ەسەپتەگى 7000-نىڭ 6500-گە جۋىعى ىشىمدىككە سالىنعاندار, قالعانى ناشاقورلار. بارلىعى دەرلىك ەرەسەكتەر. ءبىر وكىنىشتىسى, جەرگىلىكتى ۇلت وكىلدەرىنىڭ ۇلەسى باسىم.
45 جاسار اسحات وتكەن 20 جىلىن وكىنىشپەن ەسكە الادى. ول 16 جاسىنان ەسىرتكىنىڭ شىرماۋىنا بايلانعان. ءومىرىن وكسىك ەتكەن اق ۇنتاق ءۇشىن ۇرلىق جاساپ, بەس مارتە تەمىر تورعا دا توعىتىلىپتى. سەگىز جىل بۇرىن قاتتى ايازدا اياعىن ءۇسىرىپ, ءبىر باشپايىنان ايىرىلعان. سول جاراسى وكىنىشتى كۇننىڭ بەلگىسى بولىپ قالعانداي. بىراق بۇگىن ءبارى باسقاشا.
– قازىر مەنىڭ ءومىرىم تۇبەگەيلى وزگەردى. ويتكەنى, مەن جاراتقانعا سەنىپ, نامازعا جىعىلدىم. بۇل تەز بولعان جوق, ارينە. قانشالىقتى كوپ كۇنا جاساعانىمدى ءتۇسىنىپ, بۇعان دەيىن دۇرىس ءومىر سۇرمەگەنىمدى ۇعىندىم. جاقىندارىما قانشاما زيان كەلتىردىم, – دەيدى اسحات.
25 جىل تەمەكىگە تاۋەلدى بولىپ, قازىر ونى دا تاستاعان. ەسىرتكىنى دە ۇمىتقانىنا ون جىل. جاڭادان شاڭىراق كوتەرىپ, يماندى ءۇيدىڭ يەسى بولىپ وتىر. ناركولوگيالىق ورتالىقتا نۇسقاۋشى قىزمەتىن اتقاراتىن يسلامنىڭ دا تاعدىرى الدىڭعى كەيىپكەرگە ۇقساس. اقتوبەلىك جىگىت كوكشەتاۋعا ەمدەلۋگە كەلىپ, وسى جاقتا ءومىرىن اق پاراقتان باستاسام دەيدى.
– مەن جاقسى سپورتشى ەدىم. 1990 جىلدارى ەسىرتكى شەگۋ سانگە اينالدى. ەلىكتەگەن دە شىعارمىز. ول كەزدە توتەنشە جاعداي باسقارماسىندا قىزمەت ىستەدىم. كاسىبي سۇڭگۋىرمىن. ەسىرتكىنىڭ سالدارىنان جۇمىسىمنان ايىرىلدىم. قازىر مىنە, ءبىر جارىم جىلدان بەرى ەسىرتكىنى دوعاردىم,–دەيدى قالا تۇرعىنى يسلام.
تۋعان ولكەسىندە, بۇرىنعى شاڭىراعىندا ەكى بالاسى مەن جارى قالىپتى. ارالاسىپ تۇرادى. سۇيىكتى ماماندىعىنا قايتا ورالۋ قيىن دەيدى. ويتكەنى, وتكەنى الدىنان شىعادى. قازىر وبلىستىق ناركولوگيالىق ورتالىقتاعى ءوزى سياقتى وزگە دە جاندارعا باسىنان وتكەن وقيعاسىن ايتىپ, ءتۇزۋ جولعا سالۋعا جاردەمدەسۋدە. وبلىستىڭ باس ناركولوگى عاليا وسەربايقىزىنىڭ ايتۋىنشا, ەسىرتكىدەن باس تارتقاندار باقىلاۋدا بولماق.
– ءبىز ناركولوگيالىق ناۋقاستارىمىزدى ءبىر جىل بويى باقىلايمىز. ەگەر ناۋقاس ءبىر جىل كولەمىندە اي سايىن تۇراقتى تۇردە قارالىپ تۇرسا جانە ول ەسىرتكىدەن باس تارتسا, ۋچاسكەلىك ينسپەكتور ونى راستاسا, جۇمىس ورنى مەن دارىگەرلىك كوميسسيا مىنەزدەمە بەرسە, ءبىز ول ادامدى ەسەپتەن شىعارىپ تاستاۋعا قۇقىلىمىز, – دەيدى وبلىستىق پسيحولوگيالىق-وڭالتۋ ورتالىعىنىڭ جەتەكشىسى عاليا مۇحامەدياروۆا.
بۇگىندە وبلىستا 533 ادام ەسىرتكىگە تاۋەلدى رەتىندە تىركەلگەن. ونىڭ بىرەۋى – ءجاسوسپىرىم.