بۇگىن الماتىدا وقۋشىلار اراسىنداعى رەسپۋبليكالىق عىلىمي جوبالار كونكۋرسى مارەگە جەتتى.
قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ «دارىن» رەسپۋبليكالىق عىلىمي-پراكتيكالىق ورتالىعى ۇيىتقى بولعان بايقاۋدىڭ ناتيجەسىندە جەڭىمپازداردان تۇراتىن ەلىمىزدىڭ قۇراما كومانداسى 10-15 مامىر ارالىعىندا اناحايم قالاسىندا (كاليفورنيا شتاتى) وتەتىن جىل سايىنعى ISEF-2020 وقۋشىلاردىڭ حالىقارالىق عىلىمي جوبالار كونكۋرسىنا بارادى.
كونكۋرس ۇيىمداستىرۋشىلارى الماتى قالاسىنىڭ كومانداسى, نازارباەۆ زياتكەرلىك مەكتەبى, پاۆلودار, تۇركىستان, جامبىل, شىعىس قازاقستان, قوستاناي وبلىستارى مەن الماتىداعى اباي اتىنداعى رەسپۋبليكالىق مامانداندىرىلعان دارىندى بالالارعا ارنالعان قازاق ءتىلى مەن ادەبيەتىن تەرەڭدەتىپ وقىتاتىن مەكتەپ-ينتەرناتتىڭ كوماندالارى عىلىمي جوبالارىن جاقسى قورعاپ, جوعارى ناتيجە كورسەتكەنىن اتادى.
ءتورت كۇنگە سوزىلعان بايقاۋ «عىلىمي-تەحنيكالىق پروگرەسس – ەكونوميكالىق ءوسۋدىڭ نەگىزگى بۋىنى», «ەكونوميكالىق جانە الەۋمەتتىك پروتسەستەردى ماتەماتيكالىق مودەلدەۋ», «تازا تابيعي ورتا – قازاقستان - 2050 ستراتەگياسىن ىسكە اسىرۋدىڭ نەگىزى», «قازاقستاننىڭ تاريحي ەسكەرتكىشتەرى جانە بولاشاق دامۋى بار ساياحات باعدارلارى» باعىتتارى بويىنشا ۇيىمداستىرىلدى.
كونكۋرستىڭ اشىقتىعى مەن ايقىندىلىعىن قامتاماسىز ەتۋ ماقساتىندا بارلىق سەكتسيالار ونلاين-رەجيمدە ءوتتى. بەينە-كورسەتىلىمدەرگە سىلتەمەلەر قازاقستان رەسپۋبليكاسىنىڭ بعم جانە «دارىن» رعپو-نىڭ الەۋمەتتىك جەلىلەردەگى اككاۋنتتارىندا ۇسىنىلدى.
كونكۋرستىڭ مەكتەپشىلىك كەزەڭىنە 21 604, ەكىنشى اۋداندىق كەزەڭىندە 7332 وقۋشى, وبلىستىق كەزەڭىنە 3381 وقۋشى قاتىستى. كونكۋرستىڭ اقتىق سىنىندا ەلىمىزدىڭ بارلىق ايماقتارىنان ەڭ ۇزدىك 584 جوبا ۇسىنعان 737 دارىندى وقۋشى باق سىنادى.
كونكۋرستىڭ قازىلار القاسىنىڭ شەشىمىمەن قازاقستان رەسپۋبليكاسىنىڭ بعم I دارەجەلى ديپلوم جانە التىن مەدالدارمەن 57 جەڭىمپاز, ءىى دارەجەلى ديپلوم جانە كۇمىس مەدالدارمەن 103 جۇلدەگەر, ءىىى دارەجەلى ديپلوم جانە قولا مەدالدارمەن 175 جۇلدەگەر ماراپاتتالدى.
الماتى