جاڭا زاڭ قازاقستان فۋتبولىنا سەرپىن بەرە مە؟

بۇعان دەيىنگى ەرەجە بويىنشا, پرەمەر-ليگاداعى ءار كلۋب ءبىر ماۋ­سىمعا 8 شەتەلدىك ويىنشى تىركەي الا­تىن بولسا, ونىڭ التاۋى عانا ءبىر ۋاقىتتا الاڭعا شىعاتىن. ءتىپتى كلۋب­تاردىڭ قاراجاتى جەتىپ جاتسا, قاجەتتى سوماسىن تولەپ, تاعى ەكى لەگيونەردى قاتا­رىنا قوسىپ الۋعا قۇقىلى ەدى. بيىل دا ءار كوماندا 8 لەگيونەر تىركەي الا­دى, بىراق ەاەو ەلدەرىنىڭ فۋتبولشى­لارى ەندى بىزدە كىرمە ويىنشىلار ەمەس.

وقىرماندار اراسىندا مۇنداي يدەيا قايدان شىقتى دەگەن سۇراق تۋىنداۋى مۇمكىن. وكىنىشكە قاراي, بۇل جوبانى دا ءبىز رەسەيدەن الدىق. ياعني, ەڭ العاش بۇل باستامانى 2015 جىلى سول كەزدەگى رەسەيدىڭ سپورت ءمينيسترى ۆ.مۋتكو كوتەرگەن ەدى. كەيىننەن بۇل ىسكە رەسەي فەدەراتسياسىنىڭ قازىرگى سپورت مينيستىرلىگى ارالاسىپ, زاڭعا وز­گەرىس ەنگىزىپ, ەاەو ەلدەرىنىڭ سپورتشىلارى رەسەيدە لەگيونەر رەتىندە سانالمايتىنى تۋرالى زاڭ قابىلادى. ءبىر قىزىعى, رەسەي تەك فۋتبولشىلاردى عانا ەمەس, ۆولەيبول, باسكەتبول, گاندبول, حوككەي, سۋ دوبى, كوگالداعى حوككەي سەكىلدى سپورت تۇرلەرىندە ونەر كورسەتەتىن سپورتشىلاردى دا سىرتتان كەلگەندەر قاتارىنا جاتقىزبايتىن بولدى. ال بۇل زاڭ رەسەيدە 2020 جىلدىڭ 1 شىلدەسىنەن باستاپ كۇشىنە ەنەدى.

ەاەو ەلدەرىنىڭ وكىلدەرى قا­زاق­ستاندا لەگيونەر سانالمايتىنى تۋرالى شەشىم قابىلدانىپ, كۇشىنە ەن­گەن بولسا دا, ءالى دە بۇل وزگەرىسكە قار­سى ادامدار تابىلىپ جاتىر. بىراق قول­داۋشىلار دا جوق ەمەس. ماسەلەن, جۋىردا «حابار» ارناسىنا سۇحبات بەرگەن «استانا» فۋتبول كلۋبىنىڭ باسشىسى ميحايل گۋرمان بۇل زاڭ ەركىنسىپ كەتكەن قازاقستاندىق فۋتبولشىلاردى ساباسىنا تۇسىرەدى دەيدى.

– بۇل جاعداي تەك «استاناعا» عانا ەمەس, بارلىق كلۋبتارعا پايدالى. ءتىپتى ەكىنشى التىلىقتاعى كوماندالارعا دا پايدالى دەسەم بولادى. ءبىزدىڭ فۋت­بولشىلار كىشكەنە ەركەلەپ كەتكەن سىڭايلى. اسىرەسە كوپ جالاقى الىپ ۇيرەنىپ العان. كەيبىر تۇستاردا ولار سوڭىنا دەيىن ويناماي جاتادى. ءتىپتى جاتتىعۋدىڭ وزىنە نەمقۇرايلى قارايتىندار بارشىلىق. وسىنداي جاعدايلار ورىن الماس ءۇشىن باسەكە بولعانى دۇرىس. مۇنداي پروبلەما بارلىق كوماندادا بار. شەتەلدەن كوپ فۋتبولشى كەلسە, جەرگىلىكتى ويىن­­شىلاردىڭ دا دەڭگەيى وسەرى انىق. ترانسفەردىڭ دە ساپاسى ارتادى. ارقاشان باسەكە تۋدىرتا ءبىلۋ قا­­جەت. ءار ويىنشى ءوزىنىڭ ۇلتتىق قۇ­را­ماسىندا ويناسا, ءتىپتى جاقسى. ءبىزدىڭ بىرىن­شىلىككە بۇل تەك قانا پايداسىن تيگىزەدى. كوماندالارىمىز ءۇشىنشى سورت­تى سولعىن لەگيونەرلەردى الماي, مىقتى ساپالى فۋتبولشىلار الا باس­تايدى دەپ ەسەپتەيمىن, – دەيدى ول.

م.گۋرماننىڭ پىكىرى, ءبىر جاعىنان اقىلعا قونىمدى. راس, بۇل كۇندەرى قا­زاقستاندىق فۋتبولشىلاردىڭ جا­لاقىسى تىم جوعارى. جۋىردا عانا ۋەفا ەۋروپا ەلدەرىنىڭ ىشكى بىرىن­شىلىكتەگى ءبىر كلۋبىنىڭ فۋت­بولشىلارعا بەرەتىن ورتاشا جالاقىسىن جاريالادى. تىزىمدە قازاقستان 7,1 ميلليون ەۋرومەن 18-ورىندا تۇر. ەاەو ەل­دەرى اراسىندا رەسەي ءبىرىنشى ورىندا. سول­تۇستىكتەگى كورشىلەرىمىزدىڭ ءبىر كو­مانداسىنىڭ ورتاشا جالاقىسى – 36,4 ميلليون ەۋرو ەكەن.

