الماتىدا ۇلى جەڭىستىڭ 75 جىلدىعىنا ارنالعان ء«بىز – جەڭىستىڭ مۇراگەرىمىز!» ەستافەتاسى جالعاسۋدا. ەستەرىڭىزگە سالا كەتەيىك, ىشكى ىستەر ءمينيسترى, پوليتسيا گەنەرال-لەيتەنانتى ەرلان تۇرعىمباەۆتىڭ باستاماسىمەن جۇزەگە اسىرىلعان بۇل شارا 5 مامىرعا دەيىن سوزىلادى.
ايتۋلى شارا اياسىندا الماتىداعى «الاتاۋ» ءداستۇرلى ونەر تەاترىندا ۇلى وتان سوعىسىندا ەلى مەن جەرىن جانقيارلىقپەن قورعاعان قازاقستاندىق جاۋىنگەرلەردىڭ ەرلىگىن پاش ەتىپ, ونى كەيىنگى جاستارعا ۇلگى-ونەگە ەتۋ ماقساتىندا كەرەمەت كونتسەرتتىك باعدارلاما ۇيىمداستىرىلدى.
كونتسەرتتىڭ اشىلۋ راسىمىندە ۇلتتىق ۇلان باس قولباسشىسىنىڭ ورىنباسارى گەنەرال-مايور مۇحامەتقالي ساتوۆ, ۇلتتىق ۇلان ارداگەرى گەنەرال-مايور امىربەك توگىسوۆ, الماتى قالالىق «جاس وتان» جاستار قاناتى فيليالىنىڭ توراعاسى ءمادي احمەتوۆ ءسوز سويلەپ, ۇلى وتان سوعىسى كەزىندەگى قازاقستاندىق جاۋىنگەرلەردىڭ ەرلىگى مەن تىل ەڭبەككەرلەرىنىڭ ەرەن ەڭبەگى جايىندا كەڭىنەن باياندادى.
- فاشيستىك گەرمانيا باسقىنشىلارىنا قارسى سۇراپىل سوعىستا قازاقستاننىڭ جاۋىنگەرلەرى كوزسىز ەرلىك كورسەتكەنى بارشامىزعا ءمالىم. تىلدا قارا جۇمىسقا جەگىلگەن ازاماتتارىمىزدىڭ دا ەڭبەگى ەرەن. سول اتا-اپالارىمىز, اكە-انالارىمىز, اعا-تاتەلەرىمىزدىڭ ءجۇرىپ وتكەن باتىرلىق جولىن كەيىنگى ۇرپاققا پاش ەتىپ, سول ارقىلى قازاقستاننىڭ ءاربىر ازاماتىنىڭ بويىنا وتانسۇيگىشتىك سەزىمىن ءسىڭىرىپ, جانە دە جاستاردى پاتريوتتىق رۋحتا تاربيەلەۋ ماقساتىندا بىزدەر وسى يگى باستامانى قولعا الدىق. ويتكەنى, حالىق ءوز قاھارماندارىن ەشۋاقىتتا ۇمىتپاۋى كەرەك. ولاردىڭ ەرلىگى اركەز سانامىزدا جاڭعىرىپ وتىرۋى قاجەت, - دەيدى گەنەرال-مايور مۇحامەتقالي ساتوۆ.
كونتسەرتتە قازاقستان ەستراداسىنىڭ جۇلدىزدارى مەن ۇلتتىق ۇلاننىڭ انشىلەرى قان مايداننىڭ قاھارماندارىنا ارنالعان «كاتيۋشا», ء«اليا», «جۋراۆلي», «سمۋگليانكا», سونىمەن قاتار پاتريوتتىق رۋحتى وياتاتىن «جاس قازاق», «ەل قورعانى», «مەن – قازاقپىن», «جاسا, تۋعان جەر», «اتامەكەن» جانە تاعى باسقا اندەردى شىرقادى. ال «سالتانات» بي ءانسامبلى «قازاق ءبيىن» ناقىشىنا كەلتىرىپ ورىندادى.
ءسوز ورايى كەلگەندە, وسى كونتسەرتتىك باعدارلاما الماتى قالاسى اكىمىدىگى جانە ۇلتتىق ۇلاننىڭ قولداۋىمەن وتكەنى جايىندا ايتا كەتكەن ابزال.