سپيدۆەي – سپورتتىڭ ەڭ كۇردەلى دە قاۋىپتى جانە شىتىرمان وقيعالى ءتۇرىنىڭ ءبىرى. ەكىنىڭ ءبىرىنىڭ جۇرەگى داۋالاي بەرمەيتىن مۇزداعى موتوجارىس قاي كەزدە دە دراماعا تولى. سونىمەن, FIM حالىقارالىق موتوتسيكل فەدەراتسياسىنىڭ قولداۋىمەن «مەدەۋ» مۇز ايدىنى مۇزداعى موتوجارىستان 2020 جىلعى الەم چەمپيوناتىنىڭ العاشقى فينالى مارەگە جەتتى.
الماتى كەزەڭىنىڭ ەكى كۇنىندە دە كوشباسشىلىق ءرولدى بەرمەگەن رەسەيلىك دانيل يۆانوۆ اينالىپ كەلگەندە اقتىق فينالدا جەڭىمپاز اتاندى. ەكىنشى ورىندى دميتري حوميتسەۆيچ يەلەنسە, ۇزدىك ۇشتىكتى دميتري كولتاكوۆ تۇيىندەدى. وسىلايشا, بيىل دا رەسەيلىك سپورتشىلار «مەدەۋ» مۇز ايدىنىندا جۇلدەلى ۇزدىك ۇشتىكتى قۇرادى.
ء«بىز قازاقستان ءۇشىن التىنشى, سونداي-اق, بەسىنشى مەرەيتويلىق فينالدىڭ اتى اڭىزعا اينالعان «مەدەۋ» مۇز ايدىنىندا وتكەنىنە قۋانىشتىمىز. FIM ترەكتىك كوميسسياسىنىڭ جوعارى تالاپتارىنا ساي جيناقتالعان تاجىريبە مەن قاجەتتى ينفراقۇرىلىم جانە «سامۇرىق-قازىنا» ۇلتتىق ءال-اۋقات قورىنىڭ ارىپتەستىك تانىتۋى, مادەنيەت جانە سپورت مينيسترلىگى مەن الماتى قالاسى اكىمدىگىنىڭ قولداۋى بىزگە FIM-مەن ىنتىماقتاستىقتى نىعايتىپ, سپيدۆەيدەن الەم چەمپيوناتىنىڭ فينالدارىن وتكىزۋ قۇقىعىن يەلەنۋگە مۇمكىندىك بەردى» دەدى قازاقستان اۆتوموتوسپورت فەدەراتسياسىنىڭ پرەزيدەنتى مارات ابىقاەۆ.
الماتىداعى الەم بىرىنشىلىگىنىڭ كەزەڭىندە جەتى ەلدەن 18 «مۇز گلادياتورى» باق سىنادى. ولاردىڭ ىشىندە گەرمانيادان ءبىر, نيدەرلاندتان ءبىر, چەحييادان ءبىر, اۋستريادان ءۇش, قازاقستاننان ءۇش جانە شۆەتسيادان ءتورت, رەسەيدەن بەس سپورتشى مۇزدى جولعا شىقتى.
مۇزداعى موتوبايگەنىڭ ەكىنشى كۇنى قىسقى سپيدۆەي شەبەرلەرى اراسىنداعى ناعىز تايتالاسپەن ەستە قالدى. «مۇز گلادياتورلارى» ءاربىر بۇرىلىستا سوپاق ءپىشىندى ترەكتە باسەكەلەسىپ, ءار ۇپاي ءۇشىن تايتالاستى. جەكسەنبىدە كۇن جىلى بولدى. بۇل جارىسقا دا, جانكۇيەرلەردىڭ كوڭىل كۇيىنە دە وڭ اسەر ەتتى.
الدىن الا كۇتكەندەي, جەكە ەسەپتەگى بىرىنشىلىكتىڭ باستى ءفاۆوريتى – رەسەيلىك موتوجارىسشىلار فينالدىق كەزدەسۋلەردىڭ قورىتىندىسى بويىنشا جۇلدەلى ورىندارعا جايعاستى. الايدا اۋستريادان, شۆەتسيادان, نيدەرلاندتان جانە گەرمانيادان كەلگەن ساڭلاقتار رەسەيلىكتەرگە دەس بەرمەي, مۇزدى جولدا بارىن سالدى. اسىرەسە, نەمىس يوحان ۆەبەر مەن شۆەتسيالىق مارتين حااراحيلتۋنەن جانە دوداداعى اكە مەن ۇل سانالاتىن نيكلاس پەن ستەفان سۆەنسسونداردى ايرىقشا اتاپ وتۋگە بولادى.
«مەدەۋدەگى» موتوجارىسقا جان ءبىتىرىپ, دراماتيزم سىيلاعان نەمىس موتوشاباندوزى يوحان ۆەبەردىڭ كەزەكتى ءبىر اينالىمنىڭ بۇرىلىسىندا موتوتسيكلىنەن قۇلاۋى كورەرمەندەردىڭ نازارىن اۋداردى. اۋستريالىق فرانتس تسورنعا سوقتىعىسقان شاباندوز جەدەل جاردەم ارباسىمەن الاڭنان اكەتىلدى. نەمىس گلادياتورىنىڭ باتىلدىعىنا كورەرمەندەر ورنىنان تۇرىپ قول سوقتى. بۇل وقيعا وسى سپورت تۇرىنە ءتان ساتتەردىڭ ءبىرى, نەمىس شاباندوزى الماتىداعى ەمحانالاردىڭ بىرىنە جاتقىزىلدى.
