الەۋمەتتىك سالالاردىڭ 5 جىلدىق دامۋ باعدارى

500 مىڭ پەداگوگتىڭ ەڭبەكاقىسى 2 ەسە وسەدى

الدىمەن ءبىلىم جانە عىلىم ءمينيسترى اسحات ايماعامبەتوۆ بايانداما جاساپ, قازاقستاندا ءبىلىم مەن عىلىمدى دامى­تۋ­دىڭ 2025 جىلعا دەيىنگى جاڭا مەم­لەكەت­تىك باعدارلاماسى ازىرلەنگەنىن ايت­تى. مينيستر ءوز سوزىندە بۇگىنگى تاڭدا ءبىلىم جانە عىلىم جۇيەسىنىڭ الدىندا جاڭا ماق­سات-مىندەتتەر تۇرعانىن, بۇل مىن­دەت­تەردى شەشۋ ءۇشىن مەملەكەت باسشى­سى­­نىڭ تاپسىرماسى نەگىزىندە 2020-2025 جىل­دارعا ارنالعان جاڭا باعدارلاما دا­يىن­دالعانىن ايتتى.

– جاڭا باعدارلامادا بىرنەشە سترا­تەگيا­لىق قۇجات نەگىزگە الىندى. اتاپ ايتقاندا, ەلباسىنىڭ «100 ناقتى قادام» ۇلت جوسپارى مەن «رۋحاني جاڭعىرۋ» باعدارلامالارى, مەملەكەت باسشىسىنىڭ سايلاۋالدى تۇعىرناماسى, تامىز كەڭە­سىندە, جولداۋدا بەرگەن ءبىلىم سالاسىنا قاتىستى تاپسىرمالارى تولىعىمەن قام­تىلدى, − دەدى مينيستر.

ول اتاپ وتكەندەي, باعدارلاما جوباسى پەداگوگيكالىق ۇجىمداردا قاراپايىم مۇعا­لىمدەردىڭ, ساراپشىلاردىڭ قاتىسۋى­مەن جانە پارلامەنت دەپۋتاتتارىمەن بىرگە الدىن الا تالقىلاندى. سونىمەن قاتار پرەمەر-ءمينيستردىڭ ورىنباسارى بەردىبەك ساپارباەۆتىڭ وڭىرلەرگە ساپارى اياسىندا دا جەرگىلىكتى جەرلەردەگى مۇعالىمدەردىڭ ۇسىنىس-پىكىرلەرى جان-جاقتى قاراستىرىلدى.

– جوبانىڭ تاعى ءبىر ەرەكشەلىگى, بيىل ءبىز PIRLS, PISA, ICILS سياقتى 5 حا­لىق­ارالىق زەرتتەۋدىڭ ناتيجەسىن الدىق. وسى زەرتتەۋلەردى قاراپ, ونىڭ تالداۋلارىنا كوز جۇگىرتتىك. ءتيىستى شەشىمدەر قابىلدادىق. ەڭ باستى ماسەلەلەردى جانە ولاردى شەشۋ جولدارىن ەسكەردىك. وسىلايشا بۇل باعدارلاما عىلىمي نەگىزدە دايىندالدى دەۋگە بولادى. جال­پى, مەملەكەتتىك باعدارلاما جوباسىندا 2 ماقسات, 11 مىندەت, 8 ينديكاتور جانە 39 كورسەتكىش كوزدەلگەن. باستى ماق­ساتى – وتاندىق عىلىم مەن ءبىلىمنىڭ الەم­­دىك باسەكەگە قابىلەتتىلىگىن ارتتىرۋ, قۇن­دىلىقتار نەگىزىندە تۇلعالاردى تار­­بيەلەۋ مەن وقىتۋ, سونىمەن قاتار ەكو­نو­مي­كامىزداعى عىلىمنىڭ ۇلەسىن ۇلعاي­تۋ. بۇل ماقساتقا جەتۋ 5 باعىت پەن 11 مىندەت اياسىندا جۇزەگە اسادى, − دەدى ا.ايماعامبەتوۆ.

