قىزىلوردا وبلىسىنىڭ اكىمى قۋانىشبەك ىسقاقوۆ جاڭاقورعان اۋدانىندا بولىپ, جيىرماعا جۋىق ەلدى مەكەندى ارالادى. بۇل تۋرالى وبلىس اكىمىنىڭ ءباسپاسوز قىزمەتى حابارلاپ وتىر.
اۋداندا نەگىزگى كاپيتالعا سالىنعان ينۆەستيتسيا كولەمى – 27,6 ملرد تەڭگە, قۇرىلىس جۇمىستارىنىڭ كولەمى – 5,3 ملرد.تەڭگەگە جەتىپ, ەكى مىڭنان اسا جاڭا جۇمىس ورنى اشىلعان. 2018-2019 جىلدار ارالىعىندا مەملەكەتتىك-جەكەشەلىك ارىپتەستىك اياسىندا بارلىعى 6 نىسان سالىنىپتى.
وبلىس اكىمى ق.ىسقاقوۆ الدىمەن قوجامبەردى اۋىلى تۇرعىندارىمەن كەزدەسىپ, ەلدىڭ ۇسىنىس-پىكىرلەرىن تىڭدادى. ال بەس مىڭنان اسا تۇرعىنى بار تومەنارىق اۋىلدىق وكرۋگىنە جاڭا اۋرۋحانا قاجەت. ءوڭىر باسشىسى بۇعان بايلانىستى جوبا-سمەتالىق قۇجاتتار ازىرلەپ, ءتيىستى جۇمىستار جۇرگىزۋدى اۋدان اكىمىنە تاپسىردى.
جاڭاارىق اۋىلدىق وكرۋگىندە تۇرعىندار ىزا سۋعا بايلانىستى درەناج قازۋ جانە كلۋب عيماراتىن كۇردەلى جوندەۋدەن وتكىزۋ ماسەلەسى تۋرالى ايتتى. ايماق باسشىسى درەناجدى جۇيەنى قالىپقا كەلتىرۋدى ءتيىستى سالا ماماندارىنا تاپسىرسا, اۋىلدىق كلۋبتى جوندەۋ ماسەلەسىن شەشۋدى اۋدان اكىمدىگىنە مىندەتتەدى. وبلىس اكىمى وزگەنت, كەلىنتوبە, قاراتوبە, قاندوز اۋىلدىق وكرۋگتەرىندە بولىپ, تۇرعىندارىمەن كەزدەستى. وزگەنت تۇرعىندارى كەلەشەكتە گاز تارتۋ ماسەلەسىنە نازار اۋدارىلسا دەگەن ۇسىنىسىن جەتكىزدى.
ماناپ, قوسۇيەڭكى, قىراش, اقۇيىك اۋىلدىق وكرۋگتەرى مەن شالقيا كەنتىنىڭ تۇرعىندارى حالىقتىڭ تىنىس-تىرشىلىگىمەن تانىسىپ جۇرگەن ايماق باسشىسىنا ءوز ۇسىنىستارىن جەتكىزدى. جايىلما مەن سۋناقاتا اۋىلدىق وكرۋگىنىڭ تۇرعىندارى بالا سانىنىڭ وسۋىنە بايلانىستى بالاباقشا مەن اۋىل كوشەدەگى ەلەكتر باعانالارىن جاڭارتۋدى سۇرادى.
ايماق باسشىسى تۇرعىندار تىلەگىنە بايلانىستى ءتيىستى ورىندار جەتەكشىلەرىنە تاپسىرما بەردى.