دەنساۋلىق ساقتاۋ مينيسترلىگى تاۋارلار مەن قىزمەتتەر قاۋىپسىزدىگىنىڭ ساپاسىن باقىلاۋ كوميتەتى توراعاسىنىڭ ورىنباسارى نۇرقان سادۋاقاسوۆ ۋحاننان جەتكىزىلگەننەن كەيىن كارانتينگە جاتقىزىلعان ستۋدەنتتەردىڭ جاعدايىن ايتىپ بەردى.
«ۋحاننان چارتەرلىك رەيسپەن جەتكىزىلگەننەن كەيىن كارانتينگە 83 قازاقستاندىق جاتقىزىلدى. ونىڭ ىشىندە 80 ستۋدەنت بار. ولاردىڭ بارلىعى نۇر-سۇلتان قالاسىنداعى كوپبەيىندى اۋرۋحاناعا ورنالاستىرىلدى. اۋرۋحانا جاڭا, جوعارى قاۋىپسىزدىك جۇيەسىمەن جابدىقتالعان. ءاربىر قاباتتاعى پالاتالاردىڭ دەربەس جەلدەتۋ جۇيەسى بار. بۇل وتە جاقسى جۇيە – «تازا ءۇي-جاي» دەپ اتالادى. ول اۋانىڭ ارالاسۋىنا جول بەرمەيدى. اۋا پالاتادان دالىزگە جانە كەرى باعىتتا شىقپايدى», دەدى ن.سادۋاقاسوۆ. ونىڭ ايتۋىنشا, ۇشاق بورتىندا دارىگەرلەر تاعى ءبىر مارتە تەرمومەتريا جۇرگىزىپ, جولاۋشىلاردىڭ قىزۋىن ولشەگەن. «ياعني ۇشاقتا ولارمەن بىرگە سانيتارلىق اۆياتسيانىڭ دارىگەرلەرى مەن دارىگەر-ەپيدەميولوگ بولدى. ءبىر ايەلدە 37,2 گرادۋس دەنە قىزۋى بولدى. بىراق قانداي دا ءبىر سىرتتاي بەلگىلەرى (كوروناۆيۋرس بەلگىلەرى) انىقتالعان جوق. ولار 2,3 جانە 4 ورىندىق پالاتالارعا ورنالاستىرىلدى, جاعدايلارى جانە تاماقتارى وتە جاقسى. جۇكتەرى وڭدەلگەننەن كەيىن ساقتاۋ قويماسىنا تاپسىرىلدى», دەدى ول.
دارىگەردىڭ سوزىنە قاراعاندا, كوپبەيىندى اۋرۋحانانىڭ ينفەكتسيالىق بلوگى ءبىر-بىرىنەن وقشاۋلانعان. «قازاقستاننىڭ بارلىق قالالارىنىڭ, نەگىزىنەن نۇر-سۇلتان, الماتى, شىمكەنت, اقتاۋ, سەمەي, قاراعاندى وڭىرلەرىنىڭ بالالارى. ولار ءبىزدىڭ تالاپتارىمىزبەن كەلىسىپ وتىر. سەبەبى ول جاقتا دا ءدال وسىنداي تالاپ بولعان. ولار ينفەكتسيالىق بلوكتىڭ وقاشاۋلاندىرىلعان پالاتالارىندا جاتىر, دالىزگە شىقپايدى. بارىنشا قاۋىپسىزدىك شارالارىن قابىلداۋعا مىندەتتىمىز», دەدى ن.سادۋاقاسوۆ.
ال نۇر-سۇلتان قالالىق كوپبەيىندى مەديتسينالىق ورتالىعى ينفەكتسيالىق بلوگى ديرەكتورىنىڭ ورىنباسارى ساۋلە اتىعاەۆا كارانتيندە جاتقان ادامداردىڭ جاعدايى جونىندە اڭگىمەلەدى. «پاتسيەنتتەردىڭ جاعدايى كەشە تاڭەرتەڭ قاناعاتتانارلىق بولدى. ولاردىڭ تاراپىنان ايتارلىقتاي شاعىم جوق. ينتوكسيكاتسيا بەلگىلەرى بايقالمايدى, تىنىس الۋلارىندا كەمشىلىك جوق, دەنە قىزۋلارى شەكتى نورمادا. مەديتسينالىق قاداعالاۋ ينكۋباتسيالىق كەزەڭ بويىنا جالعاسادى. بۇل جەردە جاتقان پاتسيەنتتەردىڭ باسىم بولىگى كوروناۆيرۋس ينفەكتسياسىنىڭ تارالۋى جوعارى ايماقتا بولعان», دەدى دارىگەر.
اۋرۋحانادا جاتقان پاتسيەنتتەردىڭ ءبىرى جۋرناليستەرمەن اڭگىمەلەسۋگە كەلىسىم بەردى. ونىڭ ايتۋىنشا, پاتسيەنتتەردىڭ تەلەفوندارى دا وزگە زاتتارمەن بىرگە وڭدەۋ ءۇشىن الىنعان. دەگەنمەن, اۋرۋحانانىڭ ستاتسيونارلىق تەلەفونى ارقىلى بايلانىسۋعا مۇمكىندىك بار.
«2016 جىلدان بەرى ۋحان قالاسىندا بولدىم. 22 قاڭتاردا قالادا كارانتين جاريالانعان كەزدە 100-دەن استام ادام بولعان ەدىك. مەن جانە تاعى ەكى ستۋدەنت ەۆاكۋاتسيالاۋ بويىنشا وپەراتسيانى ۇيلەستىرۋگە كومەك بەردىك. ەۆاكۋاتسيالاۋ جوسپارىن ءبىر اپتا بويى دايىندادىق. سەبەبى ناقتى شەشىم بولعان جوق. سوڭعى ۋاقىتقا دەيىن قىتاي وزگە ەلدەرگە اۋە كەڭىستىگىن پايدالانۋعا رۇقسات بەرمەدى», دەدى ۋحاننان كەلگەن قازاقستاندىق ستۋدەنت. ول اۋرۋحانادا جاتقان ادامداردىڭ تۋعان-تۋىستارىنا الاڭداماۋدى ءوتىنىپ, بارلىعىنىڭ جاعدايى جاقسى ەكەنىن ايتتى. «ۇزاق ۋاقىت قىتايدا بولعان بالالار ءوز نومىرلەرىن تىركەپ ۇلگەرمەدى جانە قازاقستانعا كەلگەننەن كەيىن ولاردىڭ ءنومىرى ءوشىپ تۇر. اتا-انالارى ەۆاكۋاتسيالاۋ جوسپارىنا ساي قازاقستانعا كەلگەنىمىزدى بىلەدى. بىراق كىم قاي پالاتادا ەكەنىن بىلمەيمىز», دەدى ستۋدەنت قىز.
ءسوز سوڭىندا ول قولداۋ كورسەتكەن مەملەكەت باسشىسىنا جانە وتانداستارىنا ريزاشىلىعىن ءبىلدىردى. «قۇرمەتتى قازاقستان حالقى! ءبىز بارلىعىمىز وتانىمىزعا ورالدىق جانە دارىگەرلەردىڭ تۇراقتى باقىلاۋىندامىز. بىزدە ءبارى جاقسى. ءبىز ءۇشىن شىن نيەتىمەن الاڭداۋشىلىق تانىتقان بارلىعىڭىزعا راحمەت», دەدى ول.