تاياۋدا قالالىق ەمحانا جالپى پراكتيكا دارىگەرلەرىنە, پەدياتر, تەراپەۆت پەن مەدبيكەلەرىنە مەديتسينالىق قۇرال-جابدىقتار سالىنعان سومكەلەر تابىستادى. ولاردىڭ كومەگىمەن ەندى اق حالاتتىلار ءوز ەمدەلۋشىلەرىنە ساپالى قىزمەت كورسەتە الادى.
وفتولموسكوپ جانە وتوسكوپ. ەندى جالپى پراكتيكا دارىگەرلەرىنىڭ ءدال وسىنداي قۇرالدارى بار. اق حالاتتىلار وتولارينگولوگ پەن وكۋليستەردەن ءبىلىم الىپ, ونى پراكتيكا جۇزىندە قولدانباق. مۇنداي تاجىريبە ماسكەۋدەن الىندى.
–مىنا قۇرىلعى وتوسكوپ دەپ اتالادى. ول ارقىلى ءبىز قۇلاق اۋرۋلارىن انىقتايمىز. مۇندا ءار ءتۇرلى ولشەمدەر بار. ياعني بالاعا دا, ۇلكەنگە دە قولدانۋعا بولادى. بالالار مەن ەرەسەكتەردىڭ كوز ءتۇبىن زەرتتەۋ ءادىسى وفتولموسكوپ دەپ اتالادى. مىنا قۇرال پيكفلوۋمەتر دەپ اتالادى. ول كەۋدەنى تەكسەرۋگە ارنالعان. ءبىز بالالاردىڭ تامىرىن تەكسەرىپ, ءبىر جاسقا دەيىنگى سابيلەردىڭ تىنىس الۋ جيىلىگىن انىقتايمىز,–دەيدى جالپى پراكتيكا دارىگەرى ايدانا جۇنىسبەكوۆا.
مامانداردىڭ ايتۋىنا قاراعاندا, جاڭا قۇرال-جابدىقتارمەن قامتاماسىز ەتىلگەننەن كەيىن مەديتسينالىق تەكسەرىس بۇرىنعىدان الدەقايدا ناقتىلانا تۇسپەك. دەمەك, ەم تەز قونادى دەگەن ءسوز.
– ءبىزدىڭ بولىمشەلىك مەدبيكەلەرگە دە ارنايى سومكەلەر قاراستىرىلعان. ونىڭ ىشىندە تارازى, بويدى ولشەگىش, جاڭا تۋعان سابيلەردەن باستاپ, 5 جاستان اسقان بالالارعا ارنالعان مانجەتتەر بار, – دەيدى قالالىق ەمحانا ءبولىمىنىڭ مەڭگەرۋشىسى ارمينە تورويان.
جاڭا مەديتسينالىق جابدىقتاردىڭ كومەگىمەن ەندى جالپى پراكتيكا دارىگەرلەرى تار بەيىندى مامانداردىڭ كومەگىنسىز وزدەرى-اق دياگنوستيكا جاساي الادى. وسىلايشا جالپى سانى 60 مەديتسينالىق سومكە ساتىپ الىندى. بۇل ء«بىرىنشى بايلىققا» جاسالعان زور قامقورلىق.
كوكشەتاۋ قالاسى