جامبىل وبلىسىنىڭ قۇرىلعانىنا 80 جىل تولۋىنا وراي, تالاس اۋدانىنىڭ ءۇشارال اۋىلىندا مەديتسينالىق پۋنكت اشىلدى.
اتالعان مەكەمە مەملەكەتتىك-جەكەمەنشىك ارىپتەستىك اياسىندا بوي كوتەرىپ وتىر. ەل يگىلىگىنە بەرىلگەن نىساننىڭ اشىلۋ سالتاناتىنا تالاس اۋدانى اكىمىنىڭ ورىنباسارى سەرىك داداباەۆ قاتىسىپ, ءۇشارال اۋىلى تۇرعىندارىنىڭ قۋانىشىنا ورتاقتاستى. «بۇگىنگى يگىلىكتى ءىستى ەل تاۋەلسىزدىگىنىڭ جەمىسى دەپ ءتۇسىنۋىمىز كەرەك. الداعى ۋاقىتتا اۋىل تۇرعىندارى اۋدان ورتالىعىنا بارماي-اق, تۇرعىلىقتى جەردەن ەم الۋعا مۇمكىندىك الىپ وتىر», دەدى ول.
سونىمەن قاتار اۋىل تۇرعىندارىن قۇتتىقتاپ, ورتالىقتىڭ جۇمىسىنا ساتتىلىك تىلەدى.
سونداي-اق اۋىل ارداگەرى امىربەك وماروۆ ءۇشارال تۇرعىندارىنىڭ العىسىن جەتكىزىپ, ءوزىنىڭ مەرەكەلىك لەبىزىن ءبىلدىردى. كۇن ساناپ كوركەيىپ كەلە جاتقان ەلىمىزدىڭ جەتىستىكتەرى تۋرالى اڭگىمەلەدى.
اتالعان مەديتسينالىق پۋنكتتىڭ قۇرىلىسىن «اقتوبە» جاۋاپكەرشىلىگى شەكتەۋلى سەرىكتەستىگى جۇرگىزگەن. شارا بارىسىندا سەرىكتەستىك ديرەكتورى سيمۆوليكالىق كىلتتى سالتاناتتى جاعدايدا تابىس ەتتى.