مينيستر اتاپ وتكەندەي, قازاقستاندا پەداگوگتەردىڭ ەڭبەگىن نورمالاۋ جۇيەسى ەنگىزىلەدى.

– ءبىز جوبادا پەداگوگتەردىڭ مارتە­بەسىن ءبىرىنشى ورىنعا قويىپ وتىرمىز. مەملەكەت باسشىسىنىڭ تاپسىرماسىنا ساي 4 جىل ىشىندە 500 مىڭ پەداگوگ­تىڭ ەڭبەك­اقىسىن 2 ەسەگە ۇلعايتۋ قاراس­تى­رىل­عان. مۇعالىمدەردى قايتا دايار­لاۋ­­دىڭ, بىلىكتىلىكتى ارتتىرۋدىڭ جاڭا جۇ­يەسى ەنگىزىلەتىن بولادى. بۇدان بىلاي بالا­باقشا, قوسىمشا ءبىلىم جانە كوللەدج پەداگوگتەرى, ولاردىڭ باسشىلارى اتتەس­تات­تاۋدان ءوتىپ, جالاقىسى ارتاتىن بولا­دى. پەداگوگتەردىڭ ەڭبەگىن نورمالاۋ جۇ­يەسىن ەنگىزەمىز جانە 2021 جىلدان باستاپ ۋني­ۆەر­سيتەتتەردىڭ تۇلەكتەرى رەتتەلەتىن ما­مان­دىقتار بويىنشا سەرتيفيكاتتاۋدان وتەتىن بولادى, – دەدى مينيستر.

پەداگوگيكالىق ءبىلىمدى جاڭعىرتۋ, بولاشاق مۇعالىمدەردىڭ پەداگوگيكالىق پراكتيكاسىن وزگەرتۋ جانە ونى ۇلعايتۋ, وقۋ باعدارلامالارىن جالپى 100%-عا جاڭارتۋ قاراستىرىلعان. 3-6 جاستاعى بالالاردى بالاباقشامەن تولىق قامتۋ جوسپارلانعان.

– ساپانى ارتتىرۋ ماقساتىندا ولاردى ليتسەنزيالاۋدى كەزەڭ-كەزەڭمەن قايتارۋ جانە بالالاردى مەكتەپكە دايارلاۋدى جاقسارتۋ ءۇشىن جاڭا باعدارلامالار ەنگىزۋ كوزدەلگەن. كۇندە كورىپ جۇرگەنىمىزدەي, جەكەمەنشىك بالاباقشالاردا ءارتۇرلى كەلەڭ­سىز جاعداي كوبەيىپ كەتتى. سون­دىق­تان كەزەڭ-كەزەڭمەن ليتسەنزيالاۋ ما­سەلەسىن دە قولعا العان ءجون دەپ ۇيعار­دىق. وڭىرلەردىڭ جەكەمەنشىك بالا­باق­­شا­لارىنىڭ ۇسىنىسى بويىنشا مەم­لە­كەتتىك تاپسىرىس قۇنى 30 مىڭ تەڭگەگە دەيىن جەتكىزىلەدى. ول ءۇشىن رەسپۋب­ليكا­لىق بيۋدجەتتەن 400 ملرد تەڭگەدەن استام قارجى قاراستىرىلىپ وتىر, − دەدى مينيستر.

 بەس جىلدا 800 مەكتەپ سالىنادى

ۇكىمەت وتىرىسىندا ءبىلىم جانە عى­لىم ءمينيسترى الداعى 5 جىلدا جاڭادان 800 مەكتەپ سالىناتىنىن ايتتى.

