الماتىدا سپيدۆەيدەن الەم چەمپيوناتىنىڭ العاشقى فينالى ءوتتى

الماتى كەزەڭىنىڭ ەكى كۇنىندە دە توپ جارعان رەسەيلىك شاباندوز دانيل يۆانوۆ دودا جەڭىمپازى اتاندى. تارتىستى سايىستا ەكىنشى ورىندى ونىڭ جەرلەسى دميتري حوميتسەۆيچ يەلەنسە, ۇزدىك ۇشتىكتى دميتري كولتاكوۆ تۇيىندەدى. وتكەن جىلداعىداي, بيىل تاعى دا رەسەيلىك سپورتشىلار «مەدەۋ» مۇز ايدىنىندا جۇلدەلى ۇزدىك ۇشتىكتى قۇرادى.

«سپيدۆەي – موتوتسيكل سپورتىنىڭ ەڭ كۇردەلى جانە قاۋىپتى, سونىمەن قاتار شىتىرماندىلىققا تولى ديستسيپلينالارىنىڭ ءبىرى. ءبىز قازاقستان ءۇشىن التىنشى, سونداي-اق بەسىنشى مەرەيتويلىق فينالدىڭ اتى اڭىزعا اينالعان «مەدەۋ» مۇز ايدىنىندا وتكەنىنە قۋانىشتىمىز. FIM ترەكتىك كوميسسياسىنىڭ جوعارى تالاپتارىنا جاۋاپ بەرەتىن جيناقتالعان تاجىريبە مەن قاجەتتى ينفراقۇرىلىم جانە باس ارىپتەس «سامۇرىق – قازىنا» ۇلتتىق ءال-اۋقات قورىنىڭ, مادەنيەت جانە سپورت مينيسترلىگى مەن الماتى قالاسى اكىمدىگىنىڭ قولداۋى بىزگە FIM-مەن ىنتىماقتاستىقتى نىعايتۋعا جانە سپيدۆەيدەن الەم چەمپيوناتىنىڭ فينالدارىن وتكىزۋ قۇقىعىن يەلەنۋگە مۇمكىندىك بەردى», – دەدى اۆتوموتوسپورت فەدەراتسياسىنىڭ پرەزيدەنتى مارات ابىقاەۆ.

الماتىداعى الەم بىرىنشىلىگىنىڭ كەزەڭىندە جەتى ەلدەن كەلگەن بارلىق سانى 18 «مۇز گلادياتورى» باق سىنادى. ولاردىڭ ىشىندە رەسەيدەن بەس شاباندوز, گەرمانيادان ءبىر موتوجارىسشى, نيدەرلاندتان ءبىر, شۆەتسيادان ءتورت, چەحيادان ءبىر شاباندوز, اۆستريادان ءۇش جانەقازاقستانننان ءۇش شاباندوز مۇزدى جولعا شىقتى.

جارىستىڭ ەكىنشى كۇنى ءداستۇرلى تۇردە 20 ىرىكتەۋ تۋرى, ەكى جارتىلاي فينال جانە ءبىر فينالدىق كەزەڭدەردەن تۇردى. ءاربىر جارىسقا ءتورت شاباندوز قاتىستى. قاشىقتىق – 4 اينالىم. مارەگە ءبىرىنشى بولىپ كەلگەن شاباندوز ءۇش ۇپايدى, ەكىنشىسى – ەكى ۇپايدى, ءۇشىنشىسى – ءبىر ۇپايدى يەلەنسە, ءتورتىنشى ورىنعا ۇپاي بەرىلمەدى.

مۇزداعى موتوبايگەنىڭ ەكىنشى كۇنى قىسقى سپيدۆەي شەبەرلەرى اراسىنداعى ناعىز تايتالاسپەن ەستە قالدى. «مۇز گلادياتورلارى» ءاربىر بۇرىلىستا سوپاق ءپىشىندى ترەكتە باسەكەلەسىپ, ءار ۇپاي ءۇشىن تايتالاستى. جەكسەنبى كۇنى جىلى كۇن رايى ورىن الدى, بۇل جارىسقا دا, جانكۇيەرلەردىڭ كوڭىل-كۇيىنە دە وڭ اسەر ەتتى. وڭتۇستىك استانانىڭ تۇرعىندارى مەن قوناقتارى وسى جارىستاردىڭ كوز تارتارلىق قىزىعىمەن قۋاتتىلىعىنا ءتانتى بولدى. ولار قازاقستاندىق سپورتشىلار مەن جارىس كوشباسشىلارىنا بەلسەندى تۇردە قولداۋىن ايامادى.

