بۇگىن جامبىل وبلىسىنىڭ 80 جىلدىعى اياسىندا تاراز قالاسىنىڭ ورتالىعىنان «كونە تاراز» تاريحي-ەتنومادەني كەشەنى اشىلدى. مۇندا بارلىق قۇرىلىس جۇمىستارى ورتاعاسىرلىق شىعىس ساۋلەتتىك ستيلىندە جۇرگىزىلگەن.
بۇل نىسان كونە تاراز شاھارىنىڭ ەكى مىڭ جىلدان استام تاريحىن ناقتىلاي تۇسەدى. «كونە تاراز» تاريحي-ەتنومادەني كەشەنىندە «رۋحانيات جانە تاريحتانۋ» ورتالىعى, «قولونەر شەبەرلەرىنىڭ گالەرەياسى», «كوركەمسۋرەت گالەرەياسى», «وبلىستىق تاريحي-ولكەتانۋ مۋزەيى», «رەترو-فەستيۆال» امفيتەاترى, «كورمە» پاۆيلونى, «ساعات» ستەللاسى جانە «اربات-2» جاياۋ جۇرگىنشىلەر الاڭى سياقتى 8 نىسان قامتىلعان.
بۇگىندە اتالعان كەشەندەگى 8 نىسان بويىنشا قۇرىلىس-مونتاج, ارلەۋ-بەزەندىرۋ جۇمىستارى تولىعىمەن اياقتالعان. قۇرىلىس جۇمىستارىنا بارلىعى 1000-نان اسا قۇرىلىسشى, 100-دەن استام تەحنيكا جۇمىلدىرىلعان. كەشەندى ارلەۋ جۇمىستارى سامارقان كىرپىشتەرىمەن جۇرگىزىلگەن. بۇل ورايدا وزبەكستاننان ارنايى ماماندار تارتىلدى. ماسەلەن, كەشەن قۇرىلىسىنا قاجەتتى ماتەريالداردىڭ 80 پايىزى وتاندىق ءوندىرىس ورىندارىنان جەتكىزىلسە, سامارقان كىرپىشى, گلازۋر توسەنىشتەرى قىتاي جانە وزبەكستان مەملەكەتتەرىنەن اكەلىنگەن. گلازۋر توسەنىشتەرى ارنايى پەشتەردە 1800 گرادۋس تەمپەراتۋرادا الدىن الا ولشەممەن دايىندالعان. جالپى, كەشەندەگى نىسانداردىڭ قابىرعالارىن ارلەۋ جۇمىستارىنا 7000 شارشى مەتردەن استام سامارقان كىرپىشتەرى, 2000 شارشى مەترگە گلازۋر توسەنىشتەرى پايدالانىلعان. ال, ارلەۋگە پايدالانىلعان تراۆەرتين تاستارىنىڭ ەلەمەنتتەرى قىرعىز ەلىندە ازىرلەنگەن. كەشەندەگى تاعى ءبىر ەرەكشەلىك, نىساندى بەزەندىرۋ جۇمىستارىنا ايشا ءبيبى كەسەنەسىندە كەزدەسەتىن سەگىز بۇرىشتى ورنەك-بەدەرلەر پايدالانىلعان. «كونە تاراز» تاريحي-ەتنومادەني كەشەنىنىڭ قۇرىلىس جۇمىستارى اعىمداعى جىلدىڭ ماۋسىم ايىندا باستالىپ, جەلتوقسان ايىندا اياقتالىپ وتىر.