– كەلەسى ماڭىزدى باعىت – ينفرا­قۇ­رىلىم. بولجامعا سۇيەنسەك, 2025 جىل­عا قاراي ورىن تاپ­شىلىعى 500 مىڭعا جۋىقتايدى. اتالعان پروبلەمالاردى شەشۋ ءۇشىن مەكتەپتەر مەملەكەت جانە جەكەمەنشىك تاراپىنان سالىناتىن بولادى. اتاپ ايتقاندا, 650 مىڭنان استام ورىندىق 800 جاڭا مەكتەپتى مەملەكەتتىك بيۋدجەت تاراپىنان جانە جەكە ينۆەستيتسيا تارتۋ ارقىلى سالۋ جوسپارلاندى. وعان 876 ملرد تەڭگە بولىنەدى. ناتيجەسىندە 3 اۋىسىمدى مەكتەپتەر مەن ورىن تاپشىلىعى شەشىلىپ, اپاتتى مەكتەپتەر ازايادى, − ا.ايماعامبەتوۆ.

ءمينيستردىڭ ايتۋىنشا, اۋىل مەك­تەپتەرىن قولداۋ ءۇشىن «اۋىل – ەل بەسىگى» باعدارلاماسى نەگىزىندە اۋىلداعى تىرەك مەكتەپتەر ءۇشىن 114 ينتەرنات سالۋعا 53 ملرد تەڭگە ءبولۋ جوسپارلانعان.

– بۇگىندە ەلىمىزدە 1879 مەكتەپتە سپورت زالى مۇلدەم جوق. وسىعان وراي وقۋشى سانى 150-دەن اساتىن بارلىق مەكتەپتە سپورتزال سالىنادى. بۇل ماقساتتا 724 سپورتزالىن سالۋعا 80 ملرد تەڭگە ءبولىندى. جاڭا باعدارلاما اياسىندا بارلىق مەكتەپتەردى فيزيكا, حيميا, بيولوگيا پاندىك كابينەتتەرمەن تولىق قامتاماسىز ەتۋگە 100 ملرد تەڭگە, پاندىك كابينەتتەردى كومپيۋتەرلەرمەن قامتۋدى 100%-عا جەتكىزۋ ءۇشىن 50 ملرد تەڭگە تاعى ءبولىنىپ وتىر. بۇل ماسەلەلەردىڭ جىلدار بويى شەشىلمەي كەلگەنىن اتاپ وتكىم كەلەدى, بۇل – شىن مانىندە ءبىلىم سالاسى ءۇشىن وتە ۇلكەن جاقسى جاڭالىق, – دەدى سالا ءمينيسترى.

ا.ايماعامبەتوۆ شاعىن جيناقتالعان مەكتەپ پەداگوگتەرىنە ەڭبەكاقى تولەۋ جۇيەسى وزگەرتىلگەنىن ايتتى.

– تاعى ءبىر ماڭىزدى ماسەلە – قالالىق جانە اۋىلدىق مەكتەپتەردىڭ ءبىلىم ساپا­سىنداعى الشاقتىقتى ازايتۋ. PISA دەرەكتەرى بويىنشا قازىر الشاقتىق 1,5 جىلدى قۇرايدى. ونى قىسقارتۋ ءۇشىن كەشەندى شارالار قابىلداندى. ەڭ باستىسى, بىلىكتى پەداگوگتەرمەن قامتاماسىز ەتۋ ءۇشىن شاعىن جيناقتالعان مەكتەپ پەداگوگتەرىنە ەڭبەكاقى تولەۋ جۇيەسى وزگەرتىلەدى, اۋىلدىق مەكتەپتەردى وقۋ ماتەريالدارىمەن, كومپيۋتەرلىك جابدىقتارمەن جانە تسيفرلى تەحنيكامەن, تسيفرلى رەسۋرستارمەن تولىعىمەن قامتيتىن بولامىز. بۇل ماقساتتا رەسپۋبليكالىق بيۋدجەتتەن 150 ملرد تەڭگە ارنايى قاراستىرىلىپ وتىر, – دەدى مينيستر.

