ەل ۇكىمەتىنىڭ باسشىسى جامبىلدىقتاردى قۇتتىقتادى

كەلۋشىلەرگە ءوڭىر تاريحى مەن جەتكەن جەتىستىكتەرى تۋرالى بەينەفيلم كورسەتىلدى. سونىمەن قاتار ءوڭىر تاريحىن تۇگەندەگەن «تاراز مۇرالارى» اتتى تاريحي-تانىمدىق 80 تومدىق كىتاپتىڭ تۇساۋى كەسىلدى. كورنەكتى ابايتانۋشى عالىم مەكەمتاس مىرزاحمەت ۇلى مەن تاريح عىلىمدارىنىڭ دوكتورى تالاس وماربەكوۆ كىتاپتىڭ لەنتاسىن قيدى. جيىندا ءسوز العان تالاس وماربەكوۆ اۋليەاتا وڭىرىنەن شىققان تالاي تۇعىرلى تۇلعالاردىڭ بار ەكەنىن ايتا كەلىپ, وسىنداي رۋحاني مۇرالاردى ۇرپاقتان-ۇرپاققا جالعاستىرىپ وتىرۋ كەرەكتىگىن جەتكىزدى. سونىمەن قاتار عالىم 80 تومدىق كىتاپتى پرەزيدەنت كىتاپحاناسىنا, عىلىمي كىتاپحاناعا تاپسىراتىنىن ايتىپ, كىتاپتاردى مادەنيەت جانە سپورت ءمينيسترى اقتوتى رايىمقۇلوۆاعا تابىس ەتتى.

مينيستر اقتوتى رايىمقۇلوۆا پرەمەر-مينيستر اسقار ءماميننىڭ قۇتتىقتاۋ حاتىن وقىپ بەرىپ, ونى جامبىل وبلىسىنىڭ اكىمى اسقار مىرزاحمەتوۆكە سالتاناتتى تۇردە تاپسىردى. «قادىرمەندى وبلىس تۇرعىندارى! سىزدەردى جامبىل وبلىسىنىڭ 80 جىلدىق مەرەيتويىمەن قۇتتىقتايمىن! قازاقستان رەسپۋبليكاسىنىڭ تۇڭعىش پرەزيدەنتى – ەلباسى ننۇرسۇلتان ءابىش ۇلى نازارباەۆ «بۇل ولكە – ءبىر كەزدەرى قۇدىرەتتى قاراحان مەملەكەتى سالتانات قۇرعان, قازاق حاندىعى ىرگە كوتەرىپ, تۋىن تىككەن جەر. ءجۇز جاساعان جامبىل اتامىزدىڭ اتىن يەمدەنگەن ەجەلگى اۋليەاتا جەرى – «التىن قۇرساقتى» ءوڭىر. كۇمىس كومەي انشىلەر مەن داۋلەسكەر كۇيشىلەر, بىلىكتى بيلەر مەن بىلەكتى باتىرلار وتكەن بەرەكەلى ايماق» دەپ ەرەكشە اتاپ وتكەن بولاتىن.

مەملەكەت باسشىسى قاسىم-جومارت كەمەل ۇلى توقاەۆ جامبىل وبلىسىنىڭ دامۋىنا ۇلكەن ءمان بەرەدى. قازىرگى تاڭدا ەلىمىزدىڭ ەكونوميكاسىن دامىتۋعا, مادەنيەتى مەن رۋحانياتىن بايىتۋعا ءوڭىردىڭ قوسىپ وتىرعان ۇلەسى ايرىقشا. جامبىل وبلىسى حيميا ونەركاسىبىنىڭ فلاگمانى, بالامالى ەنەرگيا كوزدەرىن وندىرىسكە العاش ەنگىزگەن ءوڭىر بولىپ تابىلادى. مۇندا حالىقتىڭ تۇرمىس ساپاسىن ارتتىرۋعا باعىتتالعان جاڭا باستامالار, پيلوتتىق جوبالار ىسكە اسىرىلۋدا.

وبلىس مەرەيتويى اياسىندا بۇگىن وسى ءوڭىردىڭ الەۋمەتتىك-ەكونوميكالىق دامۋى مەن ۇرپاققا ۇلگى بولار تەرەڭ تاريحىنا كۋا بولىپ وتىرمىز. جاڭادان اشىلعان «تەكتۇرماس» ەتنوتاريحي, «شاحريستان» ەتنومادەني كەشەندەرىندە اۋليەاتاعا, كەنەن ازىرباەۆقا, اسقار توقپانوۆقا ارنالعان ەسكەرتكىشتەر مەن وبلىستىق ولكەتانۋ مۋزەيى, «رۋحانيات جانە تاريحتانۋ ورتالىعى», «شەبەرلەر جانە تۋريزم ورتالىعى», «كوركەمسۋرەت گالەرەياسى», امفيتەاتر, «ساعات» ستەللاسى سياقتى شىعىس ساۋلەت ۇلگىسىندەگى عيماراتتار – تاعىلىمى مول تاريحتى تانۋعا, ءوڭىر مادەنيەتى مەن ءداستۇرىن جاڭعىرتۋعا, ءتۋريزمدى دامىتۋعا ايتارلىقتاي ۇلەس قوسادى دەپ سەنەمىن. بىرلىگى مەن تىرلىگى جاراسقان مەرەيلى ولكەنىڭ تورقالى تويى قۇتتى بولسىن! بارشاڭىزعا باق-بەرەكە, وتباسىلارىڭىزعا اماندىق تىلەيمىن» دەلىنگەن ۇكىمەت باسشىسىنىڭ قۇتتىقتاۋىندا.

سونىمەن قاتار جيىندا تاراز قالالىق ءماسليحاتىنىڭ حاتشىسى باتىربەك قۇلەكەەۆ, №1 مەكتەپ-گيمنازياسى ديرەكتورىنىڭ ورىنباسارى اناستاسيا گۋسەۆا دا قۇتتىقتاۋ ءسوز سويلەدى. بۇدان كەيىن وبلىس اكىمى اسقار مىرزاحمەتوۆ بىرقاتار ازاماتتاردى «جامبىل وبلىسىنا سىڭىرگەن ەڭبەگى ءۇشىن» توسبەلگىسىمەن ماراپاتتادى. ولاردىڭ قاتارىندا ءاسانالى ءاشىموۆ, مەكەمتاس مىرزاحمەت ۇلى, مامبەت قويگەلديەۆ, التىنبەك قورازباەۆ, گۇلجان اسپەتوۆا, تۇڭعىشباي جامانقۇلوۆ سىندى ادەبيەت, ونەر, عىلىم سالاسىنىڭ قايراتكەرلەرى جانە وزگە دە تانىمال تۇلعالار بار.