مەملەكەت باسشىسى قاسىم-جومارت توقاەۆتىڭ «Egemen Qazaqstan» گازەتىنىڭ بۇگىنگى سانىندا جاريالانعان «اباي جانە ءححى عاسىرداعى قازاقستان» اتتى ماقالاسىندا ەگەمەن ەل رەتىندە ءوسىپ-وركەندەۋ ءۇشىن مەملەكەتتىلىگىمىزدى نىعايتۋ كەرەك ەكەنى ايتىلادى.
«زاڭ ۇستەمدىگىن جانە قوعامدىق ءتارتىپتى ساقتاۋ بارشاعا ورتاق مىندەت ەكەنىن ۇعىنعان ءجون. حالىقتىڭ بيلىككە دەگەن قۇرمەتى بولماسا – ەلدىگىمىزگە سىن. سوندىقتان ازاماتتارعا, اسىرەسە, جاستارعا مەملەكەتتى سىيلاۋدىڭ ءمان-ماڭىزىن ءتۇسىندىرۋ قاجەت. وسى رەتتە تاعى دا ابايدىڭ مۇراسىنا زەيىن قويعان ابزال. ۇلى اقىن ءوزىنىڭ شىعارمالارىندا ەلدىك مۇراتتى اسقاقتاتىپ, ۇلت بىرلىگىن بيىكتەتتى. ول ادىلەتتى قوعام قۇرۋ يدەياسىن كوتەرگەن» دەلىنگەن پرەزيدەنت ماقالاسىندا.
سونداي-اق ماقالادا ابايدىڭ كوزقاراستارى ءححى عاسىرداعى قازاقستان قوعامى جانە ونىڭ بەرەكە-بىرلىگى ءۇشىن اسا قۇندى ەكەنى جازىلعان.
«حاكىم ابايدىڭ ۇستانىمدارى وركەنيەتتى مەملەكەت قاعيدالارىمەن ۇندەسەدى. زاڭ ۇستەمدىگى, بيلىكتىڭ اشىقتىعى مەن حالىق الدىندا ەسەپ بەرۋى جوعارى دەڭگەيدە بولىپ, مەملەكەت ىسىنە ازاماتتىق قوعام وكىلدەرى بەلسەنە ارالاسقان جاعدايدا عانا ادىلەتتىلىك بەرىك ورنىعادى» دەپ جازدى ق.توقاەۆ.
بۇدان سوڭ, مەملەكەت باسشىسى ءوزىنىڭ «حالىق ۇنىنە قۇلاق اساتىن مەملەكەت» اتتى تۇجىرىمداماسى ءدال وسى ادىلەتتى قوعام يدەياسىن دامىتۋ ماقساتىمەن ۇسىنىلعانىن ءسوز ەتەدى.
«بيلىك پەن قوعام اراسىنداعى سىندارلى ديالوگ مەملەكەتكە دەگەن سەنىمدى نىعايتا تۇسەدى. ۇكىمەت مۇشەلەرى, سونىڭ ىشىندە مينيسترلەر مەن اكىمدەر مەملەكەتتىك جانە قوعامدىق ماڭىزى بار ماسەلەلەرگە قاتىستى شەشىم قابىلداعان كەزدە ازاماتتاردىڭ ۇسىنىستارى مەن تىلەكتەرىن ەسكەرۋى كەرەك. مۇنى اباي مەڭزەگەن ادىلەتتى قوعام قالىپتاستىرۋدىڭ بىردەن-ءبىر شارتى دەپ بىلەمىن» دەلىنگەن ماقالادا.