مادەنيەت جانە سپورت مينيسترلىگىنىڭ قولداۋىمەن «قازاقكونتسەرت» ارتىستەرى نۇر-سۇلتان قالاسىنداعى «شاراپات» الەۋمەتتىك قىزمەت كورسەتۋ ورتالىعىنىڭ تۇرعىندارىنا ارناپ مەرەكەلىك قايىرىمدىلىق كونتسەرت وتكىزدى. بۇل تۋرالى مينيسترلىكتىڭ ءباسپاسوز قىزمەتى حابارلادى.
تاعدىر تالكەگىنە ۇشىراپ, قامقورلىقسىز قالعان قارتتاردىڭ كۇندەلىكتى ومىرىنە مەرەكەلىك كوڭىل-كۇي سىيلاعان «قازاقكونتسەرت» ۇيىمى 2019 جىلدى وسىلايشا قايىرىمدىلىق شاراسىمەن اياقتادى. «قازاقكونتسەرت» مكۇ ديرەكتورى جەڭىس سەيدۋللا ۇلى اتاپ وتكەندەي, ەلىمىزدىڭ باستى ونەر وشاعى كوپتەگەن قايىرىمدىلىق ءىس-شارالارىن وتكىزگەن.
- قازاقكونتسەرت ۇلكەن مەرەكەلەرگە وراي قايىرىمدىلىق جاساۋدى داستۇرگە اينالدىرعان. حالقىمىزعا ءتان مەيىرىمدىلىك پەن قايىرىمدىلىق قاسيەتتەرىن نەگىزگە الىپ, ءبىز ءاردايىم جۇرەك جىلۋىنا مۇقتاج جاندارعا ونەرىمىز ارقىلى قولداۋ كورسەتىپ كەلەمىز. جاقىندا عانا وتكەن «جاڭا جىلدىق كەزدەسۋ-2» كونتسەرتىندە 1500 جۋىق بيلەتتى قايىرىمدىلىق ماقساتتا الەۋمەتتىك دەڭگەيى تومەن كوپبالالى وتباسىلار مەن مۇمكىندىگى شەكتەۋلى جاندارعا, بالالار ءۇيىنىڭ تاربيەلەنۋشىلەرى مەن قارتتارعا تابىستادىق. وسى جاقسى ۇردىستەن الشاقتاماي, ءبىز جىلدىڭ سوڭىن دا وسىنداي ەرەكشە كونتسەرتتىك باعدارلامامەن قورىتىندىلادىق. مەملەكەت باسشىسى ايتقانداي, ءبىز – الەۋمەتتىك مەملەكەتپىز. سوندىقتان كەلەر جىلى دا «قازاقكونتسەرت» ۇيىمى الەۋمەتتىك تۇرعىدان وسال جاندارعا قامقورلىق جاساۋدى جالعاستىرادى, - دەدى جەڭىس سەيدۋللا ۇلى.
«قازاقكونتسەرت» ارتىستەرى قاريالار ءۇشىن بارشاعا تانىمال كەڭەس زامانىنداعى اندەر مەن قازاق كومپوزيتورلارىنىڭ تۋىندىلارىنان قۇرىلعان ەرەكشە كونتسەرتتىك باعدارلاما ۇسىندى. مەرەكەلىك كونتسەرتتە جەڭىس سەيدۋللا ۇلى, ازامات جەلتىركوزوۆ, قۇرماش ماحانوۆ, نۇرلىتاڭ ەرمەك, جاننا ساندىباەۆا سىندى بەلگىلى وپەرا جانە ەسترادا انشىلەرى ونەر كورسەتتى.
ريزاشىلىق تانىتقان كورەرمەن ارتىستەرگە قوشەمەت كورسەتىپ, ولارعا العىستارىن جەتكىزدى. كونتسەرت سوڭىندا قاريالار جۇرەكتەرىنە جىلۋ مەن قۋانىش سەزىمدەرىن ۇيالاتقان «قازاقكونتسەرت» ارتىستەرىنە اق باتالارىن بەرىپ, جاقسى تىلەكتەرىن ءبىلدىردى.