ا.ايماعامبەتوۆتىڭ ايتۋىنشا, الەمدىك تاجىريبەگە سايكەس ءبىلىم ساپاسىن ارتتىرۋدا باقىلاۋدىڭ ورنى ەرەكشە. ەندى سىرتقى باقىلاۋ تەك قانا كەمشىلىكتى تابۋ ەمەس, ونىڭ الدىن الۋ جانە جويۋ ءۇشىن ادىستەمەلىك كومەك بەرۋگە باعىتتالاتىن بولادى.

– وسى تۇستا باقىلاۋدىڭ جاڭارتىلعان جاڭا جۇيەسىن ەنگىزەمىز. ۋنيۆەرسيتەتتەرگە, كوللەدجدەرگە قويىلاتىن تالاپتاردى كۇ­شەيتەتىن ءتيىستى نورماتيۆتىك-قۇقىقتىق قۇ­جات­تاردى قابىلدايمىز, – دەدى مينيستر.

تاقىرىپتى قورىتىندىلاۋ بارىسىندا پرەمەر-مينيستر اسقار مامين 3 جىلدا مەملەكەتتىك باعدارلامانى جۇزەگە اسىرۋ ءۇشىن 1 ترلن 466 ملن تەڭگە بولىنگەنىن مالىمدەدى.

– مەكتەپكە دەيىنگى ۇيىمداردىڭ جەلىسى 1728 بىرلىككە ۇلعايتىلدى, 3 جاس­تان 6 جاسقا دەيىنگى بالالاردى مەكتەپ­كە دەيىنگى وقىتۋمەن قامتۋ 98%-عا دەيىن ارتتى. 1-10 سىنىپ وقۋشىلارى (95,4%) جاڭارتىلعان مازمۇنعا كوشتى. 273 مىڭ مۇعالىم (94%) جاڭارتىلعان وقۋ باع­دارلاماسى بويىنشا وقىتىلىپ, 30% مولشەرىندە ۇستەمەاقى الۋدا. ات­تەس­تاتسيادان وتكەن 123 مىڭنان استام مۇعالىم 30-50%-عا قوسىمشا تولەم الادى. ءبىلىم بەرۋدى دامىتۋ قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ ستراتەگيالىق باعىتىنىڭ باستى باسىمدىقتارىنىڭ ءبىرى. مەملەكەت باسشىسى قاسىم-جومارت كەمەل ۇلى توقاەۆ قازاقستان حالقىنا ارناعان جولداۋىندا ءبىلىم ساپاسىن ودان ءارى جاقسارتۋعا, قالا مەن اۋىل مەكتەپتەرى اراسىنداعى الشاقتىقتى ازايتۋعا جانە پەداگوگتەردىڭ مارتەبەسىن ارتتىرۋعا ەرەكشە نازار اۋداردى, − دەدى ا.مامين.

469 جاڭا مەديتسينالىق نىسان اشىلدى

كەلەسى كەزەكتە دەنساۋلىق ساقتاۋ ءمي­نيسترى ەلجان ءبىرتانوۆ 2016-2019 جىل­دار­عا ارنالعان «دەنساۋلىق» مەملەكەتتىك باع­دار­لاماسىنىڭ قورىتىندىسىن جاريا ەتتى.

