وبلىس اكىمى قۋانىشبەك ىسقاقوۆ وڭىردەگى زيالى قاۋىم وكىلدەرىمەن كەزدەستى. ءا.تاجىباەۆ اتىنداعى وبلىستىق كىتاپحانادا وتكەن شارادا شىعارماشىلىق سالا وكىلدەرى ەلدىڭ, ايماقتىڭ دامۋىنا, رۋحاني, مادەني ومىرىنە قاتىستى ويلارىن ورتاعا سالدى.
كەزدەسۋدە ايماق باسشىسى سىر ءوڭىرى – ەجەلگى ۇزاندار ۇنىنەن باستاۋ الاتىن ءداستۇرلى ونەر وركەن جايعان, تالاي قابىرعالى قايراتكەرلەر ءىزى قالعان, ۇلتتىق ادەبيەت پەن مادەنيەتكە تالاي دارىندى قوسقان كيەلى توپىراق ەكەنىن ايتتى.
قازاقستان جازۋشىلار وداعى قىزىلوردا وبلىستىق فيليالى جەتەكشىسى, اقىن قارشىعا ەسىمسەيىتوۆا ۇيىمنىڭ اتقارعان جۇمىستارى جايلى بايانداپ, ۇسىنىستارىن جەتكىزدى. قالادان «ادەبيەت ءۇيىن» سالۋ, سول جاعالاۋدان «رۋحانيات» اللەياسىن اشۋ مەن سىر قالامگەرلەرىن مەكتەپتەر مەن جوعارى وقۋ ورىندارى جاستارىنا تانىستىرىپ, «جازۋشى مارتەبەسى» ساباعىن تۇراقتى وتكىزىپ وتىرۋ ماسەلەسىن كوتەردى. سونىمەن قاتار بەلگىلى ساتيريك ورىنباسار الجىكتىڭ 60 جاسقا تولۋىنا وراي شىعارماشىلىق كەش وتكىزۋ ءۇشىن قولداۋ كورسەتۋدى سۇرادى. ايماق باسشىسى بۇل ۇسىنىستار سارالانىپ, ءتيىستى جۇمىستار جۇرگىزىلەتىنىن ايتتى. ورىنباسار الجىكتىڭ مەرەيتويىن بيىلعى جىلى وتكىزىلەتىن قوعامدىق-ساياسي ماڭىزدى شارالاردىڭ كۇنتىزبەلىك جوسپارىنا ەنگىزۋدى تاپسىردى.
سونداي-اق ءوڭىر باسشىسى وبلىستىق مەملەكەتتىك ارحيۆ, «سىر مەديا» جاۋاپكەرشىلىگى شەكتەۋلى سەرىكتەستىگىنە قاراستى باسىلىمدار مەن باسپاحانا, وبلىستىق ىشكى ساياسات باسقارماسىنىڭ ءدىن ماسەلەلەرىن زەرتتەۋ مەن اقپاراتتىق-تالداۋ ورتالىقتارىنىڭ جۇمىستارىمەن تانىستى. سودان سوڭ وبلىستىق كوركەمسۋرەت گالەرەياسىنداعى التىن وردانىڭ - 750, اباي قۇنانباي ۇلىنىڭ - 175 جىلدىعىنا ارنالعان «قانات جايعان رۋحانيات» اتتى كورمەنى تاماشالادى.