پارلامەنت سەناتىنىڭ دەپۋتاتتارى نۇرلان بەكنازاروۆ پەن ايگۇل قاپباروۆا جۇمىس بابىنداعى ساپارمەن شىمكەنت قالاسىندا بولىپ, اكىمدىكتە قالا تۇرعىندارىن قابىلدادى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
قابىلداۋ بارىسىندا تۇرعىن ۇيمەن جانە جۇمىسپەن قامتۋ, جەر كەزەگى, زاڭسىز قۇرىلىس جايى تالقىلاندى. سەناتورلار قابىلداۋعا كەلگەن ازاماتتارعا ءۇي, جەر پروبلەمالارى بويىنشا تەك كەزەكپەن, زاڭ جۇزىندە شەشىلەتىنىن ءتۇسىندىردى.
سەناتورلار ازاماتتاردىڭ ارىزدارى نازاردا بولاتىنىن جەتكىزدى. دەپۋتاتتار سول كۇنى حالىقتى جۇمىسپەن قامتۋ ورتالىعىندا بولىپ, ونىڭ جۇمىسىمەن تانىستى, سونداي-اق اتاۋلى الەۋمەتتىك كومەككە بايلانىستى اقپاراتتىق-ءتۇسىندىرۋ جۇمىسىن وتكىزدى.
مامانداردىڭ ايتۋىنشا, شىمكەنتتە اتاۋلى الەۋمەتتىك كومەك الۋعا قۇجات تاپسىرۋ 2020 جىلدىڭ 5 قاڭتارىندا باستالدى. شىمكەنت قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ قىزمەتكەرلەرى 4 اۋدان بويىنشا ااك-ءتى بەلسەندى الۋشىلاردىڭ الفاۆيت بويىنشا كەستەسىن ازىرلەگەن بولاتىن. بۇل كەستە حالىق اراسىندا ءتيىستى ءتۇسىندىرۋ جۇمىستارىن جۇرگىزۋ ءۇشىن اۋدان اكىمدىكتەرىنىڭ ءتيىستى بولىمدەرىنە جولداندى.
دەپۋتاتتار ەلىمىزدە اتاۋلى الەۋمەتتىك كومەك بەرۋدىڭ قولدانىستاعى جۇيەسىن وزگەرتۋ تۋرالى زاڭ قابىلدانعانىن, ەندى مەملەكەت ءبىرىنشى كەزەكتە بالالارعا جانە كوپ بالالى وتباسىلارعا كومەكتەسەتىنى تۋرالى ايتتى. ۇسىنىلىپ وتىرعان جاڭا ۇستانىمدار: كوپبالالى انالاردى قولداۋدى; جاڭعىرتىلعان اتاۋلى الەۋمەتتىك كومەكتى; كەپىلدى الەۋمەتتىك كومەكتى قامتيتىن بولادى.