پارلامەنت سەناتىنىڭ دەپۋتاتتارى دينار نوكەتاەۆا مەن نۇرتورە ءجۇسىپ الماتى قالاسى ماڭىندا اپاتقا ۇشىراعان «Bek Air» ۇشاعىنىڭ زارداپ شەككەن جولاۋشىلارى جاتقان №4 قالالىق كلينيكالىق اۋرۋحانادا بولدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
قازىرگى ۋاقىتتا اۋرۋحانادا ءار ءتۇرلى جاراقات العان 4 ناۋقاس بار, اۋە اپاتىنان زارداپ شەككەن 9 ادام الماتى جانە نۇر-سۇلتان قالالارى مەن الماتى وبلىسىنىڭ ستاتسيونارلىق اۋرۋحانالارىندا ەم الۋدا.
دەپۋتاتتار اۋرۋحانادا زارداپ شەككەندەرمەن اڭگىمەلەستى جانە اپاتتى تەكسەرۋ جونىندەگى جاعداي دەپۋتاتتاردىڭ باقىلاۋىندا ەكەنىن اتاپ ءوتتى. بۇگىنگى كۇنى زارداپ شەككەندەردىڭ جاعدايى ورتا دارەجەدەن جاقسارىپ كەلە جاتقانى جونىندە باعالانىپ وتىر.
وقيعا سالدارىنان 69 ادام زارداپ شەككەن بولاتىن, اۋرۋحاناعا جاتقىزىلعان 52 جولاۋشىنىڭ 9-ى بالا ەكەنى بەلگىلى. العاشقى مەديتسينالىق كومەك كورسەتىلگەننەن كەيىن 7 ادام امبۋلاتورلىق ەمدەلۋگە جىبەرىلدى.
بۇگىنگى كۇنى دارىگەرلەر 22 ەمدەلۋشىگە, ونىڭ ىشىندە 2 بالاعا وپەراتسيا جاسادى. جەدەل ارەكەتتەردەن باسقا, مەديتسينا قىزمەتكەرلەرى زارداپ شەككەندەر مەن تۋىستارىنىڭ بارىنە پسيحولوگيالىق كومەك كورسەتتى. پسيحولوگيالىق كومەك كورسەتۋ جانە ءتۇسىندىرۋ جۇمىستارىن جۇرگىزۋگە 223 مەديتسينا قىزمەتكەرى تارتىلدى, ونىڭ ىشىندە قالالىق ۇيىمداردان, رەسپۋبليكالىق پسيحياتريا ورتالىعى مەن قازاقستان رەسپۋبليكاسى پسيحولوگتارىنىڭ قاۋىمداستىعىنان 110 پسيحولوگ بولدى.