– نەگىزگى ناتيجەلەردىڭ قاتارىندا حالىقارالىق تاجىريبەگە سايكەس قوعامدىق دەنساۋلىق قىزمەتى قۇرىلدى. العاشقى مەديتسينالىق-سانيتارلىق كومەكتى دامىتۋ اياسىندا جالپى پراكتيكا دارىگەرىنىڭ جۇك­تەمەسى 16 %-عا تومەندەدى, اۋرۋلار­دى باسقارۋ باعدارلاماسى ەنگىزىلدى. ەل­باسى تاپسىرماسىن ورىنداۋ اياسىندا دارى­لەردىڭ باعالارىن رەتتەۋ ەنگىزىلدى. 2020 جىلدان باستاپ مىندەتتى الەۋمەتتىك مە­دي­تسينالىق ساقتاندىرۋدى ەنگىزۋ ءۇشىن دايىندىق جۇمىستارى جۇرگىزىلدى, – دەدى مينيستر. ءمينيستردىڭ دەرەگىنشە, مەدي­تسينالىق قىزمەتكەرلەردىڭ جالاقىسى 30 %-عا ءوستى, دارىگەرلەر تاپشىلىعى 2,7 ەسە ازايدى. دەنساۋلىق ساقتاۋ سالاسىنا سالىن­عان ينۆەستيتسيا ەكى جارىم ەسە ارتىپ, 147 ملرد تەڭگەگە جەتتى. 469 جاڭا مە­دي­تسينالىق نىسان پايدالانۋعا بەرىلدى. تسيفر­­لاندىرۋدىڭ ارقاسىندا ەمحا­نالار­داعى كەزەك ەكى ەسە ازايدى. مەدي­تسي­نا­لىق-اقپاراتتىق جۇيەلەر بارلىق مەم­لەكەتتىك مەديتسينا ۇيىمدارىندا ەنگىزىلدى.

– ناتيجەسىندە دەنساۋلىق كورسەت­كىشتەرى جاقساردى. ءومىر ءسۇرۋ ۇزاقتىعى 73 جاستان استى. جالپى, ءولىم 2%-عا, انا ءولىمى 13%-عا, نارەستە ءولىمى 4%-عا, تۋبەركۋلەزدەن ءولىم سانى 41%-عا تومەندەدى. قورىتىندىلاي كەلە, «دەنساۋلىق» باع­دار­­لاماسىنىڭ نەگىزگى ماقساتتارى مەن مىندەتتەرى ورىندالدى دەپ ايتۋعا بولادى, – دەدى ە.ءبىرتانوۆ.

«دەنساۋلىق» مەملەكەتتىك باعدار­لاما­سىنىڭ الداعى 5 جىلدىعىندا  ساپالى جانە قولجەتىمدى دەنساۋلىق ساقتاۋ­دى قامتاماسىز ەتۋ كوزدەلگەن.  العاشقى مىندەت – قوعامدىق دەنساۋلىق ساقتاۋدى دامىتۋ. وسى ورايدا تۇزدى تۇتىنۋ 31%-عا, تەمەكى شەگۋ 13,6%-عا, الكوگولدى تۇتىنۋ 16%-عا تومەندەيدى. دەنە شى­نىق­تىرۋ جانە سپورتپەن اينالىساتىن حالىق ۇلەسى 36%-عا جەتەدى. ەكىنشى باعىت اياسىندا تاماق ونىمدەرىنىڭ ساپاسىنا, نەگىزگى ينفەكتسيالىق اۋرۋلارمەن كۇرەسكە جانە جاراقاتتانۋ مەن جازاتايىم وقيعالاردى تومەندەتۋگە نازار اۋدارىلادى. ناتيجەسىندە ازاماتتاردى يممۋن تاپشىلىعى ۆيرۋسىنان ەمدەۋمەن قامتۋ 29%-عا ارتادى, جول-كولىك وقيعاسىنان بولاتىن ءولىم كورسەتكىشى 24%-عا, تۋبەركۋلەزبەن سىرقاتتانۋ 9%-عا, ۋلانۋدان ءولىم 10%-عا تومەندەيدى. ءۇشىنشى باعىت اياسىندا اۋرۋلاردىڭ الدىن الۋعا, جاستار دەنساۋلىق ورتالىقتارىن كۇشەيتۋ ارقىلى بالالار مەن جاستار دەنساۋلىعىنا, ونىڭ ىشىندە مەنتالدى جانە رەپرودۋكتيۆتى دەنساۋلىققا ەرەكشە كوڭىل بولىنەدى. وسى شارالاردىڭ ار­قاسىندا العاشقى مەديتسينالىق-ساني­تارلىق ۇيىمدارعا پروفيلاكتيكا ماق­ساتىمەن كەلۋ جيىلىگى 16 %-عا ارتادى دەپ جوسپارلانىپ وتىر.

