شىمكەنتتەگى «حايۋاناتتار باعى» 1980 جىلى 29 ساۋىردە اشىلعان. العاشقى جىلدارى كوللەكتسيادا 350 باس 75 حايۋانات ءتۇرى عانا بولعان. بۇل تۋرالى شىمكەنت قالاسى اكىمدىگىنىڭ ءباسپاسوز قىزمەتى حابارلادى.
2013 جىلى قايتا قۇرۋ جۇمىستارى جۇرگىزىلىپ,«افريكا» اۋماعى, اكىمشىلىك عيماراتى جانە «تاۋ» ەكسپوزيتسياسى ەل يگىلىگىنە بەرىلدى. بۇدان بولەك, حايۋاناتتار باعىنىڭ ءىشى كوگالدانىپ, ىشكى جولدار مەن اياقجولدار بويىنا زووباق لوگوتيپى بەينەلەنگەن ورىندىقتار مەن ورتالىق ىشكى جولىنداعى گۇلزاردا جاعالاي اڭ مۇسىندەرى ورناتىلدى.
سيرەك كەزدەسەتىن جانە جويىلىپ بارا جاتقان جان-جانۋارلاردى ساقتاپ, ولاردى كوبەيتۋ ماقساتىندا قۇرىلعان زووباقتا بۇگىنگى تاڭدا ءتۇرى 200-دەن اساتىن 2000-نان استام جانۋارلار بار. مۇندا كەلۋشىلەردىڭ سانى جىلىنا 500 مىڭعا جەتەدى.
زووباقتىڭ جالپى اۋدانى – 30 گەكتار. ونىڭ ىشىندە ەكسپوزيتسيالار 19 گەكتار جەرگە ورنالاستىرىلعان. مۇنداعى جانۋارلاردىڭ 40 ءتۇرى قىزىل كىتاپقا ەنگەن. زووباقتا تۇياقتىلار, جىرتقىشتار, پريماتتار, قۇستار, بالىقتار, باۋىرىمەن جورعالاۋشىلار جانە قوسمەكەندىلەردى تاماشالاۋعا بولادى.
سونداي-اق مۇندا بالىقتىڭ 70 تۇرىنەن,1000-نان استام بالىق مەكەندەيتىن اكۆاريۋم ورنالاسقان.