بالا كەزىمىزدە ءبىزدىڭ شاپ-شاعىن اۋىلدىڭ ءار جەرىندە «كۇنكوسەم» تۇراتىن. كونتوردىڭ, قازىرگىشە اكىمدىك كەڭسەسىنىڭ – اۋىلدىڭ ەڭ كورىكتى جەرىنىڭ الدىندا ءيليچتىڭ باسىنا تەلپەك كيىپ, وڭ قولىمەن جارقىن بولاشاقتى نۇسقاپ تۇرعان بەينەسى بولدى.
كونتوردان تاياق تاستام جەردەگى كلۋبتىڭ قاق الدىندا اق ءمارماردان سوعىلعان كەۋدە ءمۇسىنى تاعى بار. اۋىلداعى ورتا مەكتەپتىڭ ماڭدايشاسىندا «وقى, وقى جانە وقى» دەپ جازىلىپ تۇرعانىن ايتپاساق تا ءبىلىپ وتىرسىزدار. ءبىزدىڭ عانا ەمەس, بارلىق اۋىلداردا كەمىندە ءبىر لەنين مەنمۇندالاپ تۇراتىن.
«كۇنكوسەم» كەلمەسكە كەتتى. الدىمەن سۋرەتتەرى جوعالدى, ۇراندارى ءوشتى, كەيىن ەسكەرتكىشتەرى قۇلاتىلدى. الايدا, كەڭەستىك كەزەڭنەن قالعان ۇرانشىلدىق, پوستەر-پاتريوتتىق قازىر ەرەكشە قارقىن العانداي. كوشەنى ايتپاعاندا, الەۋمەتتىك جەلىدە الدەكىمدەردىڭ قاسقايعان سۋرەتىن ءىلىپ, قاسىنا «قاناتتى ءسوزىن» جازىپ قويۋ سانگە اينالدى. بۇرىن جالعىز لەنيننىڭ, نە بولماسا ءبىرىنشى حاتشىلاردىڭ بەينەسى جارنامالانسا, قازىر وبلىس, قالا اكىمدەرى پوستەردىڭ پەرسوناجى بولىپ شىعا كەلدى. جوعارى لاۋازىمدى تۇلعالار جۇمىستى جاپىرىپ ىستەپ, سوعان ساي جارناماسى دا جەر جارىپ جاتسا, قۋانار ەدىك. جوق, جۇمىس كەيىنگى كەزەكتە قالىپ, پياردىڭ اتى وزىپ كەتكەن جايى بار. سەبەبى اكىمدەردىڭ دە, باسقالاردىڭ دا رەيتينگى الەۋمەتتىك جەلىدە, باق-تاردا قانشا رەت ەسىمى اتالعانىنا قاراپ جاسالادى. ياعني, پوستەردە پاتريوتتىڭ, ىسكەر ازاماتتىڭ وبرازىن جاساپ الۋدىڭ ماڭىزى زور.
«قياردى دا پيارمەن جەيتىن» زاماندا اركىمنىڭ اتقارعان جۇمىسىن, اتتاپ باسقان قادامىن جارنامالاۋى قالىپتى قۇبىلىس, ارينە. شىندىعىندا پابليك ريلەيشنز, ياعني PR تەحنولوگيالار تەرەڭ زەرتتەلىپ, ءتيىمدى قولدانىلسا, قانداي دا ءبىر ادامعا نەمەسە مەمەكەگە, ءبىزدىڭ جاعدايدا مەملەكەتتىك ورگاندارعا ابىروي اكەلىپ, تاسىن ورگە دومالاتاتىنى تالاي دالەلدەنگەن. PR-دى ونەر دەڭگەيىنە جەتكىزگەن ماماندار جوعارى باعالانادى, پيار تەحنولوگيانىڭ ۇزدىك ۇلگىلەرى توپتاستىرىلعان كىتاپتار قولدان قولعا تيمەيدى. وكىنىشكە قاراي, ءبىزدىڭ قوعامدا اتقارىلعان جۇمىستان بۇرىن جالاڭ جارناما جاساۋ, وندا دا بالەنشەنىڭ پوستەرىن تاراتۋ, پاتريوتتىق وبرازىن قالىپتاستىرۋ بەلەڭ الىپ كەتتى. سايكەسىنشە PR تۋرالى ايتىلعاندا جۇرتتىڭ ەسىنە «ارزان پيارشىلار» تۇسەتىن بولدى.