– كەلەسى باعىت – ادام كاپيتالىن دامىتۋ. مۇندا كاسىبي دامىتۋدى جەتىلدىرۋ, بيومەديتسينالىق زەرتتەۋلەر نارىعىن دامىتىپ, كوممەرتسيالاندىرۋ, دەربەس مەديتسينانى ەنگىزۋ كوزدەلگەن. جالاقىنى ارتتىرۋ, الەۋمەتتىك قولداۋدى كۇشەيتۋ, كاسىبي جاۋاپكەرشىلىكتى قورعاۋ ارقىلى مەديتسينالىق قىزمەتكەر مارتەبەسىن ارتتىرۋ جوسپارلانعان. دارىگەردىڭ ورتاشا جالاقىسى 2025 جىلى 2,5 ەسەگە وسەدى, اۋىلداردى مەديتسينالىق قىزمەتكەرلەرمەن قامتاماسىز ەتۋ كورسەتكىشى 13%-عا ارتادى, كلينيكالىق زەرتتەۋلەر سانى 2 ەسە كوبەيەدى, – دەدى مينيستر.

ە.ءبىرتانوۆتىڭ ايتۋىنشا, بەسىنشى باعىت اياسىندا پەدياتريا, وڭالتۋ جانە باس­قا مەديتسينالىق قىزمەتتەردى كەڭەي­تۋ جانە ءدارى-دارمەكپەن قامتاماسىز ەتۋ جەتىل­دىرىلەدى. پاتسيەنتتەردىڭ مەديتسينا­لىق كومەك ساپاسىنا قاناعاتتانۋ دەڭگەيى 65%-عا دەيىن ارتادى, مۇگەدەكتىككە ال­عاشقى شىعۋ دەڭگەيى 2,4%-عا تومەن­دەيدى. ال التىنشى باعىت بويىنشا اقپاراتتىق جۇيەلەردى ودان ءارى دامىتۋ, بيزنەس-ينتەللەكت قۇرالدارىن ەنگىزۋ, ستاتيستيكانىڭ جاڭا تاسىلدەرىن ەنگىزۋ كوزدەلگەن. وسىلايشا, ينتەروپەرابەلدىك پلاتفورمامەن تولىق ينتەگراتسيالانعان مەديتسينالىق ۇيىمدار ۇلەسى 90%-عا جەتۋى ءتيىس.

– «دەنساۋلىق ساقتاۋ جۇيەسىنىڭ تۇراق­تى دامۋى» دەگەن ءۇشىنشى مىندەت اياسىندا حالىقتىڭ دەنساۋلىققا جۇمساعان جەكە شىعىندارى 39%-دان 27 %-عا تومەن­دەيدى. ەلباسىنىڭ تاپسىرماسىن ورىنداۋ بارىسىندا العاشقى مەدي­تسينا­لىق-سانيتارلىق كومەك پەن قوعام­دىق دەنساۋلىق ساقتاۋدى قارجىلان­دىرۋ جالپى شىعىستاردىڭ 60 پايىزىنا جەتەدى. سەگىزىنشى باعىت اياسىندا قۇرال-جابدىقتاردى جاڭارتۋعا, ءىرى وبەكتىلەردى سالۋعا ينۆەستيتسيالىق شىعىن­داردى وتەۋ, تاريفتەردى جەتىل­دىرۋ كوزدەلگەن. پرەزيدەنت تاپسىرماسى بويىنشا, مەديتسينالىق تەحنيكامەن جابدىقتاۋ 100%-عا جەتەدى, مەدي­تسينا­لىق عيماراتتاردىڭ توزۋى 32%-عا تومەن­دەيدى, دەنساۋلىق سالاسىنا ينۆەستيتسيالار كولەمى التى جىلدا 2,8 تريلليون تەڭگەگە ارتادى. ونىڭ ىشىندە جەكە ينۆەستيتسيالار ۇلەسى 70%-دان اسادى, − دەدى مينيستر.