الدىن-الا كۇتكەندەي, جەكە ەسەپتەگى بىرىنشىلىكتىڭ باستى ءفاۆوريتى – رەسەيلىك موتوجارىسشىلار فينالدىق كەزدەسۋلەردىڭ قورىتىندىسى بويىنشا جۇلدەلى ورىندارعا جايعاستى. الايدا, اۆستريادان, شۆەتسيادان, نيدەرلاندتان جانە گەرمانيادان كەلگەن شاباندوزدار رەسەيلىكتەرگە باسەكەلەستىك تانىتىپ, مۇزدى جولدا بارىن سالدى. اسىرەسە, نەمىس شاباندوزى يوحان ۆەبەر جانە شۆەدتىك موتوجارىسشىلار مارتين حااراحيلتۋنەن, جانە دوداداعى اكە مەن ۇل سانالاتىن نيكلاس پەن ستەفان سۆەنسسونداردى ايرىقشا اتاپ وتۋگە بولادى.

«مەدەۋدەگى» موتوجارىسقا جان ءبىتىرىپ, ءدراماتيزمدى سىيلاعان نەمىس موتوشاباندوزى يوحان ۆەبەردىڭ كەزەكتى ءبىر اينالىمنىڭ بۇرىلىسىندا موتوتسيكلىنەن قۇلاۋى كورەرمەندەردىڭ نازارىن اۋداردى. اۆستريالىق جارىسشى فرانتس تسورنعا سوقتىعىسقان شاباندوز جەدەل جاردەم ارباسىمەن الاڭنان اكەتىلدى. نەمىس گلادياتورىنىڭ باتىلدىعىنا كورەرمەندەر ورنىنان تۇرىپ, قول سوقتى. بۇل وقيعا وسى سپورت تۇرىنە ءتان ساتتەردىڭ ءبىرى, نەمىس شاباندوزى الماتىداعى ەمحانالاردىڭ بىرىنە جاتقىزىلدى.

20-شى كەزەڭدە بىردەن ەكى وقيعا ورىن الدى. الدىمەن, بۇرىلىستا موتوتسيكلدى يگەرە الماي, شۆەد وۆە لەدشترەم مۇزعا قۇلادى. وسى اينالىمدا گوللانديالىق دجاسپەر يۆەمانىڭداجول بولمادى, ول مۇز تراسساسىنىڭ بۇرىلىسىندا موتوتسيكلمەن بىرگە سالتو جاساپ, جولدىڭ جيەگىندەگى سابان قورشاۋلارعا سوقتىعىسىپ قانا توقتاي الدى. قۋانىشقا وراي, ەكى وقيعادان دا اۋىر جاراقات تىركەلمەدى. دجاسپەر ءتىپتى قورىتىندى ءباسپاسوز-كونفەرەنتسياسىنا قاتىسىپ, ءوزىنىڭ ادەمى قۇلاۋىنا قاتىستى ازىلدەدى.

قازاقستاندىق شاباندوزدار ۆلاديمير چەبلوكوۆ, پاۆەل نەكراسcوۆ جانە سەرگەي سەروۆ سپيدۆەيدەن جەكە الەم چەمپيوناتى فينالىنىڭ قورىتىندى كۇنىنىڭ ناتيجەسى بويىنشا اقتىق  سايىستارعا وتە المادى. قازاقستاندىقتارعا الەمدىك سپيدۆەيدىڭ شەبەرلەرىمەن يىق تەڭەستىرە كۇش سىناسۋ ازىرگە وڭايعا سوقپاۋدا.

ەكىنشى جارىس كۇنىنىڭ فينالىنا ءتورت رەسەيلىك سپورتشى دارا شىقتى, ولار – دانيل يۆانوۆ, دميتري كولتاكوۆ, يگور كونونوۆ جانە دميتري حوميتسەۆيچ. قاجىرلى كۇرەستە مارە سىزىعىن ءبىرىنشى بولىپ قازىرگى الەم چەمپيونى, ءبىرىنشى جارىس كۇنىنىڭ جەڭىمپازى دانيل يۆانوۆ كەسىپ ءوتتى. وسىلايشا, يۆانوۆتىڭ قورجىنىندا «مەدەۋ» مۇز ايدىنىندا ەكى كۇنگە سوزىلعان موتوجارىس قورىتىندىسى بويىنشا 40 ۇپاي. ەكىنشى ناتيجەنى رەسەيلىك دميتري حوميتسەۆيچ كورسەتتى-36 ۇپاي, ونىڭ وتانداسى دميتري كولتاكوۆ ءۇشىنشى ورىندى مىسە تۇتتى- 28 ۇپاي.

