نۇر-سۇلتاندا كوپسالالى مەديتسينالىق ورتالىقتىڭ ىشىنەن ينسۋلت ورتالىعى اشىلدى. ايتۋلى شاراعا قالا اكىمىنىڭ ورىنباسارى باقتيار ماكەن قاتىستى. بۇل تۋرالى ەلوردا اكىمدىگىنىڭ رەسمي سايتى حابارلادى.
حالىققا مەديتسينالىق قىزمەت كورسەتۋ ستاندارتتارىنا سايكەس, قالادا ءار 250 مىڭ ادامعا شاققاندا ءبىر ينسۋلت ورتالىعى بولۋى كەرەك. جاڭادان بوي كوتەرگەن ورتالىق ەندىگى كۇنى بايقوڭىر اۋدانىنىڭ تۇرعىندارىنا قىزمەت كورسەتەتىن بولادى. سونىمەن قاتار, ورتالىقتا ينسۋلتتىڭ الدىن الۋ جانە ەمدەۋ ءۇشىن اسا قاجەت ماگنيتتى-رەزونانستىق توموگراف ىسكە قوسىلدى. جابدىق قان-تامىر تۇتىكشەلەرىن تولىقتاي زەرتتەۋگە مۇمكىندىك بەرەدى.
سونداي-اق ونىڭ مەملەكەتتىك بيۋدجەتتىڭ ەسەبىنەن ساتىپ الىنعانىن ايتا كەتكەن ءجون.
«ينسۋلت ەمىنىڭ ءبىرىنشى تالابى – دەرت تيگەن ادامعا 1 ساعات ىشىندە كومەك كورسەتىپ ۇلگەرۋ كەرەك. دەر كەزىندە جاسالعان ەم ادامنىڭ كەيىن مۇگەدەك بولىپ قالماۋىنا, دەنساۋلىعىنىڭ تولىقتاي قالپىنا كەلۋىنە تىكەلەي اسەر ەتەدى. اشىلىپ وتىرعان ورتالىق ينسۋلتكە قارسى جاسالاتىن قاجەتتى قۇرال-جابدىقتارمەن, مەديتسينالىق ماماندارمەن جەتكىلىكتى تۇردە قامتاماسىز ەتىلگەن», – دەدى كوپسالالى مەديتسينالىق ورتالىقتىڭ ديرەكتورى مۇحتار تولەۋتاەۆ.
ينسۋلت ورتالىعى ايىنا 50-60 ناۋقاستى قابىلداۋعا قابىلەتتى. مۇندا ينسۋلتكە شالدىققانداردى ساۋىقتىرۋدىڭ ءبىرىنشى, ەكىنشى كەزەڭدىك دارىگەرلىك كومەگى كورسەتىلەدى. بولاشاقتا وسىندا ناۋقاستاردى ەمدەۋدىڭ تولىق تسيكلى جۇزەگە اسىرىلاتىن بولادى.