2020 جىلعى 29 قاڭتاردا بۋداپەشتتە قازاقستان رەسپۋبليكاسى ەلشىلىگىنىڭ ۇلتتىق اكادەميالىق كىتاپحاناسى دەلەگاتسياسىنىڭ قاتىسۋىمەن قازاق اقىنى اباي قۇنانباي ۇلىنىڭ 175 جىلدىق مەرەيتويىن مەرەكەلەۋ اياسىندا دوڭگەلەك ۇستەل وتكىزدى. وندا «الەم تانىعان اباي» كىتاپ-ءيلليۋستراتيۆتى كورمەسى مەن «اباي الەمى» فوتوكورمەسى ۇيىمداستىرىلدى.
ماجارستان مەن قازاقستاننىڭ شىعارماشىلىق زيالى قاۋىمىنىڭ, قوعامدىق-ساياسي, عىلىمي جانە مادەني ورتاسىنىڭ وكىلدەرى, قازاقستان جازۋشىلار وداعىنىڭ توراعاسى باستاعان ابايتانۋشىلار, قازاق دياسپوراسى, سونداي-اق, قازاق ءتىلىن, مادەنيەتى مەن سالت-ءداستۇرىن ۇيرەنىپ جۇرگەن ماجارلىق ستۋدەنتتەر قاتىسقان ءىس-شارا تۇركىتىلدەس مەملەكەتتەر ىنتىماقتاستىعى كەڭەسى وكىلدىگىنىڭ عيماراتىندا ءوتتى.
ءوز سوزىندە ەلشى ج.ءابدراشوۆ قازاقستان مەن ماجارستان اراسىندا ساياسي-ەكونوميكالىق قارىم-قاتىناستار عانا دامىپ قويماي, سونىمەن قاتار, مادەني-گۋمانيتارلىق ىنتىماقتاستىق تا قارقىندى ىلگەرىلەپ كەلە جاتقانىن ايتتى.
ماجار تاراپىنان ماجارستان پرەمەر-ءمينيسترىنىڭ كەڭەسشىسى, ماجارلىق پەن-كلۋب پرەزيدەنتى گ.سيوچ ءسوز الىپ, الەمدىك مادەني مۇراعا ۇلەسىن قوسقان ابايدىڭ ەڭبەگىنىڭ تەرەڭ پالساپالىق ويلارىنا توقتالدى. سونىمەن قاتار قازاقستان مەن ماجارستان اراسىندا ەكىجاقتى مادەني-گۋمانيتارلىق قارىم-قاتىناستاردىڭ دامۋىنا جوعارى باعا بەردى.
ءىس-شارا بارىسىندا ماجار تىلىندە م.اۋەزوۆتىڭ «اباي جولى» كىتابىنىڭ تۇساۋكەسەرى بولدى.
ءىس-شارادان كەيىن بۋداپەشت قالاسىندا ورتالىق پاركتەگى استانا كوشەسىندە اباي قۇنانباي ۇلىنىڭ ەسكەرتكىشىنە گۇل شوعىن قويۋ ءراسىمى بولدى. قازاق دياسپوراسى, سونداي-اق, قازاقستاندىق جانە ماجارلىق ستۋدەنتتەر ابايدىڭ ولەڭدەرى مەن قارا سوزدەرىن وقىپ, اندەرىن ورىندادى.