كوپەنگاگەندە قازاقستاننىڭ شۆەتسياداعى ەلشىسى جانە دانياداعى ەلشىسى قىزمەتىن قوسا اتقارۋشى قايرات ءابدىراحمانوۆ دانيا پاتشايىمى II مارگرەتەگە سەنىم گراموتالارىن تاپسىردى. بۇل تۋرالى ءسىم ءباسپاسوز قىزمەتى حابارلادى.
«اماليەنبورگ» پاتشا سارايىندا وتكەن سالتاناتتى راسىمنەن كەيىن دات مەملەكەتىنىڭ باسشىسىندا اۋديەنتسيا ءوتىپ, ول قازاقستان حالقىن تاۋەلسىزدىك كۇنىمەن قۇتتىقتادى. جىلى جاعدايدا وتكەن اڭگىمە بارىسىندا قازاقستان مەن دانيا اراسىنداعى جان-جاقتى بايلانىستاردى تەرەڭدەتۋ جانە كەڭەيتۋ جولدارى قوزعالدى. پاتشايىم ەلىمىزدىڭ ەجەلگى تاريحى مەن وزىندىك مادەنيەتىن اتاپ ءوتىپ, تاراپتار ەكىجاقتى مادەني-گۋمانيتارلىق قاتىناستاردىڭ ءتۇرلى اسپەكتىلەرىنە توقتالدى. مارگرەتە II ەلشىگە قازاقستان مەن دانيا ىنتىماقتاستىعىن نىعايتۋ جولىنداعى جۇمىسىندا تابىستار مەن جەمىس تىلەدى.
ساپار باعدارلاماسى شەڭبەرىندە ق.ءابدىراحمانوۆتىڭ دانيانىڭ سىرتقى ىستەر ءمينيسترىنىڭ حالىقارالىق ساياسات ماسەلەلەرى جونىندەگى ورىنباسارى ل.زيلمەر-دجونس, فولكەتينگتىڭ (پارلامەنتتىڭ) سىرتقى ىستەر جونىندەگى كوميتەتىنىڭ توراعاسى م. كنۋتپەن كەزدەسۋلەرى ءوتىپ, قر باسشىلىعىنىڭ بىتىمگەرشىلىك باستامالارى ۇسىنىلدى جانە ساياسي ءوزارا ءىس-قيمىلدىڭ ءتۇرلى اسپەكتىلەرى بويىنشا, ونىڭ ىشىندە بۇۇ, ەقىۇ جانە باسقا دا حالىقارالىق جانە وڭىرلىك ۇيىمدار مەن ولاردىڭ پارلامەنتتىك اسسامبلەيالارى شەڭبەرىندە پىكىر الماسۋ بولدى. جەتەكشى دات ەكونوميكالىق قۇرىلىمدارى – ونەركاسىپشىلەر كونفەدەراتسياسى مەن ەكسپورتتىق-نەسيە اگەنتتىگى جانە دانيا ءسىم جانىنداعى ساۋدا كەڭەسىنىڭ باسشىلىعىمەن كەزدەسۋ بارىسىندا ساۋدا مەن ينۆەستيتسيالارعا باستى نازار ءبولىندى.
الەمنىڭ كوپتەگەن بۇرىشتارىندا تاجىريبەسى كەڭ قولدانىلاتىن بۇل ەل قازاقستان ءۇشىن وتە پەرسپەكتيۆالى سەرىكتەس بولىپ تابىلادى جانە ەكونوميكا مەن قوعامنىڭ دامۋ تۇراقتىلىعىن باعالايتىن بارلىق حالىقارالىق رەيتينگتەردە الدىڭعى قاتارلى پوزيتسيالاردى يەلەنەدى. جوعارى دەڭگەيدەگى العاشقى بايلانىس قر تۇڭعىش پرەزيدەنتى – ەلباسى ن.نازارباەۆتىڭ 2000 جىلعى قازاندا كورولدىككە رەسمي ساپارى كەزىندە ورىن الدى. 2019 جىلعى قاڭتار-قىركۇيەك كەزەڭىندە ءوزارا ساۋدا اينالىمى 60 ملن اقش دوللارى, ونىڭ ىشىندە ەكسپورت 17 ملن اقش دوللارى جانە يمپورت 43 ملن اقش دوللارىن قۇرادى. قازاقستان دانياعا نەگىزىنەن مينەرالدى ونىمدەردى ەكسپورتتايدى جانە حيميا, تاماق ونەركاسىبى ونىمدەرىن, ماشينالار مەن جابدىقتاردى, اسپاپتار مەن اپپاراتتاردى يمپورتتايدى.
بۇگىنگى تاڭدا ەلىمىزدە 30-دان استام بىرلەسكەن كاسىپورىن تىركەلگەن.