قازاقستان رەسپۋبليكاسى پارلامەنتى ءماجىلىسىنىڭ دەپۋتاتى مەرۋەرت قازبەكوۆا جۇمىس ساپارىمەن بۋراباي اۋدانىندا بولىپ, اۋىل شارۋاشىلىعى تاۋارلارىن وندىرەتىن بىرقاتار كاسىپورىننىڭ جۇمىسىمەن تانىستى, سالانى دامىتۋدا مەملەكەتتىك باعدارلامالاردىڭ مۇمكىندىكتەرىن ءتۇسىندىردى.
حالىق قالاۋلىسى مال شارۋاشىلىعىن مىقتاپ قولعا العان جەكە كاسىپ يەسى بولات ءابدىراحمانوۆتىڭ شارۋا قوجالىعىندا بولىپ, كاسىپتى كەڭەيتۋگە تۇساۋ بولىپ وتىرعان بىرقاتار ماسەلەنى نازارعا الدى. اتامەكەن ەلدى مەكەنىندە ورنالاسقان اتالعان شارۋاشىلىق 2011 جىلدان بەرى ەل ەكونوميكاسىنا سۇبەلى ۇلەس قوسىپ كەلەدى. بۇگىندە كۇنىنە 4 مىڭ ليترگە جۋىق ءسۇت وندىرەتىن كاسىپكەر مال ونىمدەرىن ودان ءارى ۇلعايتۋدى كوزدەپ وتىر. ءسۇت ءوندىرىسىن وڭ جولعا قويعان شارۋا قوجالىعىندا 20 ورىندىق ساۋىن زالى, 7 ميلليون تەڭگە سوماسىنا الىنعان ءسۇتتى سالقىنداتقىش, تۇركيادان شىعارىلعان مالدى بايلاپ باعۋ قوندىرعىلارى ورناتىلعان.
كەزدەسۋ بارىسىندا شارۋا قوجالىعىنىڭ يەسى بولات ءابدىراحمانوۆ ءماجىلىس دەپۋتاتىنا جەر ماسەلەسى بويىنشا بىرنەشە جىلدان بەرى ءتۇيىنى شەشىلمەي كەلە جاتقان وتكىر جايلاردىڭ بارىن العا تارتتى. اكىمدىككە بىرنەشە مارتە حات جازعانىمەن, جەر ماسەلەسى ءالى دە بولسا شەشىمىن تاپپاي كەلەدى. ءماجىلىس دەپۋتاتى اتالعان جايدى ءوزىنىڭ قاتاڭ باقىلاۋىنا الاتىنىن جەتكىزىپ, بىردەن ءتيىستى ورگاندارعا ءوز اتىنان حاتتار جازىلاتىنىن حابارلادى. ءوز كەزەگىندە حالىق قالاۋلىسىنىڭ ءوندىرىس ورنىنا كەلگەنىنە رازىلىعىن ايتىپ, شارۋاشىلىقتىڭ الداعى ۋاقىتتا ەت-ءسۇت ونىمدەرىن وڭدەۋدى ساتۋ نارىعىن كەڭەيتۋ تۋرالى جوسپارلارىمەن ءبولىستى.
بۇدان ءارى دەپۋتات جاسىل ەلدى مەكەنىندە ورنالاسقان «بۋراباي سىر» جاۋاپكەرشىلىگى شەكتەۋلى سەرىكتەستىگىنىڭ ىرىمشىك زاۋىتىنىڭ تىنىس-تىرشىلىگىمەن تانىستى. اتالعان كاسىپورىن تسەحى بىلتىرعى جىلى عانا ىسكە قوسىلسا دا, ەلدىڭ ەكونوميكاسىنا ەداۋىر ۇلەسىن قوسىپ كەلەدى. ءسۇت ونىمدەرىن وڭدەۋمەن اينالىساتىن زاۋىت تاۋلىگىنە ەكى توننا تازا ءونىم وندىرۋدە. ءتورت ادامدى جۇمىسپەن قامتىعان ءوندىرىس ورنى جۇمىسشىلارىنىڭ 100 مىڭ تەڭگە كولەمىندە جالاقىمەن قامتىلعانىن اتاپ ءوتتى.
كاسىپورىن ۇجىمىمەن وتكەن كەزدەسۋدە دەپۋتات ەلىمىزدەگى بيزنەستىڭ دامۋىنا بارىنشا قولايلى جاعداي جاسالعانىن تىلگە تيەك ەتتى. ءارى اۋىل شارۋاشىلىق ونىمدەرىنە مەملەكەتتىك باعدارلامالار ارقىلى قولداۋ بىلدىرىلگەنى جايىندا اتاپ ءوتتى. ءوز كەزەگىندە كاسىپورىن باسشىلىعى حالىق قالاۋلىسىنىڭ ءوندىرىس ورنىنا كەلگەنىنە ريزاشىلىعىن ايتىپ, الداعى جوسپارلارىمەن ءبولىستى.
بۋراباي اۋدانى,
اقمولا وبلىسى