ساحنا قاراڭعىلىعىن توبەدەن سەبەزگىلەي قۇيىلعان جارىق سەيىلتتى. اقىن ولەڭدەرىن كەزەكتەسە وقىپ ورتاعا شىققان اكتەرلەر كورەرمەنىن ءا دەگەننەن وزىنە ەلىتىپ الا جونەلدى. سەبەبى زالداعى ءار ادامعا بۇل شۋماقتار ءارى اسا تانىس, ءارى سونداي جاقىن ەدى...
ادام بولسا سەزىم مەن سەنىم ىزدەر,
كەلىڭىزدەر, بەرى قاراي ەنىڭىزدەر.
مەنىڭ بايتاق الەمىم – پلانەتامدى
كورىڭىزدەر, ارالاپ كەلىڭىزدەر!
وسىلاي دەپ ولەڭ-ءومىرىن جىرعا قوسا ساحناعا شىققان اقىن الەمىنىڭ جۇمباققا تولى شەتسىز-شەكسىز كەڭىستىگى بىرتىندەپ كورەرمەن كوڭىلىنە دە قۇيىلا بەرگەندەي...
فاريزا جىرىمەن سۋسىنداۋعا جينالعان وقىرمان جانارىنان وسىنداي ءبىر وتتى بايقادىق. ءيا, بۇگىنگى كەش بۇرىنعىلاردان وزگەرەك. وزگەرەك بولۋىنىڭ سەبەبى – پوەزيا پاديشاسى فاريزا وڭعارسىنوۆا جىرلارى تۇتاس قويىلىم وزەگىندە ءورىلىپتى. قازاقستاننىڭ ەڭبەك سىڭىرگەن قايراتكەرلەرى بولات ۇزاقوۆ پەن نۇرلان جۇمانيازوۆتىڭ رەجيسسەرلىگىمەن ساحنا تورىنە شىققان «سەنىڭ ماحابباتىڭ» اتتى پوەتيكالىق قويىلىم بىزگە اقىن الەمىمەن سىرلاسۋ سىيىن تارتۋ ەتتى.
– فاريزا اپامىزدىڭ 80 جىلدىق مەرەيتويى بىلتىر ەلىمىزدىڭ تۇكپىر-تۇكپىرىندە اسا جوعارى دەڭگەيدە اتالىپ ءوتتى. اقىن رۋحىنا تاعزىم ەتۋدى مۇرات تۇتقان ءتۇرلى ءىس-شارالار فاريزا الەمىنە جاڭا, سونى تىنىس سىيلاعانداي بولدى. وسى ايتۋلى وقيعاعا وراي ءبىز دە – ق.قۋانىشباەۆ اتىنداعى قازاق مەملەكەتتىك اكادەميالىق مۋزىكالىق دراما تەاترىنىڭ ۇجىمى سول كەزدىڭ وزىندە-اق شىعارماشىلىق ىزدەنىستەرىن جۇيەلەپ قويعانىمەن, قويىلىمنىڭ جارىققا شىعۋ ءساتى بۇگىنگە بۇيىرىپتى. كوزى تىرىسىندە فاريزا اپامىز ءبىزدىڭ تەاترمەن وتە تىعىز شىعارماشىلىق قارىم-قاتىناستا بولدى. بىرنەشە پەساسى ساحنالانىپ, ا.دۋدارەۆتىڭ «كەش» دراماسى اقىن اۋدارماسىندا كورەرمەنىنە جول تارتقان ەدى. سوندىقتان بولسا كەرەك, ءبىز اپامىزدى تەك ولەڭدەرى ارقىلى عانا ەمەس, جەكەلەي تانىپ, تۇلعالىق بولمىسىن بىلگەننەن كەيىن دە اقىن الەمىن ونەر تىلىندە ورنەكتەپ كورگىمىز كەلدى. فاريزا بەينەسىن ساحناعا شىعارعاندا باستى ءرولدى وينايتىن اكتريسادان سىرتقى ۇقساستىق ەمەس, ەڭ باستىسى وي, جان ەركىندىگىن العا شىعارۋىن تالاپ ەتتىك. سول نەگىزدە اقىن فيلوسوفياسىنىڭ جۇمباعىنا بويلاۋدى ماقسات تۇتتىق, – دەيدى قويىلىمنىڭ تەڭ رەجيسسەرى بولات ۇزاقوۆ.
