قازاقستان قورعانىس ءمينيسترىنىڭ شىمكەنت گارنيزونىنا جاساعان جۇمىس ساپارى اياسىندا م.ح. دۋلاتي اتىنداعى №8 مامانداندىرىلعان گيمنازيادا پاتريوتيزم مەن ەرلىك جونىندە ساباق وتكىزىلدى.
ساباق بارىسىندا 9-11 سىنىپ وقۋشىلارى زاماناۋي قازاقستاندىق ارميا, اسكەري قىزمەت پەن كاسىپ تۋرالى تانىستىرىلدى. جوعارى سىنىپ وقۋشىلارىنا مينيستر ءپاتريوتيزمنىڭ ماعىناسى, قازاقستان قارۋلى كۇشتەرىنىڭ تەحنيكالىق جابدىقتالۋى مەن جەتىستىكتەرى جونىندە اڭگىمەلەپ بەردى. سونىمەن بىرگە كورنەكى جانە قاراپايىم مىسالدار كەلتىردى.
مەكتەپ وقۋشىلارى ءمينيستردىڭ تىلەگى مەن كەڭەستەرىن قىزىعا تىڭداپ, وزدەرىن تولعاندىرعان سۇراقتارىن قويۋعا مۇمكىندىكتەرى بولدى.
ءوز سوزىندە مينيستر جاستارعا بۇكىل قايرات پەن كۇش-جىگەردى العا قويعان ماقساتقا جەتۋ ءۇشىن جۇمساۋدى, ۋاقىتتى باعالاپ, ونى ءتيىمدى پايدالانۋعا, وزدەرىنىڭ مۇعالىمدەرىنە قۇرمەت كورسەتۋگە شاقىردى,سونداي-اق ادامنىڭ بىلىمگە دەگەن قۇشتارلىعى,تىڭ ويلارى مەن مىنەزى وسى جاس كەزدە قالىپتاساتىنىن اتاپ ءوتتى.
وسىنداي ساباقتار قازاقستاندىق وقۋشىلارمەن تۇراقتى جانە ءجيى وتكىزىلەدى. جاس ۇرپاققا وسىنداي فورماتتاعى اڭگىمەلەسۋ مەن اشىق ديالوگ ۇنايدى. اسكەريلەر تاجيبەلى ماماندار رەتىندە وزدەرىنىڭ بىلىمدەرىمەن بولىسسە, ال وسكەلەڭ ۇرپاق مەكتەپ قابىرعاسىنان باستاپ پاتريوت بولۋمەن قاتار, وتان الدىنداعى وزدەرىنىڭ جاۋاپكەرشىلىكتەرى مەن مىندەتتەرىن تۇسىنۋگە ۇيرەنەدى.