ۇكىمەتتەگى ءباسپاسوز كونفەرەنتسياسى بارىسىندا قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى بەردىبەك ساپارباەۆ الەۋمەتتىك سالا قىزمەتكەرلەرىنىڭ جالاقىسىن ارتتىرۋ بويىنشا قابىلدانىپ جاتقان شارالار تۋرالى ايتىپ بەردى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.
تۇڭعىش پرەزيدەنت – ەلباسى ن. نازارباەۆتىڭ تاپسىرماسىمەن 2019 جىلدىڭ قاڭتار ايىنان باستاپ ەڭ تومەنگى جالاقى مولشەرلەمەسى 1,5 ەسە 42500 تەڭگەگە دەيىن ءوستى. وسى جىلدىڭ 1 ماۋسىمىنان باستاپ شامامەن 1,5 ملرد ازاماتتىق قىزمەتشىنىڭ جالاقىسىن كوتەرۋگە 300 ملرد تەڭگەگە جۋىق قاراجات باعىتتالدى. جالاقىسى تومەن جۇمىسشىلاردىڭ ەڭبەكاقىسى 32,5%-عا ءوستى.
«كەلەسى جىلدان باستاپ مەملەكەت باسشىسىنىڭ تاپسىرماسىنا سايكەس 500 مىڭ مۇعالىمنىڭ جالاقىسى 25%-عا ارتادى. سونداي-اق 34 مىڭ مادەنيەت, ونەر جانە مۇراعات قىزمەتكەرلەرىنىڭ جالاقىسى 30%-عا, 215 مىڭ دارىگەرگە 30%-عا جانە مەدبيكەلەرگە 20%-عا, 25 مىڭ الەۋمەتتىك قىزمەتكەرلەرگە ورتا ەسەپپەن 30%-عا كوتەرىلەدى دەپ كۇتىلۋدە» دەدى ب. ساپارباەۆ.
ونىڭ ايتۋىنشا, بيىل قازاقستاندىقتاردى بورىش جۇكتەمەسىن ازايتۋ ماسەلەسى تولعاندىردى. اتالعان شارامەن 565 مىڭعا جۋىق قازاقستاندىق قامتىلدى. ول ءۇشىن بيۋدجەتتەن 115 ملرد تەڭگە ءبولىندى.
«سونداي-اق ايىپپۇلدار مەن ءوسىمپۇلداردى ەسەپتەن شىعارۋ تۋرالى تاپسىرما بەرىلدى. بۇل شارامەن 33,6 ملرد تگ سوماسىنا شامامەن 1,2 ملن وتانداسىمىز قامتىلدى. بيىل بيۋدجەتتە اقشا قاراستىرىلعان. ءبىز الەۋمەتتىك سالا قىزمەتكەرلەرىنىڭ جالاقىسىن ودان ءارى كوتەرۋدى جوسپارلاپ وتىرمىز» دەدى قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى.
2,2 ملن قازاقستاندىقتىڭ زەينەتاقىسى 7%-عا, مەملەكەتتىك جاردەماقى 5%-عا يندەكساتسيالانادى. مەملەكەتتىك الەۋمەتتىك ساقتاندىرۋ قورىنان ءۇش الەۋمەتتىك تولەم ءتۇرى بويىنشا 132 مىڭ الۋشى ءۇشىن جاردەماقى كەمىندە 30%-عا وسەدى.