دامۋ مۇمكىندىگى شەكتەۋلى بالالار تاربيەلەنەتىن №2 ارنايى مەكتەپ-ينتەرناتىندا سەگىز قىرلى, ءبىر سىرلى جەرلەسىمىز ۆيكتور دەنيسەنكونىڭ شىعارماشىلىق كەشى ءوتتى.
ءبىر بويىنا سان قىرلى ونەردى توعىستىرعان دارىندى جاندى تۋعان جەر تاقىرىبى كوبىرەك تولعاندىرادى. ونىڭ سىرشىل سەزىمگە تولى ليريكالىق ولەڭدەرى مەن اندەرىن تىڭداۋشىلار اركەز جىلى قابىلدايدى. سالاماتتى ءومىر سالتىن سەرىك ەتكەن ول –دجيۋ-دجيتسۋ بويىنشا حالىقارالىق دارەجەدەگى سپورت شەبەرى, دزيۋدو, سامبو, قويان-قولتىق ۇرىستان جوعارى ساناتتى ۇلتتىق تورەشى.
اعارتۋ ءىسىنىڭ ۇزدىگى بالالار مەن جاسوسپىرىمدەر سپورت مەكتەبىنىڭ جاتتىقتىرۋشىسى بولىپ كوپ جىل بويى جەمىستى ەڭبەك ەتتى. سوڭعى جىلدارى پوليتسيا قىزمەتكەرلەرى ءۇشىن قويان-قولتىق ۇرىس بويىنشا نۇسقاۋشى بولىپ جۇمىس ىستەدى. قازىر جاس سپورتشىلاردى جاتتىقتىرۋمەن اينالىسادى. ونەگەلى ۇستاز سامبو جانە قازاقشا كۇرەستەن كوپتەگەن سپورت شەبەرلەرىن دايىندادى. ونىڭ سەرگەي گورلوۆ, ۆيكتور گرۋدينين, ولەگ الەكساندروۆ, رومان دجانتلەەۆ سىندى شاكىرتتەرى قازاقستان, ازيا, ەۋروپانىڭ بىرنەشە دۇركىن چەمپيوندارى اتاندى.
«بوس ۋاقىتتاردا مۋزىكامەن, ولەڭ شىعارۋمەن, سۋرەت سالۋمەن, بيليارد ويناۋمەن شۇعىلدانامىن», دەيدى ۆيكتور دەنيسەنكو.
جيىن سوڭىندا اقىننىڭ «قازاقستان» اتتى ولەڭىنىڭ جەلىسى اياسىندا تۇسىرىلگەن بەينەروليك ۇسىنىلدى.
سولتۇستىك قازاقستان وبلىسى