الماتىداعى Aspan Gallery گالەرەياسىندا ورتالىق ازيا ەلدەرىنىڭ وسى زامانعى سۋرەتشىلەرىنىڭ «Ornamentum» ۇجىمدىق كورمەسى ءوتىپ جاتىر. اتالمىش كورمەدەن شەبەرلىكتەرىن توعىستىرعان تاشكەنتتىك ديليارا كايپوۆا, بىشكەكتىك مارات رايىمكۋلوۆ, اقتوبەلىك باقىت بۋبيكانوۆا, ەلەنا مەن ۆيكتور ۆوروبەۆتاردىڭ تۋىندىلارى تورگە شىقتى.
بۇرىنعى كەڭەستىك رەسپۋبليكالارىنىڭ بىرقاتارىندا تاۋەلسىزدىك جىلدارىندا ۇلتتىق ويۋ-ورنەك گروتەسك سيپاتىنا يە بولدى. بىرەگەيلىكتى ىزدەۋ جولىندا بەينەلەۋ ونەرىندە, قولدانبالى ونەردە, ساۋلەت ونەرىندە, مەملەكەتتىك نىشان بەلگىلەردە, ونەركاسىپتىك ديزايندا ۇلتتىق ويۋ-ورنەك, ناقىشتاردى كەز كەلگەن جەردە پايدالانۋ بارىنشا بايقالادى. ەگەر ەجەلگى داۋىرلەردە ويۋ-ورنەك كيەلىلىك, كوسمولوگيالىق جانە فيلوسوفيالىق ءمان-ماڭىزعا يە بولسا, قازىر جاپپاي جانە كەيدە پارىقسىز پايدالانۋدىڭ سالدارىنان تاتىمسىزدىق سيپاتقا يە بولدى. جالعان ەتنيكالىق دەكوراتيۆتىك ستيل تۋلار مەن ەلتاڭبالاردا دا, سول سياقتى ءتىپتى ورىندىقتار مەن قوقىس سالاتىن ىدىستاردا دا كەزدەسەتىن بولدى.
ونىڭ سەبەپتەرى دە تۇسىنىكتى دە: كەڭەس وداعى ىدىراعاننان كەيىن رەسپۋبليكالار بۇرىنعى كەڭەستىك تانىمال نىشان بەلگىلەر مەن سىرتقى اتريبۋتيكادان جاڭا مەملەكەتتىڭ وزىندىك جاڭا بىرەگەيلىگى مەن جاڭا نىشان بەلگىسىنە قىسقا مەرزىمدە كوشۋگە ءتيىس بولدى. كوپ جاعدايدا تەك سىرتقى بەينەسى عانا وزگەرگەنىمەن, شىن مانىسىندە ىشكى مازمۇنى سول قالپىندا قالاتىن. ءوزىڭدى بۇرىنعى بيلىكتەن اجىراتىپ, ءبولىپ الۋ ءۇشىن زاتتاردى جاڭا ۇلتتىق تۇسكە بوياپ, ءوز ويۋ-ورنەگىڭدى قوسساڭ جەتكىلىكتى سەكىلدى كورىنگەن.
وسى جولعى كورمەدە كۇش بىرىكتىرگەن ءتورت قىلقالام شەبەرى ويۋ-ورنەكتىڭ ونەردەگى ماڭىزىنا قاتىستى ءوز كوزقاراستارىن ورتاعا سالادى: ويۋ-ورنەك مادەنيەتتەردى جاقىنداستىراتىن ءتاسىل عانا ەمەس, سونىمەن بىرگە مەديتاتسيالىق ءادىس ەكەنىن تۇسىندىرۋگە ۇمتىلعان. بۇل رەتتە ولاردىڭ شىعارماشىلىعىنداعى ويۋ-ورنەكتى تەك پلاستيكالىق فورما عانا دەپ ەمەس, بارىنشا كەڭ ماعىناسىندا ونى ونەر ارقىلى سىرتقى ۇقساستىقپەن عانا شەكتەلمەيتىن, عالامنىڭ شىنايى تابيعاتىن ونەر ارقىلى جالعاستىرۋعا دەگەن تالپىنىس دەپ تە ءتۇسىنۋ قاجەت.
ولاردىڭ شىعارماشىلىعىندا يەرارحيا جوق, بۇل جەردە بەينەلەۋ جانە قولدانبالى ونەر, داستۇرلەر مەن يننوۆاتسيالار, اسقاق ونەر مەن بۇقارالىق مادەنيەتتىڭ ءبارى ۇشتاسىپ جاتىر.