قوس رەجيسسەر قيالى قانات بىتىرگەن تۋىندى باس-اياعى ءتورت بولىمگە جۇيەلەنىپتى. اقىننىڭ بالالىق شاعىنان, جاستىق شاعىنا, كەيىنگى ەسەيگەن كەزەڭى مەن جالپى فيلوسوفياسىنا رەتىمەن اۋىسىپ وتىراتىن وقيعا جەلىسى كورەرمەنىنە اقىن ءومىرىن كەزەڭ-كەزەڭىمەن بايان ەتتى. پوەتيكالىق قويىلىمدا فاريزا بەينەسىن قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى التىناي نوگەربەك وينادى. اقىننىڭ اناسى قازاقستاننىڭ ەڭبەك سىڭىرگەن قايراتكەرى باقىت يسابەكوۆانىڭ كەيىپتەۋىندە كورەرمەنىمەن قاۋىشتى. اتالعان كەيىپكەرلەردەن بولەك, كوپشىلىك ساحنادا باقىت جۇماعۇلوۆا, قۋاندىق قىستىقباەۆ, ەرجان نۇرىمبەت, اينۇر بەرمۇحامبەتوۆا, سىرىم قاشقاباەۆ, جانىبەك مۇساەۆ, سايا توقمانعاليەۆا باستاعان تەاتردىڭ جەتەكشى اكتەرلەرىمەن بىرگە, جاس ساحناگەرلەر دە ءساتتى ونەر كورسەتتى.
– فاريزا اپامىزدىڭ ولەڭدەرىن بارلىعى ءسۇيىپ وقيدى عوي. فاريزا – حالىقتىڭ اقىنى. ارقايسىمىزدىڭ جۇرەگىمىزدە, جانىمىزدا ءوز فاريزامىز ءومىر سۇرەدى. فاريزا الەمى, اسىرەسە, نازىكجاندى وقىرماننىڭ جانىنا ەرەكشە جاقىن. سوندىقتان دا بولار, ءاۋ باستا, جۇمىس قولعا الىنا باستاعان كەزدە-اق اكتەرلەر ءبىراۋىزدان اتالعان قويىلىمنىڭ پەسا ەمەس, تازا پوەزياعا قۇرىلعانىن قالادىق. وسى تىلەگىمىزدى ەسكەرگەن رەجيسسەرلەر ولەڭمەن ورنەكتەلىپ, انمەن كومكەرىلگەن بۇگىنگى قويىلىمدى ومىرگە اكەلدى. ويتكەنى فاريزا اقىننىڭ بار بولمىسى ولەڭىندە جاتىر عوي. سوندىقتان قويىلىمدا اقىن شىعارماشىلىعىنىڭ العاشقى كەزەڭدەرى, ياعني تىرناقالدى تۋىندىلارىنان باستاپ كەمەلدەنگەن, ءتىپتى ءومىرىنىڭ سوڭعى كەزدەرىندە جازعان ولەڭدەرىن بارىنشا قامتۋعا تىرىستىق. ءسوز جەتپەگەن جەردى مۋزىكامەن, اۋەزدى انمەن كومكەرۋگە تالپىندىق. ودان كەيىن كورەرمەندەرىمىزدىڭ دەنى جاستار ەكەنىن ەسكەرىپ, ماحاببات بولىمىنە بارىنشا كوبىرەك ولەڭ مەن ءان قوستىق. بۇل قويىلىمدا وقىلعان ولەڭ دە, ورىندالعان ءان دە, ءتىپتى مەنىڭ اۋزىممەن ايتىلاتىن اڭگىمەلەۋ جانرىنداعى وي-ەستەلىكتەر دە تولىعىمەن فاريزا اپامىزدىڭ ءوز شىعارماشىلىعىنان, كۇندەلىگىنەن, ەستەلىكتەرىنەن الىندى. ءبىز ويدان ەشتەڭە دە قوسقان جوقپىز. بارلىعى اقىننىڭ وزىنە تيەسىلى, – دەيدى اكتريسا التىناي نوگەربەك.
راس, اقىن مەرەيتويى قارساڭىندا رەسپۋبليكامىزدىڭ تۇكپىر-تۇكپىرىندە ساحنا تورىنە شىققان پوەزيا پاديشاسى تۋرالى قويىلىمداردىڭ سانىندا ەسەپ بولمادى. تالاي تاعىلىمدى دۇنيە كورەرمەنىن قۋانتتى. فاريزاتانۋ ىلىمىنە دراماتۋرگيا باعىتىندا جاڭاشا جول اشتى. ونىڭ ءبىرازىن كورىپ تە ۇلگەردىك. سونداعى بايقاعانىمىز – ءار تەاتر ءوزى تانىپ, زەردەلەگەن فاريزاسىن تۋدىرۋعا تىرىسقاندىعى. سوندىقتان دا بولسا كەرەك, بۇگىنگى ءبىز كۋا بولعان ەلوردالىق تەاتر ۇسىنعان اقىن الەمى دە ءوز ورنەگىمەن ەستە قالدى. شىمىلدىق جابىلعان سوڭ دا قويىلىم اسەرىنەن ارىلماعان كورەرمەن كوڭىلدە جاتتالعان فاريزا ولەڭدەرىن كۇبىرلەي وقىپ ەسىكتى بەتكە الدى. بۇل – پوەزياعا دەگەن ماحاببات, سۇيىكتى اقىنىنا دەگەن حالقىنىڭ ولمەيتىن ماڭگىلىك ساعىنىشى ەدى...