قار قالىڭ, قاۋىپ كوپ

جولدا قالعانى بار, ۇسىك شالعانى بار, ايتەۋىر بەيعامدىققا بوي الدىرعان وكپەك جولاۋشىلاردىڭ ءىس-ارەكەتى ءتيىستى ورىنداردى الاڭداتۋدا. بەيساۋات جولاۋشىنى جولعا شىعارماۋ ماقساتىندا وبلىس اۋماعىنداعى اۆتوكولىك جولدارىنا 125 جەدەل قيمىلدايتىن بلوك-بەكەت قويىلدى. كۇرە جولدى باسىپ قالعان قاسات قاردى تازالاۋ ءۇشىن 80 تەحنيكا مەن جەرگىلىكتى پوليتسيا قىزمەتىنىڭ 160 ادامى, دەپارتامەنتتىڭ 30 تەحنيكاسى مەن 50 ادامى جۇمىلدىرىلعان. جولدا قالعان تەحنيكالاردى قاسات قاردان ارشىپ الىپ, توپتاستىرىپ, بارار جەرىنە جەتكىزىپ سالۋ ۇيىمداستىرىلۋدا. ايتسە دە, ءدال مۇنداي ۋاقىتتا وزىنە دە, وزگەگە دە بەس باتپان بەينەت ارقالاتىپ, تاۋەكەلگە بەل بۋىپ, جولعا شىقپاعان ابزال.

– سوڭعى ءبىر جۇمانىڭ ىشىندە وبلىستىڭ اۆتوكولىك جولدارىنداعى قوزعالىسقا 29 مارتە شەكتەۋ قويىلدى, – دەيدى وبلىستىق توتەنشە جاعدايلار دەپارتامەنتى باستى­عىنىڭ ورىنباسارى ماناربەك شاپاعاتوۆ, – جەرگىلىكتى اتقارۋشى ورگاندارمەن بىرلەسە وتىرىپ 298 جولاۋشى قۇتقارىلدى.

جەرگىلىكتى پوليتسيا قىزمەتى باسقار­ماسىنىڭ باسشىسى سەرىك بايمۇقانوۆتىڭ ايتۋىنا قاراعاندا, جىلىتۋ بەكەتتەرىنە 478 ادام جەتكىزىلگەن. ولاردىڭ 23-ءى – با­لا. مۇنداي وقيعالار ەرەيمەنتاۋ, بۋرا­باي, اتباسار, تسەلينوگراد, اقكول جانە قورعال­جىن اۋداندارىندا دا كوپ كەزدەسۋدە.

ءالى دە كۇرە جولداردىڭ بارلىعى تەگىس تازالانىپ بولعان جوق. ءدال قازىر بلوك-بە­كەتتەردە 600-دەن استام اۆتوكولىك جولعا شى­­عا الماي قاڭتارىلىپ تۇر. ولاردىڭ كوپ­­شىلىگى الىسقا جۇك تاسىمالدايتىن اۋىر كولىكتەر.

بيىلعى قىستا قار ادەتتەگىدەن كوپ ءتۇستى. اۋا رايىن بولجايتىن بيۋرونىڭ مالىمەتىنە قاراعاندا, سوڭعى تاۋلىكتەردە ادەتتەگىدەن ءۇش ەسە كوپ قار جاۋعان. قازىر وبلىس تاعى اۆتوكولىك  جولدارىن 141 قۋاتتى تەحنيكا قاردان تازالاۋدا. ابىروي بولعاندا وسىن­داي جۇمىلعان جۇدىرىقتاي بولىپ, قاۋىپسىزدىك ءۇشىن ءوز باستارىن قاتەرگە تىگىپ جۇ­مىس ىستەۋ ارقىلى ادام شىعىنى جوق.

وبلىس ورتالىعى دا, ەلدى مەكەندەردە دە جىلۋ بەرۋ قالىپتى ۇيىمداستىرىلۋدا. تابي­عاتتىڭ توتەنشە مىنەزىنە توتەپ بەرىپ, قا­تەردىڭ بەتىن قايتارۋ ىسكەرلىك پەن بىرلىكتىڭ بەلگىسى.

اقمولا وبلىسى