پرەمەر-ءمينيستردىڭ ورىنباسارى بەردىبەك ساپارباەۆ قىزمەتتىڭ باسىم باعىتتارىن ىسكە اسىرۋ ماسەلەلەرى جونىندە مادەنيەت جانە سپورت مينيسترلىگىنىڭ باسشىلىعىمەن كەزدەسۋ وتكىزدى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
كەڭەستى اشا وتىرىپ, ۆيتسە-پرەمەر ەل باسشىلىعى جاستارعا رۋحاني-ادامگەرشىلىك تاربيە بەرۋدى كۇشەيتۋ, ناقتى تاجىريبەلىك جانە يدەولوگيالىق پايدا اكەلۋى ءتيىس مادەني-بۇقارالىق ءىس-شارالاردى ساپالى وتكىزۋ مىندەتىن قويعانىن اتاپ ءوتتى.
«بيىل ۇلى اقىن اباي قۇنانباي ۇلىنىڭ 175 جىلدىعىنا, ءال-ءفارابيدىڭ 1150 جىلدىعىنا, التىن وردانىڭ 750 جىلدىعىنا جانە ۇلى وتان سوعىسىنداعى جەڭىسكە 75 جىل تولۋىنا وراي كوپتەگەن مەرەيتويلىق ءىس-شارالار وتكىزىلەدى. وسى ءىس-شارالاردىڭ بارلىعىن مۇقيات تاعى ءبىر رەت تالداپ, يدەولوگيالىق سيپاتىن ارتتىرۋ كەرەك. سونداي-اق بارلىق شىعىنداردى وڭتايلاندىرىپ, بولىنگەن قاراجاتتى حالىق يگىلىگىنە جۇمساۋ قاجەت», — دەدى ول.
بەردىبەك ساپارباەۆ بۇقارالىق سپورتتىڭ اسىرەسە جاستار اراسىندا دامۋ قارقىنى تومەن ەكەنىن اتاپ ءوتتى.
«مينيسترلىك بۇل باعىتتا وڭىرلەرمەن تىعىز بايلانىس ورناتۋى ءتيىس. كوپتەگەن ءىس-شارالار حالىقتىڭ باسىم بولىگى ءومىر سۇرەتىن وبلىستاردا وتكىزىلەتىنى ءمالىم. جىل سايىن رەسپۋبليكا بويىنشا كوپتەگەن جاڭا سپورت كەشەندەرى مەن مادەنيەت عيماراتتارى سالىنىپ جاتىر. دەگەنمەن تاجىريبە كورسەتكەندەي, سول عيماراتتاردىڭ باسىم بولىگى دەمالىس جانە مەيرام كۇندەرى, كەشكى ۋاقىتتاردا پايدالانىلمايدى. بالالارعا بوس ۋاقىتتارىندا تەگىن نەمەسە جەڭىلدەتىلگەن تۇردە ءتۇرلى ۇيىرمەلەرگە, سەكتسيالارعا, كىتاپحانالارعا, تەاترلارعا جانە باسقا دا نىساندارعا باراتىن جاعداي جاساۋ قاجەت. جاستاردىڭ جۇمىسپەن قامتىلۋىن قامتاماسىز ەتۋ – كامەلەتكە تولماعاندار اراسىندا رۋحاني-ادامگەرشىلىك تاربيە بەرۋدىڭ جانە قۇقىق بۇزۋشىلىقتىڭ الدىن الۋدىڭ ماڭىزدى اسپەكتىسى», — دەدى ب. ساپارباەۆ.
ۆيتسە-پرەمەر اۋىلدىق جەرلەردە دەنە شىنىقتىرۋ-ساۋىقتىرۋ كەشەندەرىن سالۋ, «التىن شايبا», «بىلعارى دوپ» سەكىلدى ءىرى بالالار مەن جاسوسپىرىمدەر جارىستارىن وتكىزۋ, اۋداندار مەن اۋىلداردا رەسپۋبليكالىق شىعارماشىلىق بىرلەستىكتەر مەن ۇجىمداردىڭ گاسترولدەرىن وتكىزۋ جۇمىستارىن جانداندىرۋدى تاپسىردى.
بەردىبەك ساپارباەۆ تۋريستىك يندۋستريانى دامىتۋدىڭ ماڭىزدى الەۋەتىن اتاپ ءوتتى.
«قازاقستان ىشكى ءتۋريزمدى دامىتۋ ءۇشىن دە, شەتەلدىك قوناقتاردى قابىلداۋ ءۇشىن دە ۇلكەن الەۋەتكە يە. ءبىزدىڭ ەلىمىزدىڭ اۋماعى ۇلكەن, باي تاريحي جانە مادەني مۇراسى, بىرەگەي تابيعاتى بار. الايدا ءبىز قولدا بار مۇمكىندىكتەردى تولىعىمەن پايدالانىپ جاتقان جوقپىز. نەگىزگى ماسەلە – اتالعان سالاعا ستراتەگيالىق ينۆەستورلاردى تارتۋ. ارنايى Kazakh Tourism كومپانياسىن قۇردىق, كوپ اڭگىمە بولدى, بىراق ناقتى ناتيجەلەر ازىرگە جوق», — دەدى ول.
بۇعان قوسا ۆيتسە-پرەمەر ءتىل ساياساتىن, پروتسەسسۋالدىق سپورتتى, كينو يندۋسترياسىن دامىتۋ, ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى مەن « ۇلى دالانىڭ جەتى قىرى» ماقالاسى اياسىنداعى ءىس-شارالاردى جۇزەگە اسىرۋ بويىنشا بىرقاتار ناقتى مىندەت قويدى.