تاقىرىپتى قورىتىندىلاۋ بارىسىندا پرەمەر-مينيستر ا.مامين الداعى ۋاقىتتا مەديتسينالىق كومەك ساپاسىن ارتتىرۋ, دەنساۋلىق ساقتاۋدىڭ بىرىڭعاي تسيفر­لى كەڭىستىگىن قۇرۋدى اياقتاۋ بو­يىنشا شارالار قابىلداناتىنىن جەتكىزدى. سونىمەن قاتار بارلىق وڭىردە مەديتسي­نالىق قىزمەت كورسەتۋدىڭ جاڭا تەحنولوگيا­لارى ەنگىزىلىپ جاتقان العاش­قى مەديتسي­نالىق كومەك كورسەتۋدىڭ وزىق تاجىريبە ورتالىقتارىن دامىتۋ جال­عاساتىنىن اتاپ ءوتتى. مەديتسينا قىز­مەت­كەرلەرىنىڭ مار­تەبەسىن ارتتىرۋ ءۇشىن كادر­لىق رەسۋرس­تاردىڭ ۇلتتىق جۇيەسى قۇرىلاتىنىن ايتتى.

– دارىگەرلەر مەن مەيىربيكەلەردىڭ جالاقىسى ورتا ەسەپپەن 2 ەسە ارتىپ, ولاردى الەۋمەتتىك قولداۋ شارالارى كۇشەيتىلەدى, سونداي-اق كاسىبي جاۋاپكەرشىلىك شارالارى دا كۇشەيتىلەدى. جالپى, ءبىر دارىگەردىڭ جۇكتەمەسى ەكونوميكالىق ىنتىماقتاستىق جانە دامۋ ۇيىمىنىڭ دەڭگەيىنە دەيىن تومەندەيدى (1500 ادامعا – 1 دارىگەر), − دەدى ا.مامين.

ۇكىمەت باسشىسى مەديتسينا سالاسىن­داعى ينۆەستيتسيالىق احۋالدى تۇبەگەيلى جاقسارتۋ جانە جوبالىق باسقارۋدى ەنگىزۋ جوسپارىنا دا توقتالىپ ءوتتى.

– العاش رەت سالاعا 2,8 ترلن تەڭگە قارجى ءبولۋ جوسپارلانعان, ونىڭ 2,2 ترلن تەڭگەسى جەكە ينۆەستيتسيالار ەسەبىنەن بولادى. وسى قاراجات ەسەبىنەن 431 دەن­ساۋلىق ساقتاۋ نىسانى سالىنادى, سونىڭ ىشىندە 10 مىڭ ورىنعا ارنالعان, حالىق­­ارالىق دەڭگەيدەگى 19 كوپسالالى اۋرۋ­­حانا مەملەكەت-جەكە­مەنشىك ارىپ­تەس­­تىگى مەحانيزمى ارقىلى سالىنادى. بۇل اۋرۋ­حانالارداعى ەمدەۋ ورىندارىن 50%-عا ۇل­عايتۋعا, مە­ديتسينالىق نىسان­داردىڭ توزۋىن 56%-دان 38%-عا دەيىن ازايتۋعا مۇم­كىندىك بەرەدى, − دەدى ا.مامين.

پرەمەر-مينيستر وسى شارالاردىڭ بارلىعى مەديتسينالىق ينفراقۇرىلىمدى جاق­سارتۋعا جانە اۋرۋ-سىرقاۋدىڭ دەڭ­گە­يىن ازايتۋعا, سونداي-اق قازاقستان­دىق­تاردىڭ ورتاشا ءومىر ءسۇرۋ ۇزاقتىعىن 2025 جىلعا قاراي 75 جاسقا دەيىن كوتەرۋگە ىق­پال ەتەتىنىن اتاپ ءوتتى.