن كەيىن عانا مۇمكىن بولادى», - دەپ حابارلادى «ينتەرفاكس».
قازاقستاندىق 19 جاسار ەكى ستۋدەنتكە قۇقىق قورعاۋ ورگاندارىنا كەدەرگى كەلتىرۋ ماقساتىمەن كۇدىكتىمەن كەلىسىمگە كەلگەن دەگەن ايىپ تاعىلىپ وتىر. بۇرىن حابارلانعانداي, ولارعا دجوحار تسارناەۆتىڭ كەيىن كۇل-قوقىس اراسىنان تابىلعان نوۋتبۋك مەن فەيەرۆەرك سالىنعان ريۋكزاگىن لاقتىرىپ جىبەردى, دەگەن ايىپ تاعىلعان بولاتىن. قۇقىق قورعاۋ ىسىنە كەدەرگى كەلتىردى دەگەن جانە كەلىسىمگە كەلدى دەگەن ايىپتاۋلار بويىنشا قوس ستۋدەنتكە جالپى مولشەرى 25 جىلعا دەيىن تۇرمەدە وتىرۋ جازاسى كەسىلۋى مۇمكىن.
ەسكە سالا كەتەيىك, اعالى-ءىنىلى تامەرلان جانە دجوحار تسارناەۆتار ۇستىمىزدەگى جىلعى 15 ءساۋىر كۇنى بوستوندا وتكەن مارافوننان كەيىن جارىلىس جاساپ, ءۇش ادامنىڭ اجال قۇشۋلارىنا سەبەپ بولدى دەگەن ايىپ تاعىلعان ەدى. سوڭىنان بولعان اتىس كەزىندە تامەرلان قازا تاپتى دا, دجوحار قولعا ءتۇستى.
ايىپتاۋ قورىتىندىسىندا وسى ىسكە وراي قاماۋعا الىنعان ءۇشىنشى ادامنىڭ دا اتى اتالىپ جاتىر. ول قازاق ستۋدەنتتەرىنىڭ سىبايلاسى سانالىپ وتىرعان 19 جاسار امەريكالىق روبەل فيلليپوس كورىنەدى. جاس جىگىت فەدەرالدى تەرگەۋشىگە جالعان جاۋاپ بەردى دەگەن ايىپ تاعىلىپتى.ول سوتقا دەيىن 100 مىڭ دوللاردى كەپىلدىككە تولەپ, بوستاندىققا شىعىپتى.
سۇلتان بوزايعىر.