قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى بەكتاس بەكنازاروۆ شىمكەنت قالاسىنداعى جۇمىس ساپارى اياسىندا قالالىق ءماسليحات دەپۋتاتتارىمەن جانە جەرگىلىكتى زيالى قاۋىم وكىلدەرىمەن كەزدەستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
جيىنعا سەناتورلار ايگۇل قاپباروۆا, نۇرلان بەكنازاروۆ, شىمكەنت قالالىق ءماسليحاتىنىڭ حاتشىسى عاني تاشقاراەۆ جانە قالالىق قوعامدىق كەڭەستىڭ توراعاسى نۇرعازى بۇحارباي قاتىستى.
دەپۋتاتتار كەزدەسۋدە پارلامەنتتە قابىلدانعان زاڭداردىڭ مازمۇنىنا توقتالا كەلىپ, «پەداگوگ مارتەبەسى تۋرالى» زاڭنىڭ جانە اتاۋلى الەۋمەتتىك كومەكتىڭ ەرەكشەلىكتەرىن تالقىلادى.
القالى جيىندا ءسوز العان بەكتاس بەكنازاروۆ پارلامەنت قابىلدانعان زاڭداردى حالىققا كەڭىنەن ءتۇسىندىرۋ ماقساتىندا وسى جىلدىڭ 5 قاڭتارىنان باستاپ وڭىرلەردى ارالاپ, تۇرعىندارمەن كوپتەگەن كەزدەسۋلەر بولعانىن اتاپ ءوتتى. سەناتوردىڭ ايتۋىنشا, كەزدەسۋلەردىڭ باستى ماقساتى – حالىقتىڭ وزەكتى ماسەلەلەرىن شەشۋ ءۇشىن ازاماتتاردىڭ وزىنەن ۇسىنىستار جيناۋ بولىپ وتىر.
سەنات دەپۋتاتتارى كەزدەسۋدە قوزعالعان وزەكتى ماسەلەلەر مەن ءتيىمدى ۇسىنىستار پالاتا وتىرىستارىندا ساراپقا سالىناتىنىن, قاجەتتى جاعدايدا ۇكىمەتكە جولداپ, ولاردىڭ وڭ شەشىم تابۋىنا ىقپال ەتەتىندەرىن جەتكىزدى.
مەملەكەت باسشىسىنىڭ باستاماسىمەن جۇزەگە اسىپ وتىرعان باعدارلامالاردىڭ ورىندالۋى جونىندە حاباردار بولعان دەپۋتاتتار الداعى ۋاقىتتا دا شىمكەنت قالاسىنىڭ ءوسىپ-وركەندەۋى جولىنداعى جوبالارعا ءوز ۇلەستەرىن قوسىپ, قولداۋ بىلدىرەتىندەرىن ايتتى.