پەندە اتاۋلىعا تۋعان جەردەن ىستىق, وسكەن ورتادان قادىرلى ەشتەڭە جوق شىعار, ءسىرا. جاستىق جالىنمەن اسقارالى بيىككە ۇمتىلىپ, تالاي-تالاي جوسپار قۇرعان. ارمان قاقپاسى الدىنان ايقارا اشىلۋى دا مۇمكىن ەدى. نۇر-سۇلتان قالاسىنداعى ساكەن سەيفۋللين اتىنداعى اگروتەحنيكالىق ۋنيۆەرسيتەتتى بىتىرگەن كەزدە جاس ماماندى قولقالاپ شاقىرعاندار دا بولدى. ءتىپتى ەلوردادا ىرگە تەۋىپ قالۋى دا مۇمكىن ەدى. ءبىلىمدى جاستىڭ دالادا قالمايتىنى انىق قوي. كۇن ساناپ ءوسىپ كەلە جاتقان, كەرەگەسى كەڭىپ, كوركەيىپ كەلە جاتقان ەلوردا تۇرعىنى اتانۋدى كىم ارمانداماس. ايتسە دە, سەرىك ساتەمىروۆتىڭ كوڭىلى تۋعان جەرگە اۋا بەرگەن. ءوزىنىڭ وسكەن قاسيەتتى توپىراعىنا بارىپ ءبىر كادەسىنە جاراسا قانەكي.
ءوندىرىس اۋىلى شوقجۇلدىزداي عانا ەلدى مەكەن. جەتىستىگى دە بار, كەمشىلىگى دە بار. تۋعان اۋىلدى تۇلەتۋ پەرزەنتىنىڭ ماڭدايىنا جازىلعان پارىز. نەسىبەسى دە وسى جەردە. كىندىك قانى تامعان وسى توپىراقتا تاعدىرلاس, ارمان-مۇراتى ءبىر, ماقسات-مۇددەسى ورتاق اۋىلداستارىنىڭ ورتاسىندا ماڭدايدان تەرىن سورعالاتىپ, سول اق ادال ەڭبەگىمەن ەل مەرەيىن ۇستەم ەتسە, زامانداستارىنىڭ قۇشاعىندا ماڭدايى جارقىراپ جۇرمەي مە؟ جوعارى وقۋ ورنىن اياقتاعان سوڭ جەرگىلىكتى «قىپشاق» جاۋاپكەرشىلىگى شەكتەۋلى سەرىكتەستىگىنە اگرونوم بولىپ ورنالاستى. بەرىك ءبىلىمدى پايدالانا وتىرىپ, جومارت جەردىڭ ءتىلىن تابۋ اگرونوم ءۇشىن ءبىر باقىت. ەندى-ەندى تاجىريبە جيناقتاپ, توسەلىپ كەلە جاتقاندا سەرىكتەستىك باسشىسى اۋىستى دا, ۇيدەگى ويدى بازارداعى نارىق بۇزىپ كەتتى. بىراق ەلىم دەپ, جەرىم دەپ تۋعان جەرىنە ورالعان تۇلەك العان بەتىنەن قايتا قويعان جوق. ءبىر كەزدە ءوزى ءبىلىم العان مەكتەپكە حيميا جانە بيولوگيا پاندەرىنىڭ مۇعالىمى بولىپ ورنالاستى. جارى ايزەرە – قازاق ءتىلى مەن ادەبيەتى ءپانىنىڭ مۇعالىمى. قوستانايداعى ى.التىنسارين اتىنداعى مەملەكەتتىك ۋنيۆەرسيتەتتىڭ تۇلەگى. ەكى جاس ەل ەرتەڭى – جاس تولقىنعا بەرىك ءبىلىم, سانالى تاربيە بەرۋگە بەل بۋىپ كىرىستى. ءتول باسى قايرەدەن مەن نۇريدەن باستاۋىش سىنىپتاردا وقيدى. ءسۇت كەنجەلەرى ايعانىم ەكى ايلىق ءسابي.
تالاپتى تۇلەك تىنباي ىزدەنسە كەرەك. سەرىك كارىباي ۇلى دا قابىرعاسىمەن كەڭەسە كەلە, ءبىلىمىن جەتىلدىرۋدى ۇيعاردى. كوكشەتاۋداعى شوقان ءۋاليحانوۆ اتىنداعى مەملەكەتتىك ۋنيۆەرسيتەتىنىڭ بيولوگيا فاكۋلتەتىنىڭ سىرتتاي بولىمىنە ءتۇسىپ, ءبىتىرىپ شىقتى.
