ىزگىلىك نۇرىنىڭ شاپاعاتى جاردەمگە مۇقتاج جانداردى قولتىعىنان پەرىشتەدەي دەمەپ كوتەرسە, قوعامنىڭ كەلبەتى دە ءساۋىردىڭ اق تاڭىنداي اجارلانىپ قالار ەدى.
اۋىلدىڭ جەل جاق وتىندە تۇراتىن جالعىزباستى زەينەتكەر ۆالەنتينا دەميدكوعا قىس بىرقىدىرۋ قيىندىقتاردى الا كەلەدى. سونىڭ ىشىندە ەڭ قيىنى – اۋلانى قاردان تازارتۋ. تۇنەۋكۇنى تۇنىمەن مايلى بوران ۇيىتقىدى دا تۇردى. قۇلقىنسارىدەن اۋلاعا شىقسا, قار باسىپ قالىپتى. كىشكەنتاي كۇرەگىمەن ءتۇرتىنىپ كورگەن. قايدا؟! سۋ قار كوكسوقتالانىپ, جابىسىپ جاتىر. ءتىپتى ءبىر كۇرەك تۇگىل, ءبىر شوكىمىن كوتەرە الار ەمەس. تۇسكە دەيىن بەينەتتەنگەن. ءتۇس اۋا مەكتەپ وقۋشىلارى كەلدى. زەينەتكەر اق تۇيەنىڭ قارنى جارىلعانداي قۋانىپ قالدى. تاڭ اتقالى تاۋ-تاۋ بولىپ ۇيىلگەن قاسات قاردىڭ ازابى تۇلا بويىن سۋىق تەمىرمەن قارىپ العانداي توڭدىرىپ تۇر ەدى, قوعامشىل, قايىرىمدى بالالاردىڭ كومەك قولىن سوزعان ىزگىلىك نۇرى قارت جۇرەگىن جادىراتىپ جىبەرگەنى. جالعىز ءوزى عانا ەمەس, وسىندا تۇراتىن ۇلى وتان سوعىسىنىڭ ارداگەرى نينا سكاريۋكينانىڭ دا جاعدايى ءمالىم. قارعا ادىم جەر ۇزاپ شىعا المايتىن ول قاريانى دا جاڭاعى بالالار قامقورلىقتارىنا العان. قىسى-جازى ءۇي ماڭايىن تازالاپ, ازىق-ت ۇلىگىن اكەلىپ بەرىپ, قولعابىستارىن تيگىزۋدە. وزدەرى دە اڭگىمەشىل, ءار نارسەنى بىلگىسى كەلەدى. اسىرەسە نينا اپايدىڭ ۇلى وتان سوعىسى كەزىندەگى قياپات وقيعالار جايلى ايتقان ەستەلىكتەرىن قۇلاق قويىپ تىڭدايدى. بىردە ەرلىك ىستەرگە سۇيسىنسە, ەندى بىردە مايدان دالاسىنداعى ءبىر-ءبىرىن قۇتقارىپ, ءوز باستارىن قاتەرگە تىگىپ, جولداستارى ءۇشىن جاندارىن پيدا ەتكەن ابزال ازاماتتاردىڭ تاعدىرىنا مۇڭايادى. قالاي بولعان كۇندە دە, قارت كوكىرەگىندە قاتتالىپ جينالعان ادامگەرشىلىك, كىسىلىك تۋرالى ەسكىرمەس ەستەلىك جاس جۇرەكتەرگە ىقپال ەتەتىندىگى داۋسىز.
ماكين ورتا مەكتەبىندە «ەڭبەكتىك دەسانت» اتتى قوزعالىس وسىدان ون جىل بۇرىن قۇرىلعان. مەكتەپ مۇعالىمدەرى مەن وقۋشىلار ءوزارا اقىلداسا كەلە, ۆولونتەرلەر كلۋبىن قۇرۋ يدەياسى پايدا بولىپ ەدى. جاندارىندا ءومىر ءسۇرىپ جاتقان كەيبىر جابىرقاۋ جانداردىڭ كوڭىلىنە مەدەت بولۋعا بارلىعى قۇلشىنىس ءبىلدىردى. قازىر مەكتەپ جانىنان قۇرىلعان «مەيىرىمدى جۇرەك» ەرىكتىلەر كلۋبىنىڭ قۇرامىندا جوعارى سىنىپتاردا وقيتىن ون بەستەن استام وقۋشى بار. ءبىر-ءبىرىنىڭ جاقسى ءىسىن ۇلگى ەتكەن جاس تولقىن اراسىنان اتالمىش كلۋبقا مۇشە بولۋعا تالپىنىپ جۇرگەندەر دە از ەمەس.
– ءبىز ءوزىمىزدىڭ وسى ءبىر بولار-بولماس كومەگىمىز ارقىلى جالعىزىلىكتى جانداردىڭ دەمەۋى بولعىمىز كەلەدى, – دەيدى كلۋبتىڭ كوشباسشىسى, 10-سىنىپ وقۋشىسى ابىلاي قاسىموۆ, – زامانداستارىمىزدىڭ اراسىندا ادامگەرشىلىك پەن ازاماتتىقتى, مەيىرىمدىلىك پەن ادالدىقتى دارىپتەگىمىز كەلەدى.
جاستاردىڭ كوشباسشىسىنىڭ ايتۋىنا قاراعاندا, جىل بويىنا جوسپار جاسالادى ەكەن. ول جوسپارلارىندا وزدەرىنىڭ قولدارىنان كەلەتىن ناقتى ىستەر سارالانادى. سول ءىس-قيمىلدارى ارقىلى سالاۋاتتى ءومىر سالتىن ناسيحاتتاپ, مۇگەدەكتەر مەن قارت ادامدارعا كومەكتەسىپ, كەيدە بوي كورسەتىپ قالاتىن اۋىل ىشىندەگى قۇقىق بۇزۋشىلىقتىڭ الدىن الۋعا اتسالىسپاق. ارداگەرلەرمەن كەزدەسىپ, كوپ بالالى وتباسىلارمەن تاقىرىپتىق جۇزدەسۋلەر وتكىزۋ دە مەجەلەنگەن.
ايتپاقشى, بالالاردىڭ وسىنداي ءبىر ىزگى نيەتىنە اتا-انالارى دا قولداۋ ءبىلدىرىپتى. بالالاردىڭ قاۋقارى جەتپەي جاتقان ىسكە اتا-انالارى دا قولعابىس كورسەتىپ قويادى. جاناشىرلىق – جالعىز قولعا كۇرەك ۇستاپ قار كۇرەۋ عانا ەمەس, رۋحاني جان دۇنيەنى دە ساۋلەلەندىرۋ. بۇل باعىتتا دا ونەرلى بالالاردىڭ تابيعي تالانتتارى جۇدەۋ كوڭىلدى جادىراتارلىق. وبلىستىق جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ ءبىرجان سال اۋداندىق «مەيىرىم» ارناۋلى الەۋمەتتىك قىزمەت كورسەتۋ ورتالىعىنداعى قارتتار مەن مۇگەدەكتەرگە ارناپ قىزعىلىقتى كونتسەرت قويادى. اۋىل تۇرعىندارى دا مۇنداي قىزىقتان شەت قالمايدى.
– ءبىز ءۇشىن, – دەيدى ابىلاي قاسىموۆ, – ەشبىر اتاقتىڭ قاجەتى جوق. ۇلكەندەردىڭ اق باتاسىن الساق بولعانى.
اقمولا وبلىسى,
ءبىرجان سال اۋدانى