ەۋروپا چەمپيوناتىنىڭ قولا جۇلدەگەرى اسەت قىدىرباەۆ الماتىداعى نۇر-مۇباراك مىسىر يسلام مادەنيەتى ۋنيۆەرسيتەتىنە كەلىپ, پرورەكتور, يسلامتانۋ عىلىمى بويىنشا PhD دوكتور, دوتسەنت قايرات قۇرمانباەۆپەن كەزدەستى.
تاياۋدا پورتۋگاليا مەملەكەتىنىڭ ليسسابون كالاسىندا دجيۋ-دجيتسۋ شەبەرلەرى (IBJJF) اراسىندا ەۋروپا اشىق چەمپيوناتى وتكەن بولاتىن. الەمنىڭ 100 ەلىنەن جينالعان 5 مىڭعا جۋىق سپورتشىنىڭ ىشىندە اسەت قىدىرباەۆ قولا جۇلدەگە يە بولعان ەدى.
جەتى كۇنگە سوزىلعان دودادا ەلىمىزدىڭ نامىسىن قورعاعان اسەت قىدىرباەۆ 82,3 كەلى سالماق دارەجەسىندە گوللانديا, برازيليا, پولشا, انگليا سپورشىلارىمەن كۇش سىناسىپ, ءوز سالماعىنداعى 24 قاتىسۋشىدان دارا بولىپ, جەڭىمپازدار تۇعىرىنا كوتەرىلدى.
ەل مەرەيىن ۇستەم ەتكەن باتىردىڭ جاتتىقتىرۋشىسى – قۇتجانوۆ مارات بولسا, اسەت بەكتۇرسىن ۇلى نۇر-مۇباراك ۋنيۆەرسيتەتىندەگى «يسلامتانۋ» فاكۋلتەتىنىڭ 2013 جىلعى تۇلەگى.
كەزدەسۋ بارىسىندا «ۇستازىن ۇلىقتاي بىلمەگەن ادامنىڭ قولىنان ەشۋاقىتتا ۇلىلىق كەلمەيدى», دەگەن ءسوزدى جادىندا ساقتاعان جەڭىمپاز اسەت قىدىرباەۆ ۇستازدارىنا راحمەتىن ايتىپ, اق باتاسىن الدى.
سونداي-اق ۋنيۆەرسيتەت پرورەكتورى ق.قۇرمانباەۆ شاكىرتىن جەڭىسىمەن قۇتتىقتاي كەلە, ء«ساۋىر ايىنىڭ باسىندا ءباا وتەتىن الەم چەمپيوناتىندا باعىڭ مەن بابىڭ كەلىستى بولىپ, جەڭىس تۇعىرىنان كورەيىك!», دەپ ىزگى نيەتى مەن اق تىلەگىن ءبىلدىردى.