قازاقستاندىق كومپيۋتەرلىك ينتسيدەنتتەرگە ارەكەت ەتۋ قىزمەتىنىڭ وكىلدەرى (KZ-CERT) تەل-اۆيۆتەگى كيبەرقاۋىپسىزدىك سالاسىنداعى تەحنولوگيالاردى دامىتۋدىڭ وزەكتى ماسەلەلەرىنە ارنالعان CYBERTECH 2020 حالىقارالىق كونفەرەنتسياسىنا قاتىستى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
قازاقستاندىق ساراپشىلار ەلدەرىمىز اراسىنداعى اقپاراتتىق قاۋىپسىزدىكتى قامتاماسىز ەتۋ سالاسىنداعى مەملەكەتتىك ورگاندار مەن ۇيىمداردىڭ ءوزارا ءىس-قيمىلىن ودان ءارى جەتىلدىرۋ تۇرعىسىنان يزرايلدىك ارىپتەستەرمەن كەلىسسوزدەر جۇرگىزدى.
كەزدەسۋلەردىڭ قورىتىندىسى بويىنشا يزرايل پرەمەر-ءمينيسترى كەڭسەسى جانىنداعى كيبەرقاۋىپسىزدىك جونىندەگى ۇلتتىق ديرەكتوراتپەن, كومپيۋتەرلىك ينتسيدەنتتەرگە ارەكەت ەتۋ قىزمەتىمەن (Israel-CERT), سونداي-اق جەكە كومپانيالار وكىلدەرىمەن ىنتىماقتاستىقتى ودان ءارى كەڭەيتۋ بويىنشا ۋاعدالاستىقتارعا قول جەتكىزىلدى.