اۋسترالياداعى ءورت سالدارىنان ماتەريكتەگى جان-جانۋارلاردىڭ ۇشتەن ءبىرى قىرىلىپ قالعان. سيدنەي ۋنيۆەرسيتەتىنىڭ ەكولوگتەرى كەلتىرگەن دەرەكتەرگە سۇيەنسەك, ورتەنىپ كەتكەن سۇتقورەكتىلەردىڭ, قۇستاردىڭ جالپى سانى جارتى ميللياردقا جەتەدى.
قىركۇيەكتە باستالعان ءورتتى توقتاتۋ مۇمكىن بولماي تۇر. اۋستراليانىڭ وڭتۇستىك-شىعىسىنداعى شتاتتارى جاڭا وڭتۇستىك ۋەلس پەن ۆيكتوريانىڭ وزىندە 200 ءورت تىركەلگەن. سوڭعى دەرەكتەرگە سۇيەنسەك, ءورت سالدارىنان 1300-گە جۋىق عيمارات قۇلاپ, 23 ادام كوز جۇمعان, تاعى 17 كىسى ءىز-ءتۇزسىز جوعالىپ كەتكەن. ءتىلسىز جاۋ 5,9 ملن گەكتار جەردى شارپىپ وتكەن. بۇل دانيا مەن نيدەرلاند اۋماعىنان ۇلكەن. اۋستراليانىڭ ۇكىمەت باسشىسى سكوتت مورريسون رەزەرۆتەگى 3 مىڭعا جۋىق اسكەري قىزمەتكەردىڭ ءورت ءسوندىرۋ جۇمىستارىنا جۇمىلدىرىلاتىنىن مالىمدەدى.
اۋستراليا حالقى تابيعي اپاتپەن كۇرەسۋگە قاۋقارسىز. حالىق قايىقپەن تەڭىز بەتىنە شىعىپ, كومەك كۇتۋدە. قۇتقارۋعا جىبەرىلگەن كەمەگە مىڭ ادام سىيادى. تاعى 3 مىڭ حالىق تەڭىز بەتىندە كومەك كۇتىپ قالعان. الداعى ۋاقىتتا تىكۇشاق جىبەرۋ قاراستىرىلعان. مەملەكەت استاناسى كانبەررادا اۋا لاستانۋىنىڭ يندەكسى شەكتى نورمادان 26 ەسە اسىپ كەتكەن. ءورت ءتۇتىنى جاڭا زەلاندياعا دا جەتكەن.
مەملەكەتتىڭ قورعانىس ءمينيسترى ليندا رەينولدس Sydney Morning Herald باسىلىمىنا بەرگەن سۇحباتىندا «وسىنشا ادامنىڭ ءبىر كۇندە ورتاق جۇمىسقا جۇمىلدىرىلۋى ەل تاريحىندا العاش رەت بولىپ تۇر. ۇكىمەت قولىنان كەلگەن بارلىق كومەكتى كورسەتىپ جاتىر. 5 تىكۇشاق پەن پاتشالىق اسكەري-تەڭىز فلوتىنىڭ 2 كەمەسى ءورت بولىپ جاتقان اۋماقتا», دەدى.
جالپى, اۋستراليادا ورمان ءورتى ءجيى بولىپ تۇرادى. ماسەلەن, 2009 جىلعى ءورت سالدارىنان 173 ادام قايتىس بولعان. بۇل كۇن ەل تاريحىندا «قارالى جەكسەنبى» اتالىپ كەتكەن. ەكولوگتەر بيىل ادام شىعىنى ايتارلىقتاي از بولسا دا, ءورتتىڭ كۇشتى ەكەنىن ايتادى. وت جالىنى قاتتى بولعانى سونشا, تەز تاراپ, گەكتارلاردى ءاپ-ساتتە شارپىپ وتەدى ەكەن. مەملەكەتتە 2009 جىلدان بەرى قۇرعاقشىلىق. مەتەورولوگيا بيۋروسىنىڭ اقپاراتىنا سۇيەنسەك, 2019 جىلدىڭ جەلتوقسانى ەڭ قۇرعاق ماۋسىم رەتىندە تىركەلگەن. اۋا تەمپەراتۋراسى 40 گرادۋس تسەلسيدەن تۇسپەگەن. بيىل ەستەرىڭىزدە بولسا, امازون ورماندارى ورتەنىپ, 7 ملن گەكتار جەردى قامتىعان ەدى. مەملەكەتتىڭ قورشاعان ورتا ءمينيسترى سيۋزان لەي ءورت سالدارىنان اۋستراليادا عانا مەكەندەيتىن كوالالاردىڭ ۇشتەن ءبىرى قىرىلىپ قالعانىن مالىمدەدى.
ءورتتىڭ تەك اۋستراليا ەمەس, جەر شارىنىڭ ەكوجۇيەسىنە اسەر ەتەتىنى ءسوزسىز. بۇل تۇرعىدا الەمدىك ساراپشىلار جاۋاپتىلاردى دا سىناپ جاتىر. ءبىرى حالىقتىڭ نەمقۇرايدىلىعىن سىناسا, ءبىرى بيلىك وكىلدەرىنىڭ سالعىرتتىعىن ايتۋدا. ماماندار ءورتتىڭ ءجيى ءارى مەزگىلسىز شىعۋىنا جاھاندىق كليماتتىڭ وزگەرۋى اسەر ەتتى دەيدى. الايدا اۋستراليانىڭ وزىندە دە ءورتتىڭ شىعۋىنا سەبەپ بولعان ازاماتتارعا قاتاڭ جازا قولدانىلادى. ماسەلەن, 2019 جىلدىڭ قاراشاسىندا جەرگىلىكتى ءورت ءسوندىرۋ قىزمەتىنىڭ ۇزاق باقىلاۋىنان كەيىن 19 جاستاعى ازامات 6 اپتا بويى قاساقانا ءورت تۇتاتقان دەگەن ايىپپەن جاۋاپقا تارتىلدى. جوعارىدا ايتىلعان بيلىك وكىلدەرىنىڭ جاۋاپسىزدىعى دا ەسكەرىلەتىن جايت. ويتكەنى اقپاراتتارعا سۇيەنسەك, 2019 جىلى ءورت جانە قۇتقارۋ دەپارتامەنتى اۋستراليا پرەمەر-مينيسترىنە بىرنەشە رەت ەسكەرتۋ حاتىن جىبەرگەن ەكەن. حاتتا مەملەكەتتە ءورت قاۋپى بارىن, قاجەتتى شارالاردى قولعا الۋ كەرەگىن جازىپتى.
ءورتتىڭ قاشان سوندىرىلەتىنى بەلگىسىز. بۇعان نارازىلىق تانىتقان الەم جۇرتشىلىعى اۋستراليا ۇكىمەتىنە ءۋاجىن ايتۋدا. دەگەنمەن پرەمەر-مينيستر سكوتت مورريسون ءورتتى سوندىرۋگە مەملەكەت تاراپىنان 23 ملن اۋستراليا دوللارىنىڭ بولىنگەنىن حابارلادى. بۇل شامامەن 16,2 ملن اقش دوللارىنا تەڭ. ال اپاتتا جاپا شەككەن ازاماتتارعا كاسىپتەرى مەن ۇيلەرىن قايتا تۇرعىزۋ ءۇشىن ارقايسىسىنا 4200 اقش دوللار كولەمىندە وتەماقى تولەنەدى. سونىمەن بىرگە ەرىكتىلەر توبى كومەككە شاقىرىلعان.