قىزىلوردادا ۇلىنىڭ كوز الدىندا اناسىن ءولتىرۋشى سوتتالدى

قىزىلوردادا بالاسىنىڭ كوزىنشە اناسىن ولتىرگەن 35 جاستاعى ازامات 16 جىلعا سوتتالدى. بۇل تۋرالى وبلىستىق سوتتىڭ ءباسپاسوز قىزمەتىنەن حابارلادى.

«قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى قىلمىستىق كودەكستىڭ 96-بابى 2-بولىگى «د» تارماعىمەن كىنالى دەپ تانىلعان اسا قاتىگەزدىكپەن ادام ولتىرگەن بۇل ازاماتقا قاتىستى سوت ۇكىمىن جاريا ەتتى», - دەلىنگەن حابارلامادا.

سوتتالۋشى ب. ءوزىنىڭ كورشىسى مارقۇم بولعان ازاماتشا س.-نىڭ ۇيىنە كەلىپ, قارىزعا 1500 تەڭگە اقشا سۇراعان.ءۇي يەسى تەك 500 تەڭگە عانا بەرەدى. بۇعان كوڭىلى تولماعان ب. ايەلمەن جانجالداسىپ قالادى. وسى جەردە الىمجەتتىك كورسەتكەن سوتتالۋشى ءۇي يەسىنىڭ كامەلەتكە تولماعان ۇلىن ءبىر ۇرىپ جىعىپ, اس ۇيدەن پىشاق الىپ كەلەدى. ونىمەن ءۇي يەسى ايەلدى سوعادى. وسى ساتتە اناسىنىڭ قانسىراپ جاتقانىن كورگەن ءجاسوسپىرىم قولىنا اعاش وقتاۋ الىپ, سوتتالۋشىنىڭ باسىنىڭ شۇيدە تۇسىنان ەكى-ءۇش رەت ۇرادى.

الايدا, ب. ءجاسوسپىرىمنىڭ ارەكەتىن قايتارىپ تاستاپ, جاتىن بولمەگە قاشىپ بارا جاتقان جابىرلەنۋشى قۋىپ جەتىپ, تاعى بىرنەشە رەت پىشاق سالادى.

جابىرلەنۋشى كامەلەتكە تولماعان بالاسىنىڭ كوز الدىندا ەس جيماستان قايتىس بولعان.

ءسويتىپ, سوتتالۋشى ب. اسا قاتىگەزدىكپەن باسقا ادامعا قۇقىققا قارسى قاساقانا قازا كەلتىرىپ, كىسى ولتىرگەن.

باستى سوت تالقىلاۋىندا سوتتالۋشى ب. وزىنە تاعىلعان ايىپتى ءىشىنارا مويىنداعان.

سوت ۇكىمى زاڭدى كۇشىنە ەنگەن جوق.

قۇرىش نۇرىمبەت.