ساندىقتاۋ اۋدانى اكىمىنىنىڭ جۇلدەسى ءۇشىن ۆولەيبولدان ەرلەر اراسىنداعى ءداستۇرلى تۋرنير ءوتتى. بۇل جولى وبلىسىمىزدىڭ بىرنەشە اۋداندارىنان كەلگەن كوماندالار كۇش سىناستى.
وسىدان بىرنەشە جىل بۇرىن بالكاشينو سەلوسىندا بوي كوتەرگەن سپورتتىق ساۋىقتىرۋ كەشەنى ءارتۇرلى جارىستار وتكىزىپ, جاتتىعۋلار جاساۋعا مول مۇمكىندىك تۋعىزىپ وتىر.
–اۋدان اكىمىنىڭ جۇلدەسى ىرگەلەس اۋداندارداعى ۆولەيبولشىلاردى دا قىزىقتىرادى. سوندىقتان جارىسقا قاتىسۋشىلاردىڭ سانى جىل وتكەن سايىن كوبەيىپ كەلەدى. اسىرەسە, جاستارمەن قاتار سپورت ارداگەرلەرى دە ۆولەيبول الاڭىندا ادەمى ويىن كورسەتۋدە, دەيدى جارىستىڭ تورەشىسى ۆيكتور كارپوۆ.
جارىس بارىسىندا جىگەر جانيتىن ساتتەر از بولعان جوق. ارينە, قايرات پەن قاجىر تارازى باسىن تەڭ تارتقان ساتتەر دە كورىنىس تاپتى. قالاي بولعاندا دا سپورت دەسە ىشەر اسىن جەرگە قوياتىن كوپشىلىكتىڭ باسىن قوسقان دۋماندى وقيعا بولدى.
–بيىل كوماندالار سانى كوبەيدى. سوندىقتان جارىس وتە قىزىقتى وتۋدە. مەن ارداگەرلەر كومانداسىنا جەتەكشىلىك ەتەمىن. ارامىزدا ۆولەيبول ويناۋدى جەتتىك مەڭگەرگەن زامانداستارىم از ەمەس. ماقسات جەڭىس ەمەس, بۇقارالىق سپورتتى دامىتۋ دەپ ويلايمىن, دەيدى سپورت ارداگەرى بەرىك قانافين.
تارتىستى وتكەن تۋرنير بارىسىندا تاماشا ويىن كورسەتكەن بۋراباي اۋدانىنىڭ كومانداسى جەڭىسكە جەتتى. ەكىنشى ورىندى ساندىقتاۋ اۋدانى اكىمى اپپاراتىنىڭ جىگىتتەرى ەنشىلەدى. ءۇشىنشى جۇلدەنى ساندىقتاۋ سەلوسىنان كەلگەن ۆولەيبولشىلار الدى.