ۇلتتىق كاسىپكەرلەر پالاتاسىنىڭ قولداۋىمەن وڭىردە وبلىستىق ءسان جانە ديزاينەرلەر قاۋىمداستىعى قۇرىلدى. ونىڭ قۇرامىنا ءوڭىردىڭ تانىمال برەندتەرى مەن ءىستى جاڭا باستاعان ديزاينەرلەر كىرىپ وتىر.
وبلىستىق ءسان جانە ديزاينەرلەر قاۋىمداستىعىنىڭ اشىلۋ سالتاناتىندا جاڭا جىلدىق جارمەڭكە كورمە بولىپ ءوتتى. قاۋىمداستىق مۇشەلەرى الداعى ۋاقىتتا ءوز قاتارىن كوبەيتۋدى مەجەلەۋدە.
– الداعى ماقساتىمىز كاسىپكەرلەر پالاتاسى مەن ىسكەر ايەلدەر كەڭەسىمەن قولداۋىمەن تەك وبلىس ورتالىعىنداعى شەبەرلەردى عانا ەمەس, اۋداندارداعى قولونەر شەبەرلەرىن بىرىكتىرىپ, قاۋىمداستىققا مۇشە رەتىندە تارتپاقشىمىز. تۇپكى وي جۇمىس ساپاسىن ارتتىرۋ, تاجىريبە الماسۋ جانە كاسىبي دەڭگەيىمىزدى كوتەرۋ,–دەيدى «سۆەتلانا» اتەلەسىنىڭ ديرەكتورى سۆەتلانا ەحلاكوۆا.
جارمەڭكەگە توقىما فابريكالارى مەن جەكەلەگەن تىگىنشىلەر دە ءوز جۇمىستارىن الا كەلگەن ەكەن.
– ءبىز «ارمان» كاسىپورنىنان كەلىپ وتىرمىز. تەك ەرەسەكتەرگە عانا ەمەس بالالارعا دا كيىم-كەشەك توقيمىز. قاۋىمداستىقتىڭ اشىلعانى ارينە وتە جاقسى,–دەيدى «ارمان» توقىما كاسىپورنىنىڭ ديرەكتورى تاتيانا باسان.
ءىس العا باسىپ كەتسە, وڭىردەگى قولونەر شەبەرلەرىنىڭ ىلكىمدى ىسىنە دەم بەرمەك. ءبىز تىلدەسكەن كەيبىر شەبەرلەر ۇلتتىق بۇيىمداردى دا قولعا الامىز دەپ قۇلشىنىپ وتىر.
– ءبىز جاڭا تۋعان نارەستەلەردەن باستاپ 5 جاسقا دەيىنگى بالالارعا قاجەت زاتتاردى تىگەمىز. بالالار ءۇشىن جاستىق, جامىلعىلار, ويىنشىقتارعا دەيىن بار. بۇل كوكشەتاۋ قالاسىندا دايىندالاتىن جەرگىلىكتى ءونىم,–دەيدى «دينوزاۆريك» ونلاين-دۇكەنىنىڭ جەتەكشىسى ديدار عابدۋللينا.
ءسان جانە ديزاينەرلەر قاۋىمداستىعىنىڭ اشىلۋ سالتاناتىندا ۇتىس ويىندارى, شەبەرلىك ساعاتتارى مەن ءسان كويلەكتەرىنىڭ دەفيلە-كورسەتىلىمى ءوتتى. ايتا كەتەلىك, ءىس-شارا ىسكەر ايەلدەر كەڭەسى, «يسمايل» ومارتا شارۋاشىلىعى, «بيزنەس پرو» كونسالتينگىلىك اگەنتتىگى مەن «گالاتەكس» سەرىكتەستىكتەرىنىڭ قولداۋىمەن ۇيىمداستىرىلدى.