ايتالىق, قانداي دا ءبىر قالادا قار كۇرەلمەي, حالىق ومبىلاپ, كولىكتەر كەپتەلىپ قالسا, ول پروبلەمانى شەشۋدىڭ ەڭ وڭاي جولى – اكىمنىڭ سۋرەتىن جاريالاۋ. اكىم قار كۇرەيتىن تەحنيكانىڭ نەمەسە كوممۋنالدىق قىزمەتكەرلەردىڭ قاسىنا بارىپ فوتوعا تۇسەدى. سوسىن سۋرەتتىڭ جانىنا قالاعا قانشا قار جاۋعانى, قانشاسى شىعارىلعانى تۋرالى از-كەم دەرەك جازىلادى, سونىمەن ءتامام. قۇداي بەتىن اۋلاق قىلسىن دەپ ايتايىق, بىراق ءدال وسى ءتاسىل ءبىر جەردى سۋ السا دا, ءورت شالسا كادەگە جاراي بەرەدى. باسقا لاۋازىمعا اۋىسقان اكىمنىڭ ارتىندا سالىنباعان جولدار, بۇزىلعان كوپىرلەر, جابىلعان زاۋىتتار, اياقتالماعان قۇرىلىستار, تارتىلماعان سۋ قۇبىرلارى, توزعان اۋىلدار قالعانى پروبلەما ەمەس. باستىسى, پوستەردەگى جارقىن وبرازى قالۋى كەرەك.
سەنبىلىككە شىققان اكىمدەردىڭ نەمەسە مينيسترلەردىڭ ارتىنان بىرنەشە نوكەرى بىرگە شاپقىلاپ جۇرگەنى دە قالىپتى قۇبىلىس. فوتوگراف پەن ءماتىن تەرۋشى ءھام SMM-ماماننان جاساقتالعان ۇشتىك اكىمنىڭ الەۋمەتتىك جەلىدەگى جاعىمدى وبرازىن جاساۋمەن اينالىسادى. بۇرىن مەكتەپ وقۋلىقتارىندا لەنيننىڭ سەنبىلىكتەگى سۋرەتتەرى كەزدەسۋشى ەدى. ءبىزدىڭ شەنەۋنىكتەردىڭ سەنبىلىكتە تۇسكەن فوتولارىنا قاراپ وتىرىپ لەنيننىڭ يدەياسى ولمەيدى دەگەن راس پا دەپ قالاسىز.
پوستەر-پاتريوتتىعىمىز كەيدە كۇلكىلى, كەيدە وكىنىشتى وقيعالارعا سوقتىرىپ جاتاتىنى بار. وسىدان بىرنەشە جىل بۇرىن داڭقتى جەرلەسىمىز دەنيس تەن قاراقشىلاردىڭ قولىنان قازا تاپتى. كوپ ۇزاماي دەنيس تۇرعان ۇيدە ەستەلىك تاقتا اشىلدى. سالتاناتتى شارا ءۇشىن ارينە دەنيستىڭ سۋرەتى بار باننەر جاسالدى. باننەرگە «رۋحاني جاڭعىرۋ» دەگەن جازۋ جازىلىپ, ءتۇرلى-ءتۇستى قىراننىڭ بەينەسى سالىندى. وسى اينالدىرعان 5-6 ءسوز بەن 2-3 سۋرەتى بار باننەردى جاساعان كومپانيا 2 بىردەي ورەسكەل قاتە جىبەرىپتى. بىرىنشىدەن, نەگىزگى جازۋ تەك ورىس تىلىندە جازىلىپ, قازاق ءتىلى كولەڭكەدە قالدى. ەكىنشىدەن, ورىسشاسىنىڭ ءوزىن وڭدىرماي, «وليمپيسكيح يگر» دەگەن تىركەستە قاتە جىبەرىپتى. ارينە الماتى اكىمدىگىنىڭ باسشىلارى قاتىسقان شارادا بۇل نازاردان تىس قالمايتىنى تۇسىنىكتى. ارتىنشا باننەر جاساعان كومپانيا حالىقتان كەشىرىم سۇرادى, بىراق تەك ەكىنشى قاتە ءۇشىن.
قاراپ وتىرساق, دامىعان ەلدەردە ساياساتكەردىڭ ءسوزى مەن ءىسى ۇيلەسپەسە, ونىڭ ساياساتتاعى عۇمىرى دا ونشا ۇزاققا سوزىلماۋى ابدەن مۇمكىن. ال قازاقستاندا كەرىسىنشە پيارى كەلىسكەن, پوستەردەگى وبرازى ءساتتى شىققانداردىڭ قىزمەتى دە ورلەپ كەتۋى قالىپتى قۇبىلىس. ولاي بولسا, پوستەر-پاتريوتتىق جاساسىن دەپ ۇرانداعان ءجون سياقتى. جۇمىس سوسىن جاسالا جاتار...