الەم بىرىنشىلىگىنىڭ الماتىداعى كەزەڭىنە جاڭا سەرپىن اكەلگەن اۆستريالىق موتوجارىسشى حارالد سيمون بولدى. ءبىرىنشى سايىس كۇنى ۇزدىك ۇشتىكتى تۇيىندەگەن ونىڭ كوزىنە جاس العانىن ايتا كەتكەن ابزال. بۇل ونىڭ 1992 جىلدان بەرى الەم بىرىنشىلىكتەرىنە قاتىسىپ كەلە جاتقان ۋاقىت ارالىعىنداعى العاشقى جەڭىس تۇعىرى.

حالىقارالىق موتوتسيكل فەدەراتسياسى (FIM) ترەك كوميسسياسىنىڭ ديرەكتورى ارماندو كاستانيا سپيدۆەيدەن جەكە ەسەپتەگى الەم چەمپيوناتى فينالى ەكى جارىس كۇنىنىڭ قورىتىندىسى بويىنشا وتكەن ءباسپاسوز-كونفەرەنتسياسىندا قازاقستان اۆتوموتوسپورت فەدەراتسياسى تاراپىنان دودانىڭ جوعارى دەڭگەيدە ۇيىمداستىرىلعانىن اتاپ ءوتتى.

– حالىقارالىق موتوتسيكل فەدەراتسياسىنىڭ وكىلدەرى, سونداي-اق بارلىق موتوشاباندوزدار قازاقستانداعى دودادا باعىن سىناۋعا ءاردايىم اسىق. سەبەبى مۇندا بارلىعى تياناقتى ۇيىمداستىرىلعان, قوناقجايلىقتى اتاپ وتكەنىم دە ورىندى. ءبىز الداعى ۋاقىتتا قازاقستان رەسپۋبليكاسىنىڭ اۆتوموتوسپورت فەدەراتسياسىمەن ىنتىماقتاستىقتى جالعاستىرۋعا ۇمىتتەنەمىز, – دەدى ارماندو كاستانيا.

ءوز تاراپىنان قازاقستان اۆتوموتوسپورت فەدەراتسياسىنىڭ پرەزيدەنتى مارات ابىقاەۆ اتالمىش جارىستىڭ قازاقستاندا جالعاساتىنىنا سەنىم ءبىلدىردى.

– ءبىز كەلەسى جىلى ەلىمىزدە سپيدۆەيدەن جەكە ەسەپتەگى الەم چەمپيوناتىنىڭ كەزەكتى فينالىن وتكىزۋ تۋرالى كەلىسىمگە قول جەتكىزدىك. قازىرگى تاڭدا ءبىز ونى وتكىزۋگە ارنالعان ءۇش الاڭدى قاراستىرۋدامىز, بۇل – «مەدەۋ» مۇز ايدىنى مەن الماتىداعى «سوكول» تراسساسى, سونداي-اق ەلوردامىز نۇر-سۇلتان قالاسىندا جارىستى وتكىزۋ نۇسقاسى دا بار, – دەدى قورىتىندى ءباسپاسوز-كونفەرەنتسياسىندا مارات ابىقاەۆ.

اتى اڭىزعا اينالعان «مەدەۋ» مۇز ايدىنى قىسقى سپيدۆەي جارىسىن بەس رەت قاتارىنان وتكىزىپ, ال بۇل جارىس قازاقستان ءۇشىن – التىنشى مارتە ءساتتى وتكىزىلگەن جەكە ەسەپتەگى الەم بىرىنشىلىگى. بيىل الماتىداعى فينال باس ارىپتەس «سامۇرىق-قازىنا» ۇلتتىق ءال-اۋقات قورىنىڭ, سونداي-اق قر مادەنيەت جانە سپورت مينيسترلىگى مەن الماتى قالاسى اكىمدىگىنىڭ قولداۋىمەن ءوتتى.