جيىرماسىنشى كەزەڭدە بىردەن ەكى وقيعا بولدى. الدىمەن بۇرىلىستا موتوتسيكلدى يگەرە الماي, شۆەد وۆە لەدشترەم مۇزعا قۇلادى. وسى اينالىمدا نيدەرلاندتىق دجاسپەر يۆەمانىڭ دا جولى بولمادى, ول مۇز تراسساسىنىڭ بۇرىلىسىندا موتوتسيكلمەن بىرگە سالتو جاساپ, جولدىڭ جيەگىندەگى سابان قورشاۋعا سوقتىعىسىپ قانا توقتاي الدى. قۋانىشقا وراي, ەكى وقيعادان ەشكىم اۋىر جاراقات العان جوق. دجاسپەر ءتىپتى قورىتىندى ءباسپاسوز-كونفەرەنتسياسىنا قاتىسىپ, ءوزىنىڭ ادەمى قۇلاۋىنا قاتىستى ازىلدەدى.
قازاقستاندىق شاباندوزدار ۆلاديمير چەبلوكوۆ, پاۆەل نەكراسوۆ جانە سەرگەي سەروۆ سپيدۆەيدەن جەكە الەم چەمپيوناتى فينالىنىڭ قورىتىندى كۇنىنىڭ ناتيجەسىندە فينالدا وتە المادى. قازاقستاندىقتارعا الەمدىك سپيدۆەيدىڭ شەبەرلەرىمەن يىق تەڭەستىرە كۇش سىناسۋ ازىرگە وڭايعا سوقپاۋدا.
ەكىنشى جارىس كۇنىنىڭ فينالىنا ءتورت رەسەيلىك سپورتشى دارا شىقتى, ولار – دانيل يۆانوۆ, دميتري كولتاكوۆ, يگور كونونوۆ جانە دميتري حوميتسەۆيچ. قاجىرلى كۇرەستە مارە سىزىعىن ءبىرىنشى بولىپ قازىرگى الەم چەمپيونى, ءبىرىنشى جارىس كۇنىنىڭ جەڭىمپازى دانيل يۆانوۆ كەسىپ ءوتتى.
الەم بىرىنشىلىگىنىڭ الماتىداعى كەزەڭىنە جاڭا سەرپىن اكەلگەن اۋستريالىق موتوجارىسشى حارالد سيمون بولدى. ءبىرىنشى سايىس كۇنى ۇزدىك ۇشتىكتى تۇيىندەگەن ونىڭ كوزىنە جاس العانىن ايتا كەتكەن ابزال. بۇل ونىڭ 1992 جىلدان بەرى الەم بىرىنشىلىكتەرىندەگى العاشقى جەڭىس تۇعىرى ەدى.
حالىقارالىق موتوتسيكل فەدەراتسياسى (FIM) ترەك كوميسسياسىنىڭ ديرەكتورى ارماندو كاستانيا سپيدۆەيدەن جەكە ەسەپتەگى الەم چەمپيوناتى فينالى جوعارى دەڭگەيدە ۇيىمداستىرىلعانىن اتاپ ءوتتى.
– حالىقارالىق موتوتسيكل فەدەراتسياسىنىڭ وكىلدەرى, سونداي-اق, بارلىق موتوشاباندوزدار قازاقستانداعى دودادا باعىن سىناۋعا ءاردايىم اسىق. سەبەبى مۇندا بارلىعى تياناقتى ۇيىمداستىرىلعان, قوناقجايلىقتى اتاپ وتكەنىم دە ورىندى. ءبىز الداعى ۋاقىتتا قازاقستاننىڭ اۆتوموتوسپورت فەدەراتسياسىمەن ىنتىماقتاستىقتى جالعاستىرۋعا ۇمىتتەنەمىز, – دەدى ارماندو كاستانيا.
قورىتىندى ءباسپاسوز ءماسليحاتىندا اۆتوموتوسپورت فەدەراتسياسىنىڭ پرەزيدەنتى مارات ابىقاەۆ بۇل جارىستىڭ قازاقستاندا جالعاساتىنىنا سەنىم ءبىلدىرىپ: ء«بىز كەلەسى جىلى ەلىمىزدە سپيدۆەيدەن جەكە ەسەپتەگى الەم چەمپيوناتىنىڭ كەزەكتى فينالىن وتكىزۋ تۋرالى كەلىسىمگە قول جەتكىزدىك. قازىرگى تاڭدا ءبىز ونى وتكىزۋگە ارنالعان ءۇش الاڭدى قاراستىرۋدامىز, بۇل – «مەدەۋ» مۇز ايدىنى مەن الماتىداعى «سوكول» تراسساسى, سونداي-اق, ەلوردامىز نۇر-سۇلتان قالاسىندا جارىستى وتكىزۋ جوسپارى دا بار», - دەدى.
الماتى