قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى بەردىبەك ساپارباەۆ باستاعان جۇمىس توبى كەشە ماڭعىستاۋ وبلىسىنا جۇمىس ساپارمەن كەلدى. ۆيتسە-پرەمەر الدىمەن جاڭاوزەن قالاسىنداعى بىرقاتار الەۋمەتتىك ماڭىزى بار نىسانداردى ارالادى.
الدىمەن, قالاداعى وندىرىستىك الاڭنىڭ جۇمىسىمەن تانىستى. 30 گەكتار اۋماقتى الاتىن تەحنوپاركتىڭ نەگىزگى مىندەتى ءونىم ءوندىرۋ سالاسىنداعى جۇمىس جاسايتىن كاسىپكەرلەردى ءبىر جەرگە ورنالاستىرۋ. وسى ۋاقىتقا دەيىن الاڭعا ىشكى جانە سىرتقى ينجەنەرلىك جەلىلەر تارتىلىپ, اكىمشىلىك عيماراتى مەن انگار سالىنىپ, بولىنگەن قاراجات تولىعىمەن يگەرىلگەن. قازىرگى تاڭدا, جاڭاوزەن قالاسى اكىمدىگى جانە «اتامەكەن كاسىپكەرلەر پالاتاسى» اراسىندا جۇمىس توبى قۇرىلىپ, «بيزنەستىڭ جول كارتاسى – 2020» بيزنەستى قولداۋ جانە دامىتۋدىڭ بىرىڭعاي باعدارلاماسى اياسىندا وندىرىستىك الاڭنان كاسىپكەرلەرگە جەر ۋچاسكەلەرىن وڭىرلىك ۇيلەستىرۋ كوميسسياسى ارقىلى ءبولۋ جۇمىستارى تالقىلانۋدا. بۇگىنگى كۇنگە دەيىن وندىرىستىك الاڭعا ورنالاسۋ بويىنشا 37 كاسىپكەردەن ۇسىنىس تۇسكەن.
ب.ساپارباەۆ باستاعان ۇكىمەتتى كتوپ كاسىپكەرلەرگە قىزمەت كورسەتۋ ورتالىعىنا باردى. وندا «اتامەكەن» ۇلتتىق كاسىپكەرلەر پالاتاسىنىڭ جاڭاوزەن قالاسىنداعى فيليالىنىڭ, ونداعى وزىنە-ءوزى قىزمەت كورسەتۋ ايماعىنىڭ, قىزمەتكەرلەرىنىڭ جۇمىس بارىسىمەن تانىستى. وسىعان دەيىن جاڭاوزەن قالاسىنا «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسى ا.مىرزاحمەتوۆپەن بىرگە جۇمىس توبى كەلگەن بولاتىن. جۇمىس توبى 2 اپتا بويى جاڭاوزەن قالاسىنداعى كاسىپكەر ماماندارمەن كەزدەستى. ارنايى نۇر-سۇلتان قالاسىنان كەلگەن ماماندار جەكە جانە زاڭدى تۇلعالاردى اقپاراتتاندىرىپ, قالالىق كاسىپكەرلىك جانە اۋىل شارۋاشىلىق ءبولىمىنىڭ ماماندارىمەن بىرلەسە وتىرىپ كاسىپكەرلىك سالاسىنداعى ماسەلەلەردى, ونىڭ شەشۋ جولدارىن قاراستىرىپ, كاسىپكەرلەرگە قىزمەت كورسەتتى.
قازىرگى تاڭدا جاڭاوزەن قالاسىندا 7 قازاندا باستالعان «كاسىپ ءتۇبى-ءناسىپ» جوباسى ناتيجەلى جۇزەگە اسىرىلۋدا. بۇگىنگى كۇنگە دەيىن جوبانىڭ جۇمىس توبى 500-گە جۋىق ادامعا كەڭەس بەردى. ونىڭ 15% قارجى قىزمەتتەرى بويىنشا, 10%- ماركەتينگتىك, 10% قۇقىقتىق كەڭەس بەرۋ ت.ب. قۇرايدى.
ساپار اياسىندا ۆيتسە-پرەمەر بەردىبەك ساپارباەۆ جاڭاوزەن قالاسىنىڭ تۇرعىندارىمەن كەزدەستى.
كەزدەسۋگە پرەمەر-ءمينيستردىڭ ورىنباسارى بەردىبەك ساپارباەۆ بىرگە ماڭعىستاۋ وبلىسىنىڭ اكىمى سەرىكباي ترۇموۆ, ەڭبەك جانە الەۋمەتتىك قورعاۋ ءمينيسترى ءبىرجان نۇرىمبەتوۆ, ءبىلىم جانە عىلىم ۆيتسە-ءمينيسترى شولپان كارينوۆا, دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆا, مادەنيەت جانە سپورت ۆيتسە-ءمينيسترى ەلدوس رامازانوۆ, اقپارات جانە قوعامدىق دامۋ ءمينيسترىنىڭ ورىنباسارى دانيار ەسين جانە كاسىپوداقتار فەدەراتسياسنىڭ توراعاسى ەرالى توعجانوۆ قاتىستى. جيىندا ءسوز العان ۆيتسە-پرەمەر ازاماتتاردىڭ ءال-اۋقاتىن ارتتىرۋ, ءبىلىم بەرۋ, دەنساۋلىق ساقتاۋ جانە الەۋمەتتىك قورعاۋ باعىتتارى بويىنشا مەملەكەت باسشىسى تاپسىرمالارىنىڭ جۇزەگە اسىرىلۋى جونىندە اقپارات بەردى. سونداي-اق ول جاڭاوزەندىكتەردى مەملەكەتتىك قولداۋ باعدارلامالارىن بارىنشا پايدالانۋعا, سونىڭ ىشىندە «ەڭبەك» باعدارلاماسىنا باسا ءمان بەرۋگە شاقىردى.
ءىس-ساپار بۇگىن اقتاۋ قالاسىندا جالعاسۋدا.