وبلىس ورتالىعىنان شالعايدا جاتقان مويىنقۇم اۋدانىنىڭ «ايدارلى» كەڭشارى كەشەگى كەڭەس وداعى كەزىندە 30 مىڭنان اسا قوي-ەشكى, 1 مىڭ باسقا جۋىق ءمۇيىزدى قارا ءوسىرىپ, 3 مىڭ گەكتاردان اسا جەرگە جۇگەرى, ارپا وسىرگەن ىرگەلى شارۋاشىلىق بولاتىن. الايدا كەيىن شارۋاشىلىق تاراپ, نارىق قىسپاعى بۇل اۋىلدى دا اينالىپ وتپەدى. سول جىلداردا كانالداردى قايىر باسىپ, ەگىستىككە سۋ كەلمەگەنىنە 20 جىلدان استى.
الايدا, 2018 جىلدىڭ كۇزىندە مويىنقۇم اۋدانىنىڭ اكىمدىگى سۋارمالى ەگىستىكتى قولعا الىپ, جەكە يەلىككە كەتكەن كانالداردى قايتارىپ الدى. وسىنىڭ ناتيجەسىندە 9 كانال تازالانىپ, وكرۋگ بويىنشا 1515 گەكتارعا ەگىن ەگىلدى. ديقاندارعا جەڭىلدىكپەن تۇقىم بەرىلدى. ياعني, ەل ىشىنە سۋمەن بىرگە بەرەكە كەلدى. بىتىك وسكەن جۇگەرى, ارپانى ورۋعا كومبايندار ساتىپ الىندى. الا جازدايعى ەڭبەك زايا كەتپەدى. اۋىل بويىنشا 300 گەكتارعا جۇگەرى, 140 گەكتارعا ارپا جانە باسقا دا داقىلدار ەگىلىپ, مول ءونىم الىندى. 900 گەكتار جوڭىشقا 4 مارتە ورىلدى. قازىر ايدارلىنىڭ ايداعانى بەس ەشكى ەمەس, تۇرمىسى باقۋاتتى, اۋىلداعى ءمۇيىزدى ءىرى قارا سانى 2520-عا, قوي-ەشكى 12509-عا, جىلقى 807-گە جەتتى.
ەندى ايدارلى اۋىلىنان جامبىل وبلىسىنىڭ اكىمى اسقار مىرزاحمەتوۆتىڭ «قوسالقى شارۋاشىلىق – اۋىل ادامدارىنىڭ تابىس كوزى» دەگەن ءوڭىردى دامىتۋ, ەلدىڭ ءال-اۋقاتىن ارتتىرۋ جولىنداعى باستاماسىنا 318 اۋلا قاتىسىپ وتىر. اۋىلدا 365 اۋلا بولسا, ولاردىڭ ءۇي ىرگەسىندەگى جەر كولەمى 58 گەكتار. ولار ءۇي ىرگەسىندەگى جەردىڭ 33 گەكتارىنا كارتوپ, 25 گەكتارىنا قىزاناق ەكپەك. مال, ەگىن شارۋاشىلىعىنا قاتىسۋشى اۋلالار دا از ەمەس. 2019 جىلى جۇگەرى ەككەن 4 شارۋاعا مەملەكەتتەن 138 مىڭ تەڭگە سۋبسيديا بەرىلدى. جوبانىڭ ەكىنشى باعىتى بويىنشا اۋىل حالقىنىڭ قولىنداعى ءىرىلى-ۇساقتى 2664 باس مالعا, تاعى وسىنداي 1878 باس اسىل تۇقىمدى مال ساتىپ الۋ كوزدەلىپ وتىر.
جوبانىڭ ءتورتىنشى باعىتى بويىنشا مەيىرحان شالقاربەكوۆ باسقاراتىن «ايدارلىاگرو-2019» كووپەراتيۆى ساتىپ الىناتىن تەحنيكالارعا تاپسىرىس بەرىپ قويدى.
– وتكەن جىلى ءبىزدىڭ اۋىل عانا ەمەس, اۋدانداعى ەگىستىكپەن اينالىساتىن اۋىلدار ءۇشىن جاقسى جىل بولدى. جيىرما جىلدان كەيىن اۋىلعا سۋ كەلىپ, جۇگەرى, ارپا, قاۋىن-قاربىز ەكتىك, جوڭىشقالىقتىڭ كولەمىن ۇلعايتتىق. بۇل ءۇشىن اۋدان اكىمدىگىنە العىس ايتامىز. بيىل ەگىستىك كولەمىن ۇلعايتاتىن بولامىز. اۋدانعا كومباين الىناتىنى دۇرىس بولعان ەكەن. سەبەبى بيىل ارپا ەگۋشىلەر كوپ بولادى, – دەيدى بۇل جونىندە ەڭبەك ارداگەرى بۇيەنباي قوزيەۆ.
ەندى بەرەكەلى اۋىلدىڭ تۇرعىندارى ارىقتاردى, ۇلكەن كانالدى تازالاۋ تۋرالى باستاما كوتەرۋدە. ال مويىنقۇم اۋدانىنىڭ اكىمى مادەن مۇساەۆ اۋىل تۇرعىندارىمەن وتكەن كەزدەسۋدە الداعى ۋاقىتتا ايدارلىدا 90 ورىندىق كلۋب سالىنىپ, ءبىر كوشە اسفالتتالىپ, 2 كوشەگە جارىق ورناتىلاتىنىن ايتتى.
سۇندەتۋللا ءابىلوۆ,
جۋرناليست
جامبىل وبلىسى