ۇلتتىق قوعامدىق سەنىم كەڭەسىنىڭ ەكىنشى وتىرىسىندا پرەزيدەنت قاسىم-جومارت توقاەۆ قىلمىستىق كودەكستىڭ 130-بابى دەكريميناليزاتسيالاناتىنىن ايتتى.
«بۇعان دەيىن دە تالقىلانىپ, قوعامدا قىزۋ پىكىرتالاس تۋدىرىپ كەلە جاتقان تاعى ءبىر ماڭىزدى ماسەلە - بۇل قىلمىستىق كودەكستىڭ جالا تۋرالى 130-بابى. ۇلتتىق كەڭەستىڭ ءبىرىنشى وتىرىسىندا دا بۇل ماسەلە كوتەرىلگەن ەدى. بۇل باپتى دەكريميناليزاتسيالاۋ ۇسىنىلدى. دەسە دە قارسى ارگۋمەنتتەر دە بار. كەيبىر قوعام مۇشەلەرى, ءتىپتى قۇقىق قورعاۋشىلار قىلمىستىق كودەكستە بۇل نورمانى ساقتاۋدى جاقتاپ وتىر. ويتكەنى اڭگىمە ادامنىڭ قۇقىعىن قورعاۋ, ونىڭ ابىرويى مەن ار-نامىسىن ساقتاۋ جايىندا بولىپ وتىر. كەيبىر مەملەكەتتىك ورگاندار 120-باپتىڭ ءبىرىنشى تارماعىنا عانا وزگەرتۋلەر ەنگىزۋدى ۇسىندى», قاسىم-جومارت توقاەۆ.
مەملەكەت باسشىسىنىڭ ايتۋىنشا, قىلمىستىق كودەكستىڭ 130-بابىن وزگەرتۋ ماسەلەسى بويىنشا عانا ۇلتتىق كەڭەس مۇشەلەرى مەن مەملەكەتتىك ورگاندار وكىلدەرىنىڭ قاتىسۋىمەن بىرنەشە جۇمىس تالقىلاۋى وتكەن.
«بارلىق ۇستانىمداردى جانە بۇل ماسەلەنىڭ ەرەكشەلىكتەرىن ساراپتاۋ قورىتىندىسى مەن قىلمىستىق كودەكستىڭ 130-بابىن دەكريميناليزاتسيالاۋ جانە ونى اكىمشىلىك كودەكسكە اۋىستىرۋ تۋرالى شەشىم قابىلدادىم. بۇعان قوسا, وزگە ادامداردىڭ قۇقىعىنا كەپىل بەرۋ جانە ولاردى جالا وسەك پەن ورىنسىز ايىپتاۋلاردان قورعاۋ ءۇشىن جاۋاپكەرشىلىكتىڭ جوعارى شارالارىن ساقتاۋ قاجەت», دەدى پرەزيدەنت ۇلتتىق قوعامدىق سەنىم كەڭەسىنىڭ ەكىنشى وتىرىسىندا.