جاڭا زاڭنىڭ ارقاسىندا بيىلدان باستاپ بۇل كورسەتكىش تومەندەۋى مۇمكىن. ويتكەنى كوماندالار قازاق­ستاندىق فۋتبولشىلارعا ايىنا 10 مىڭ دوللار تولەگەنشە, ەاەو ەلدەرىنە كىرەتىن ارمەنيا, بەلارۋس فۋتبول­شىلارىنا 5 مىڭ دوللار تولەپ, ەلگە اكەلۋىنە بولادى. ءبىزدىڭ ەلدە بۇل فۋت­بولشىلار ءۇشىن ەڭ از ايلىق بولعا­نىمەن, جوعارىدا اتالعان ەلدەر ءۇشىن وتە جوعارى جالاقى سانالادى.

جاڭا زاڭعا قاتىستى فۋتبولشىلار دا پىكىرلەرىن بىلدىرۋدە. «استانا» كلۋبىنىڭ بۇرىنعى ويىنشىسى رومان مۇرتازاەۆ ەگەر شىن مانىندە ەلىمىزگە ەاەو ەلدەرىنىڭ مىقتى فۋتبولشىلارىن الىپ كەلسە, بۇل باستامانى قولدايتىنىن ايتادى. «مەنىڭشە, قازاقستانعا ەكىنشى, ءۇشىنشى سورتتاعى ويىنشىلاردى ەمەس, ساپالى فۋتبولشىلاردى الىپ كەلۋ كەرەك. سوندا عانا ىشكى باسەكەلەستىك ارتىپ, قازاقستاندىق كوماندالاردىڭ دەڭگەيى كوتەرىلەر ەدى. ءبىر جاعىنان وتاندىق فۋتبولشىلارعا قيىندىق تۋدىرادى. ەندى ءبىزدىڭ فۋتبولشىلار ەكى ەسە ەڭبەك ەتىپ, الاڭداعى ورنىن ساقتاپ قالۋعا تىرىسادى. بۇل وتە ءتيىمدى», دەيدى.

ال قاقپاشى المات بەكباەۆ ەندى سولتۇستىكتەگى كورشى ەلگە كەتۋگە جول اشىلعانىن ايتادى. «بۇل زاڭ شىق­قاننان كەيىن قازاق فۋتبولشىلارى رەسەيدە لەگيونەر سانالماسا, وندا بىرازىمىزعا ەاەو ەلدەرىندە ويناۋعا جول اشىلادى. رەسەيدىڭ تەك پرەمەر-ليگاسى ەمەس, ەكىنشى ليگاسىنىڭ دەڭ­گەيى دە اجەپتاۋىر. سوندىقتان بۇل قازاق­ستان فۋتبولشىلارىنا ءتيىمدى», دەيدى قاقپاشى.

فۋتبول تۋرالى جازىپ جۇرگەن جۋر­ناليست بەك تولەۋوۆ قازاقستاندا ەاەو ەلدەرىنىڭ فۋتبولشىلارىن لەگيونەر رەتىندە ساناماۋعا قارسى. ويتكەنى ەاەو ۇيىمى ارقىلى بار­لىعى ورتاق بولىپ جاتقان سوڭ, ءبىر جاعىنان قازاقستان تاۋەلسىزدىگىنە قاۋىپ ءتونۋى مۇمكىن دەگەن ءۋاج ايتادى. «قازىر­گى تاڭدا ەلوردانىڭ «بارىسى» رەسەيدىڭ قۇرلىقتىڭ حوككەي ليگاسىندا ونەر كورسەتىپ جاتىر. سونداي-اق «استانا» باسكەتبول كلۋبى دا رەسەي چەمپيوناتىندا وينايدى. ەندى بۇل فۋتبولعا دا كەلدى. ءبىز وسىلاي-وسىلاي بارلىق جاعىنان رەسەيمەن بىرىگىپ جاتىرمىز. مەنىڭشە, دەربەس ەل بولعان سوڭ بارلىعى دا جەكە-جەكە بولۋى كەرەك. سونداي-اق ەلىمىزگە لەگيونەرلەردى تارتا بەرگەنشە, ەل فۋتبولىنىڭ باسىندا وتىرعاندار ءبىر ۋاقىت ينفراقۇرىلىمعا, بازاعا كوڭىل بولسە ەكەن دەيمىن», دەيدى سپورت ءجۋرناليسى.

كەزىندە قازاقستان ۋەفا قۇرا­مىنا وتكەندە دە بۇل جايت كوپشىلىكتىڭ نارازى­لىعىن تۋدىرعان ەدى. قازىر دە قارسى بولىپ جۇرگەندەردىڭ قاتارى كوپ. دەسە دە ازيادان شىعىپ, ەۋروپاعا كىر­گەنىمىزدىڭ ارقاسىندا ەلىمىزگە كارى قۇرلىقتىڭ ماڭدايالدى فۋتبولشىلارى مەن توپ كوماندالارى كەلىپ, قازاقستاندىق فۋتبول جانكۇيەرلەرىنە ناعىز فۋتبول مەرەكەسىن ۇسىنىپ جاتىر. ۋەفا-عا كىرىپ ۇتقانىمىز وسى. ال ەاەو ەلدەرىنىڭ فۋتبولشىلارىن ەلىمىزگە اكەلگەننەن نە ۇتامىز, بۇل شەشىم قازاق فۋتبولىن دامىتا الا ما, الدە جوق پا – بۇل سۇراقتىڭ جاۋابىن الداعى بىرنەشە جىلدىڭ ەنشىسىنە قالدىرايىق.