سالاعا قارجى قۇيۋدىڭ ۇلعايۋىنىڭ ارقاسىندا وبلىستىق بيۋدجەت ەسەبىنەن 2019 جىلى 12 اۋداندىق مادەنيەت وبەكتىسى جوندەلدى, ونىڭ ىشىندە 1 مەكەمەگە كۇردەلى جوندەۋ جۇرگىزىلدى. «اۋىل – ەل بەسىگى» باعدارلاماسى اياسىندا اعىمداعى جىلى رەسپۋبليكالىق بيۋدجەتتەن زەرەندى كەنتى مەن استراحان اۋدانىنداعى 2 اۋىلدىق مادەنيەت نىسانىن جوندەۋگە قاراجات ءبولىندى.
بۇدان باسقا, بيۋدجەتتەن تىس قاراجات ەسەبىنەن «اۋىل كلۋبىنا – ءبىزدىڭ قامقورلىعىمىز» ينفراقۇرىلىمدىق جوباسىن ىسكە اسىرۋ شەڭبەرىندە كلۋب وبەكتىلەرىنە بيزنەس-قۇرىلىمدار تاراپىنان 62 ميلليون تەڭگەگە قولداۋ كورسەتىلدى. ماسەلەن, بيىل مەملەكەتتىك-جەكەمەنشىك ارىپتەستىك اياسىندا ساندىقتاۋ اۋدانىنداعى باسترىموۆكا اۋىلدىق كلۋبىنىڭ عيماراتىن كۇردەلى جوندەۋگە «ساندىقتاۋ» جشس-ءنىڭ ديرەكتورى, مەتسەنات جامۋل مۇسحانوۆ 21 ميلليون تەڭگە ءبولىپ, اۋىل تۇرعىندارىن قۋانتتى.
سونىمەن قاتار «قادام نس» جشس-ءنىڭ ديرەكتورى ىدىرىس قوجاباەۆ ءوز قاراجاتى ەسەبىنەن تسەلينوگراد اۋدانىنداعى جاڭاجول اۋىلدىق كلۋبىنا جوندەۋ جۇرگىزدى. مۇنداي مىسالداردى كوپتەپ كەلتىرۋگە بولادى. قازاق «جاقسىنىڭ جاقسىلىعىن ايت, نۇرى تاسىسىن» دەمەي مە, ورايى كەلگەندە جومارت جانداردىڭ يگى ىستەرىن اتاپ كورسەتكەن ايىپ بولماس دەپ ويلايمىز. ماسەلەن, «شالقار» جشس-ءنىڭ ديرەكتورى دۋلات قامزەباەۆتىڭ باستاۋىمەن بىلتىر جاستار جىلىنا وراي تسەلينوگراد اۋدانىنىڭ شالقار اۋىلىندا جاستارعا ارنالعان بوس ۋاقىت ورتالىعى اشىلدى. سونىمەن قاتار وسى اۋداننىڭ قارامەندى باتىر اۋىلىندا «ارىستان» شارۋا قوجالىعىنىڭ ديرەكتورى قانات تەمىرباەۆ قاراۋسىز قالعان مادەنيەت ءۇيىنىڭ عيماراتىنا قايتا جوندەۋ جاسادى. ءسويتىپ, سوڭعى 5 جىل ىشىندە 63 مادەنيەت نىسانى جەتىسپەسە, قازىر بۇل كورسەتكىش 43-كە دەيىن تومەندەدى.
اقمولا وبلىسى