الماتىنىڭ الاتاۋ اۋدانىندا تاعى ءبىر قۇجاتتاندىرۋ سەكتورى جۇمىس ىستەي باستادى. وتكەن اپتانىڭ سوڭىندا ازاماتتارعا ارنالعان ۇكىمەتتىڭ الماتى قالاسى الاتاۋ اۋداندىق ەكىنشى مايدان-كەڭسەسىندە قۇجاتتاندىرۋ سەكتورى اشىلعان بولاتىن.
الماتى قالاسىندا ساناۋلى جىلدار ىشىندە ساۋلەتتى ۇيلەرى ساپ تۇزەپ, ەكونوميكاسى ەڭسە تىكتەگەن جاس اۋداننىڭ ءبىرى - الاتاۋ اۋدانى. اۋدان حالقىنا مەملەكەتتىك قىزمەتتەر كورسەتەتىن ورتالىق اتلەتيكالىق قالاشىقتا ورنالاسقان. الايدا, كۇن ساناپ ءوسىپ جاتقان اۋدان حالقىنىڭ سۇرانىسى ەسكەرىلىپ, تاعى دا ءبىر مايدان-كەڭسە (حقو) ىسكە قوسىلعان. وتكەن جىلى تامىز ايىندا جوندەۋدەن ءوتىپ قايتا قوسىلعان ايگەرىم-1 ىقشام اۋدانى, ۆ.بەنبەرين, 89 مەكەن جايىنداعى ەكىنشى مايدان-كەڭسە, كۇنىنە 200-300 ادامعا قىزمەت كورسەتۋدە. بولىمدە وزىنە ءوزى قىزمەت كورسەتۋ سەكتورى ارقىلى تۇرعىندار ەلەكتروندىق قىزمەتتەر الىپ, تسيفرلىق ساۋاتتىلىعىن ارتتىرا الادى.
ء«بىراز ۋاقىتتان بەرى اۋداننىڭ 250 مىڭنان اسا تۇرعىنى مەن قوناقتارىنىڭ قۇجاتتاندىرۋ سۇرانىسىن قاناعاتتاندىراتىن تاعى دا ءبولىم اشۋ قاجەتتىلىگى تۋىنداعان بولاتىن. حالىققا ىڭعايلى بولۋ ءۇشىن سەكتوردى الاتاۋ اۋدانىنداعى ەكىنشى فرونت-وفيستەن اشىپ وتىرمىز», – دەيدى «ازاماتتارعا ارنالعان ۇكىمەت» مك كەاق الماتى قالاسى فيليالىنىڭ ديرەكتورى دانيار قىرىقباەۆ.
قۇجاتتاندىرۋ سەكتورى بيىلعى 30 قاڭتاردان بەرى جۇمىس ىستەي باستادى. ەندى اۋدان تۇرعىندارى الىسقا بارماي, ازاماتتارعا ارنالعان ۇكىمەتتىڭ الاتاۋ اۋداندىق ەكىنشى بولىمىندە جەكە كۋالىك, شەتەلدىك تولقۇجاتتار راسىمدەپ, تۇرعىلىقتى جەرى بويىنشا جانە ۋاقىتشا تىركەۋگە تۇرا الادى. نەمەسە وزىنە ءوزى قىزمەت كورسەتۋ سەكتورى ارقىلى ونلاين تىركەلە الادى.
ەستەرىڭىزگە سالا كەتسەك, وتكەن جىلعى تامىز ايىنان جىل سوڭىنا دەيىن ءبولىمنىڭ وزىنە ءوزى قىزمەت كورسەتۋ سەكتورىندا 132 713 قىزمەت الىنعان.