باس-اياعى ەلۋگە جۋىق وتباسى ءتۇتىن تۇتەتىپ وتىرعان ەلدى مەكەندە بالالار باقشاسى دا جوق. بار ءسابي ۇيدە. وكىنىشى جوق, ەڭ مىقتى تاربيە – انا تاربيەسى. ودان وسى ەلۋ ءۇيلى التىن بەسىك اۋىلدىڭ ساقتالىپ قالعانىن ايتساڭىزشى. اۋىل تاعدىرى ءسوز بولعان ساتتە سەرىك كارىباي ۇلى ەل ازاماتى قايرەدەن كارىباەۆتىڭ ولشەۋسىز ەڭبەگىن ايتپاي تۇرا المايدى. مىنە, اركىم ءوز ەلىن, ءوز اۋىلىن ءدال قايرەكەڭدەي كوتەرۋگە ۇمتىلسا, جالپاق جۇرت گۇل جايناپ كەتەر ەدى. شاعىن مەكتەپتى جۇمىرتقاداي جۇتىندىرىپ جوندەگەن دە سول كىسى.
اۋىلدى اباتتاندىرىپ, كوگالداندىردى. كومەكتى قاجەت ەتكەندەردىڭ قولتىعىنان دەمەدى. سول ەڭبەگىمەن تۋعان جەردى سۇيە بىلۋگە ۇيرەتتى. ءنارلى سوزىمەن عانا ەمەس, ناتيجەلى ەڭبەگىمەن. ەكى قولعا ءبىر كۇرەك تابىلا قويمايتىن, بۇيىعىپ جاتقان اۋىلدا جاۋاپكەرشىلىگى شەكتەۋلى سەرىكتەستىك قۇرىپ, حالىققا جۇمىس تاۋىپ بەردى. پايعامبار جاسىنا كەلگەندە ءوزى باس بولىپ, جارعاق قۇلاعى جاستىققا تيمەي ءجۇرىپ مال شارۋاشىلىعىن دامىتتى.
قايراتى مول ەردىڭ عيبراتتى ەڭبەگىنە ابدەن رازى بولعانى سونشالىق, سەرىك ىرىمداپ تۇڭعىش ۇلىنا ەل اعاسىنىڭ ەسىمىن بەردى. ءدال اتاسىنداي ەڭبەكقور بولسىن دەگەنى عوي. ەڭبەك دەمەكشى, وسى ءبىر سۇتتەي ۇيىعان كىشكەنتاي اۋىلدان ەكى بىردەي سوتسياليستىك ەڭبەك ەرى شىققان. ولاردىڭ بەرەكەلى ەڭبەك جولى مەكتەپتەگى مۋزەيدە سايراپ تۇر.
مەكتەپ ديرەكتورىنىڭ وقۋ ءىسى جونىندەگى ورىنباسارى بولىپ ەڭبەك ەتەتىن سەرىكتىڭ ءبىلىم وشاعىنداعى شارۋاسى شاش-ەتەكتەن. ايتسە دە اۋىلدا وتىرعان سوڭ قوسالقى شارۋاشىلىق ۇستاماي تاعى بولمايدى. التى بالانىڭ نەسىبەسى ءۇشىن. بالا ءوسىردىم دەپ بوگدەگە الاقان جايۋ, الدەقايدان كومەك كۇتۋ سەرىك ءۇشىن مۇلدە جات. ءار بالا ومىرگە كەلگەندە ءوزىنىڭ نەسىبەسىن الا كەلەدى دەپ ەسەپتەيدى. ول نەسىبە اتا-انانىڭ ەڭبەگىنە بايلاۋلى. قازىر قورا تولى قويى, الدەنەشە باس جىلقىسى, ءسۇتى بۇلاقتاي سيىرلارى بار. ءوزى كومەك سۇراماق تۇگىل جۇرتقا قول ۇشىن بەرۋگە قاۋقارى ابدەن جەتىپ جاتىر.
– وسى ءۇيىمدى سالعاندا جوباسىن ءوز قولىممەن جاسادىم, – دەيدى سەرىك كارىباي ۇلى, – ۇرپاق وسىرگەن سوڭ كەڭ دە ىڭعايلى بولعانى دۇرىس قوي. اتام قازاقتىڭ اسار دەگەن عۇرپى بار. ەت جاقىن اعايىن تۋىس قانا ەمەس, اۋىلداستاردىڭ ءبارى تايلى تۇياعىمەن جينالىپ كەلدى. كومەككە كوڭىلىڭ تولادى, ارينە. بىراق ونىڭ ار جاعىنداعى ىنتىماقتاستىق, تىلەكتەستىك ءتارىزدى اق ادال پەيىل جۇرەگىڭدى ودان ءارى جىلىتا تۇسەدى. ءبىر-بىرىنە قارايلاسىپ, جۇكتى بىرگە كوتەرگەن قانداي جاقسى.
وتىزدان ەندى اسقان قوس ۇستاز شاعىن اۋىلدا قۇستىڭ ۇياسىنداي جىپ-جىلى, شاراپاتى مول شاڭىراقتارىندا ۇرپاق ءوسىرىپ جاتىر. ازىرگە التى پەرزەنت. «قازان اۋزى جوعارى». ءبىر بۇيىرىندە التى بالاسىن ايالاپ ءوسىرۋ اياسىنداعى اق ارمان جۇرسە, ەكىنشى بۇيىرىندە تۋعان ەلىمنىڭ تۇعىرىن بيىكتەتسەم دەگەن ماقساتى بار.
اقمولا وبلىسى,
استراحان اۋدانى