بۇگىن ماجىلىستە سىبايلاس جەمقورلىققا قارسى ءىس-قيمىل ماسەلەلەرىنە قاتىستى زاڭنامالىق تۇزەتۋلەردىڭ تانىستىرىلىمى ءوتتى. بۇل تۋرالى پارلامەنت ءماجىلىسىنىڭ ءباسپاسوز قىزمەتى حابارلادى.
ءىس-شاراعا مەملەكەتتىك ورگاندار, رەسپۋبليكالىق ادۆوكاتتار القاسى, قازاقستاننىڭ زاڭگەرلەرى وداعىنىڭ, «اتامەكەن» ۇكپ وكىلدەرى قاتىستى.
وتىرىستى اشقان ءماجىلىس دەپۋتاتى, حالىقارالىق ىستەر, قورعانىس جانە قاۋىپسىزدىك كوميتەتىنىڭ مۇشەسى جانات جاراسوۆ الەمنىڭ ەڭ باسەكەلەستىككە قابىلەتتى 30 ەلىنىڭ قاتارىنا كىرۋ بويىنشا باعدارلاماسىن جاريالاعان كەزدە قازاقستاننىڭ تۇڭعىش پرەزيدەنتى – ەلباسى ن.ءا.نازارباەۆ ءبىزدىڭ ەلىمىزدە جەمقورلىقتى ۇلتتىق قاۋىپسىزدىككە تونگەن تىكەلەي قاتەرگە جاتقىزىپ مەملەكەت پەن قوعام وعان قارسى كۇرەسەتىن ءبىر كۇش بولۋ قاجەتتىلىگى تۋرالى باسا ايتقانىن اتاپ ءوتتى. دەپۋتات مەملەكەت باسشىسى قاسىم-جومارت توقاەۆ تا «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان رەسپۋبليكاسى پارلامەنتىنىڭ VI شاقىرىلىمى بەسىنشى سەسسياسىنىڭ اشىلۋىنداعى جولداۋىندا سىبايلاس جەمقورلىقپەن جان-جاقتى كۇرەسۋ ماسەلەسى كۇن تارتىبىنەن تۇسپەگەنىن ايتتى.
زاڭ جوباسىنىڭ نەگىزگى ەرەجەلەرى تۋرالى سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى ولجاس بەكتەنوۆ باياندادى. ايتۋىنشا, زاڭ جوباسىندا تۇزەتۋلەردىڭ ءۇش بلوگى قاراستىرىلعان. ولار: سىبايلاس جەمقورلىق كورىنىستەردىڭ جۇيەلىك الدىن-الۋ بويىنشا قوسىمشا شارالار ەنگىزۋ, ولقىلىقتار مەن كولليزيالاردى جويۋ, سونىمەن قاتار, ۇلتتىق بيۋرونى سىبايلاس جەمقورلىققا قارسى ءىس-قيمىل اگەنتتىگىنە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى فۋنكتسيالارىنىڭ بەرىلۋى تۋرالى تۇزەتۋلەر.
اتاپ ايتقاندا:
مەملەكەتتىك قىزمەتكەرلەرگە قۇنى كەز-كەلگەن سىيلىق سىيلاۋعا تىيىم سالۋ بەكىتىلەدى;
مەملەكەتتىك بيۋدجەتتەن جانە ۇلتتىق قوردان قارجىلاندىرىلاتىن جوبالاردى ىرىكتەۋ مەن ىسكە اسىرۋعا جاۋاپتى, دەربەس قۇرىلىمدىق بولىمشەنىڭ باسشىسىنان تومەن ەمەس لاۋازىم اتقاراتىن كۆازيمەملەكەتتىك سەكتور سۋبەكتىلەرىنىڭ ساتىپ الۋدى ۇيىمداستىرۋ مەن وتكىزۋ جونىندەگى شەشىمدەر قابىلداۋعا ۋاكىلەتتى قىزمەتكەرلەرىن سىبايلاس جەمقورلىق سۋبەكتىلەرىنە جاتقىزۋ ۇسىنىلادى;
مەملەكەت باسشىسى قاتىسقان سىبايلاس جەمقورلىققا قارسى ءىس-قيمىل ماسەلەلەرى جونىندەگى 2019 جىلعى 20 مامىرداعى كەڭەستە ايتىلعان جانە بىرلەسىپ ماقۇلدانعان سىبايلاس جەمقورلىققا قارسى ءىس-قيمىل جونىندەگى ۇسىنىستاردى ىسكە اسىرۋ ماقساتىندا, كۆازيمەملەكەتتىك سەكتور ۇيىمدارىندا پاراساتتىلىقتىڭ كورپوراتيۆتىك ستاندارتتارىن ساقتاۋعا جاۋاپتى سىبايلاس جەمقورلىققا قارسى كومپلاەنس-قىزمەتتەر ينستيتۋتى ەنگىزىلەدى;
«سىبايلاس جەمقورلىققا قارسى ءىس-قيمىل جونىندەگى ۋاكىلەتتى ورگان» ۇعىمى, سونداي-اق سىبايلاس جەمقورلىققا قارسى قىزمەتتىڭ ۆەدومستۆولىق باعىنىستىلىعىنا قاتىستى باپتار ناقتىلاندى.
زاڭ جوباسىمەن 3 كودەكسكە (ازاماتتىق, قىلمىستىق, «اكىمشىلىك قۇقىق بۇزۋشىلىق تۋرالى»), 7 زاڭعا («ۇلتتىق ارحيۆ قورى جانە ارحيۆتەر تۋرالى», «قۇقىق قورعاۋ قىزمەتى تۋرالى», «مەملەكەتتىك م ۇلىك تۋرالى», «قازاقستان رەسپۋبليكاسىنىڭ ارناۋلى مەملەكەتتىك ورگاندارى تۋرالى», «اسكەري قىزمەت جانە اسكەري قىزمەتشىلەردىڭ مارتەبەسى تۋرالى», «سىبايلاس جەمقورلىققا قارسى ءىس-قيمىل تۋرالى», «قازاقستان رەسپۋبليكاسىنىڭ مەملەكەتتىك قىزمەتى تۋرالى») وزگەرىستەر مەن تولىقتىرۋلار ەنگىزىلەدى. باياندامادان اياقتالعاننان كەيىن ءماجىلىس دەپۋتاتتارى و.بەكتەنوۆكە سۇراقتار قويىپ, جاۋاپ الدى.
زاڭ جوباسى بويىنشا تالقىلاۋ ودان ءارى دەپۋتات جانات جاراسوۆ جەتەكشىلىك ەتەتىن جۇمىس توبىندا جالعاسادى.